Новы фантан у Тэатральным скверы ў Магілёве ўжо практычна гатовы. Не хапае толькі сюрпрыза, пра які нядаўна пісалі mogilev.media
Нагадаем, што фантан плануецца ўпрыгожыць новым творам магілёўца, скульптара Андрэя Вараб’ёва. Вядома, што яго праца будзе прысвечана тэме кахання, але падрабязнасці пакуль не раскрываюцца, каб захаваць інтрыгу.
Фота: mogilev.media
Чытачы mogilev.media паведамляюць, што ўжо некалькі дзён не працуе знакаміты і шматпакутны гарадскі гадзіннік насупраць драмтэатра ў Магілёве.
У студзені гэтага года механічны гадзіннік у доме на Тэатральнай плошчы замянілі на электронны – паведамлялі mogilev.media, і ён адразу пачаў даваць збоі. Прычым, нагадаем, што сам механічны гадзіннік і не быў паламаны, а спыніўся з-за палітычнага звальнення майстра Генадзя Галоўчыка.
Калі механічны гадзіннік быў створаны ўласнаручна Галоўчыкам і абслугоўваўся асабіста ім у адзіночку, то над новым электронным механізмам гадзінніка тры тыдні працавала брыгада з 15 чалавек. У яго з’явіўся новы “галоўны гадзіннікавы майстар” – Андрэй Дубровін.
Фота: mogilev.media
Зону дзіцячага адпачынку з трэнажорамі і актыўнай гульнявой пляцоўкай прэзентавалі сёння на вуліцы Каштанавай у Магілёве.
Фота: mogilev.media
У вёсках шматлікіх сельскіх саветаў Магілёўшчыны летам – з 1 чэрвеня па 31 жніўня – цалкам адсутнічае асвятленне вуліц у вячэрні і начны час, паведамляюць мясцовыя жыхары, чытачы mogilev.media. Такая сітуацыя паўтараецца з года ў год і, верагодна, прымае сістэматычны характар.
Пры зваротах на “гарачую лінію”, у дыспетчарскія службы, у арганізацыях райэнэрга нам сказалі, што адключэнне вулічнага асвятлення ноччу – не іх ініцыятыва, а рашэнне мясцовых уладаў. Сельскія выканкамы пры гэтым падцвярджаюць факт прыняцця такога рашэння.
Пра падобную сітуацыю, толькі на тэрыторыі Лагойскага раёна, яшчэ тры гады назад пісала “Звязда”. Газета тады паведамляла, што летам адключалі вулічнае асвятленне дзеля эканоміі сродкаў па рашэнні райвыканкама. Але рашэнне ўлады было прызнана Генеральнай пракуратурай парушэннем заканадаўства.
Як паведамляла пракуратура, у выніку адключэння асвятлення эканомія была нязначная – у Мінскім раёне, напрыклад, удалося сэканоміць толькі 6,2% ад фактычных затрат.
Разам з тым, такая сітуацыя з асвятленнем негатыўным чынам паўплывае на крымінагенную абстаноўку, колькасць правапарушэнняў. Нязначная эканомія сродкаў непараўнальная з затратамі на раскрыццё правапарушэнняў і злачынстваў, лячэнне і рэабілітацыю пацярпелых, кампенсацыю страт у сувязі з атрыманымі грамадзянамі траўмамі.
Наконт эканоміі спецыялісты падказваюць іншае выйсце: калі фінансавання на асвятленне вуліц не хапае, неабходна распрацаваць і зацвердзіць праграму па эканоміі, а недахоп сродкаў перакрываць за кошт дзейных мерапрыемстваў па эканоміі энергазатрат, а не элементарнага адключэння. Гэта прамы абавязак сельвыканкамаў – арганізаваць асвятленне вуліц, што дакладна прапісана ў артыкуле 43 Закона “Аб мясцовым кіраванні і самакіраванні ў Рэспубліцы Беларусь”.
Нагадаем, што ў краіне дзейнічаюць пэўныя мінімальныя дзяржаўныя стандарты, да якіх адносіцца і ўдзельная вага асветленых вуліц – не менш як 80% ад агульнай колькасці іх у населеным пункце.
Фота з адкрытых крыніц.
З пачатку 2023 года ў Магілёўскім рэгіёне зафіксавана чатыры выпадкі смерці ад няякаснага алкаголя.
– Апошні сёлета выпадак стаў рэкордным па канцэнтрацыі спірту – расказаў “Магілёўскім ведамасцям” дзяржаўны медыцынскі судовы эксперт-хімік Аляксандр Іваноў – Ён здарыўся з 62-гадовым мужчынам, якога знайшлі мёртвым у кватэры ў Магілёве. Пры правядзенні экспертызы ў крыві нябожчыка выяўлены метанол, які ў пяць разоў перавышаў смяротную канцэнтрацыю – 5%. Па прыкладных падліках мужчына выпіў ад 0,5 да 1 л алкаголю на метанолавым спірце.
Як правіла, метанолзмяшчальныя вадкасці, якія ўжываюць людзі – гэта аўтамабільныя шклоамывальнікі кантрафактнага паходжання, набытыя з рук або фальсіфікаваныя спіртныя напоі.
Крыніцы mogilev.media паведамляюць, што сярод ахвяр атручэння метанолам у бягучым годзе – два супрацоўнікі праваахоўных органаў, што атруціліся ў Палыкавічах.
Фота ілюстрацыйнае
Вечарам 22 чэрвеня на трасе М-8 вадзіцель турыстычнага аўтобуса Neoplan сутыкнуўся з красоверам Nissan, ад удару аўтобус з’ехаў у правы па ходзе руху кювет і перакуліўся. У салоне знаходзіліся 50 чалавек разам з кіроўцам – практычна ўсе з Магілёва і Магілёўскага рэгіёна.
Па медыцынскую дапамогу пасля аварыі звярнуліся 17 чалавек, у бальніцу хуткай медыцынскай дапамогі Віцебска дастаўлены 4 чалавекі, з іх адзін дзіцёнак 16 гадоў. У Віцебскую абласную бальніцу дастаўлены 7 чалавек, з іх адзін дзіцёнак 12 гадоў. Пазней у прэс-службе МУС паведамілі, што ў лякарні працягвае знаходзіцца толькі адна жанчына – жыхарка Гомеля 1978 года нараджэння.
Аўтобус з 49 турыстамі ехаў з Магілёва ў Санкт-Пецярбург. Ён належыць гомельскай фірме, кіроўца таксама жыхар Гомеля.
Фота з адкрытых крыніц
Будзе пераважаць воблачнае з ападкамі надвор’е. Працягласць дня паменшыцца на 1 хвіліну да 17 гадзін 8 хвілін 25 чэрвеня. У нядзелю сонца ўзыйдзе ў 4:28, зойдзе ў 21:36.
23 чэрвеня, пятніца – надвор’е абяцае быць воблачным. Днём тэмпература падрасце да +27°С і пераважна без ападкаў. На працягу сутак будуць паступаць паветраныя масы з паўночнага-захаду, поўначы, у другой палове дня – з паўднёвага захаду, хуткасць вятроў 2-4 м/с. Растучы Месяц. Магнітнае поле няўстойлівае.
У суботу, 24 чэрвеня, пераважна воблачна. Уноч да +17°, уранні і ўвечары да +22°С, днём слупкок тэрмометра падымецца да +26°С, месцамі і ў асобных раёнах да +28°С. Надвор’е пратрымаецца ў першай палове ў асноўным без ападкаў, у другой палове, асабліва пад вечар, магчымы дажджы . На працягу сутак будуць паступаць паветраныя масы з паўднёвага захаду і паўночнага усходу, хуткасць вятроў 1-4 м/с, пры парывах да 6-8 м/с. Растучы Месяц. Магнітнае поле спакойнае.
У нядзелю, 25 чэрвеня, прагназуецца пераважна даждлівае надвор’е, у другой палове магчымы навальніцы, уноч і раніцай да +17°С, удзень паветра прагрэецца да +26°С, у асобных раёнах да +28°С. З рання і да вечара вызначаць надвор’е будуць заходнія і паўночна-заходнія вятры хуткасцю 2-4 м/с. Месяц расце.
Ранак панядзелка 26 чэрвеня пачнецца з воблачнага надвор’я, з ранішнімі тэмпературамі да +14°С, з паўночна-заходнімі вятрамі хуткасцю да 2 м/с. У другой палове дня вялікая верагоднаць дажджоў, тэмпература да +26°С.
Фота: mogilev.media
На магілёўскім Мінскім рынку можна сустрэць зусім крыху чарніцаў – іх прадавала сёння толькі адна жанчына. За поўлітровую шкляначку – восем рублёў.
Суніцы каштуюць у два разы танней, чатыры рублі за паўлітра.
Ёсць і маладая бульба, пакуль даволі дробная. Прадаюць усяго два гандляры і тут таксама чатыры рублі, але ўжо за кілаграм.
Фота: mogilev.media
Толькі сем раёнаў Магілёўскай вобласці ўсё яшчэ трапляюць пад забарону на наведванне лясоў. Гэта самыя заходнія раёны рэгіёна – Асіповіцкі, Бабруйскі, Глускі, Кіраўскі і Клічаўскі, а таксама Горацкі і Дрыбінскі.
На астатняй тэрыторыі Магілёўскага рэгіёна забароны знятыя цалкам, альбо ўведзены толькі абмежаванні на масавыя мерапрыемствы і распальванне кастроў. Інтэрактыўную мапу забарон на наведванне лясоў можна пабачыць тут.
Фота ілюстрацыйнае
Плануецца, што фантан будзе адкрыты, калі не на дзень горада, то на пачатку ліпеня.
Фантан упрыгожыць новы твор магілёўца, скульптара Андрэя Вараб’ёва. Вядома, што яго праца будзе прысвечана тэме кахання, але падрабязнасці пакуль не раскрываюцца, каб захаваць інтрыгу.
Тэатральны фантан – улюбёнае месца многіх пакаленняў магілёўцаў. Яшчэ ў 2020 годзе выношваліся планы па стварэнню тут “цэнтра прыцягнення творчых сіл”. Такая ідэя агучвалася тады дырэктарам Магілёўскага драмтэатра Андрэем Новікавам, горача падтрымлівалася тагачасным дырэктарам Музея гісторыі Магілёва Аляксеем Бацюковым, тым больш, што дадзеная пляцоўка ўжо станавілася месцам рэалізацыі асобных мерапрыемстваў. Напрыклад, у 2019 годзе ўдзельнікамі міжнароднага арт-праекта “Магілёў вачыма гасцей” гэты фантан быў творча размаляваны.
Нагадаем, што Тэатральны сквер вярнуў сваю гістарычную назву на пачатку гэтага лета. Ён месціцца за драмтэатрам – паміж вуліцамі Болдзіна і Камсамольскай – да вуліцы Ленінскай. Гэта найстарэйшы сквер горада, закладваўся ў 1829 годзе пры губернатары М. Мураўёве, як сад. Сквер быў агароджаны, летам у ім граў духавы аркестр.
Пэўны час сквер называўся Мураўёўскім, у гонар губернатара, душыцеля паўстанняў 1830 і 1863-1864 гадоў. Потым – Тэатральным. У 1917-1919 гадах сквер меў назву Дняпроўскі, у 1919-2023 гадах – імя Герцэна.
Фота: mogilev.media і mogilevnews.by
