Category: Навіны Бабруйска

Дзяўчынку выратавалі на пажары ў Бабруйску – гарэла ванна ў пад’ездзе

Навіна ад

На дзявятым паверсе жылога дома па праспекце Будаўнікоў у Бабруйску адбыўся пажар, пра які ў службу 112 паведамілі мінакі.

Ратавальнікі, якія прыбылі на месца пажару, знайшлі моцнае задымленне на дзевятым паверсе і падпаленую акрылавую ванну паміж дзевятым і тэхнічным паверхамі дома. 

Яны абследавалі бліжэйшыя жылыя памяшканні і ў адной з кватэр знайшлі 14-гадовую дзяўчынку, якая знаходзілася дома адна. Пры дапамозе спецыяльнай маскі яе вывелі з задымленага памяшкання і перадалі медыкам. З атручэннем чадным газам дзяўчынка шпіталізавана. З другой кватэры, таксама пры дапамозе масак, ратавальнікі эвакуіравалі 38-гадовую жанчыну і яе 11-гадовага сына. Яны не пацярпелі – паведамляе прэс-служба міністэрства па надзвычайных справах. 

У выніку пажару закураны сцены ў пад’ездзе. Прычына пажару высвятляецца.

Фота: mogilev.mchs.gov.by

Бабруйскаму прадпрыемству падаткавікі налічылі больш за 300 тысяч дадатковых падаткаў

Навіна ад

Інспектары Міністэрства па падаках і зборах выявілі, што прадпрыемства ў Бабруйску, якое займаецца выпускам пластмасавых вырабаў для бдаўнічага сектара, наўмысна занізіла памеры абавязковых выплат у бюджэт. 22 супрацоўнікі арганізацыі былі аформленыя як індывідуальныя прадпрымальнікі. Такім чынам наймальнік пазбягаў выплат у Фонд сацыяльнай абароны насельніцтва і падаходных падаткаў – замест зарплаты з работнікамі разлічвадіся як з ІП.

Праверкай грашовая ўзнагарода гэтых “індывідуальных прадпрымальнікаў” была прызнана іх заработнай платай, у сувязі з чым прадпрыемства было прызнана падатковым агентам і з усіх сум выплачаных фізічным асобам даходаў яно абавязана вылічыць падаходны падатак з фізічных асоб.

Сума, прад’яўленая да аплаты, разам з пянёй, склала 317 тысяч рублёў – пішуць “Магілёўскія ведамасці”.

Фота ілюстрацыйнае

У Бабруйскім раёне адкрылі помнік даярцы

Навіна ад

На могілках вёскі Забалацце Бабруйскага раёна адбылося ўрачыстае адкрыццё помніка на магіле Александрыны Сакун – даяркі фермы, якая за працоўныя дасягненні атрымала званне Героя Сацыялістычнай Працы.

Ва ўрачыстым мерапрыемстве прыняла ўдзел кіраўніцтва раёна, аднавяскоўцы і сваякі Александрыны Сакун. Багаслужэнне над магілай Героя Сацыялістычнай Працы правёў настаяцель храма Святой Жываначальнай Тройцы іераманах Елісей – паведамляе бабруйская раённая газета “Трыбуна Працы”.  

Александрына Сакун нарадзілася ў 1932 годзе і застала ваеннае ліхалецце. Яна рана пасталела і ўжо ў 17 год пачала самастойную працоўную дзейнасць у мясцовым калгасе. Ужо праз некалькі год працы камсамолка Сакун была адной з лепшых у раёне па надоям. 

У час шостай пяцілеткі вясковая працаўніца сталася ўжо рэкардсменкай па надоям па ўсяму БССР. Урэшце за выбітныя поспехі, дасягнутыя ў справе развіцця сельскай гаспадаркі, Александрыне Рыгораўне Сакун у 1958 годзе было прысвоена званне Героя Сацыялістычнай Працы. Гэта быў зорны час простай калгасніцы з Бабруйшчыны. 

Пражыла Сакун доўгае жыццё, не стало яе на дзевяностым годзе жыцця ў лістападзе 2021 года.  

Фота “Трыбуна Працы”

На “Белшыне” затрымалі галоўнага метролага?

Навіна ад

Беларускія СМІ паведамляюць пра яшчэ адно гучнае затрыманне на бабруйскай “Белшыне”. Нібыта быў арыштаваны галоўны метролаг прадпрыемства. Верагодна, гаворка ідзе пра Ігара Маршына (на фота – справа).

Крыніцы аднаго з беларускіх выданняў паведамляюць, што адбылося затрыманне падчас дачы хабару. Нібыта прычынай затрымання стала прыватная фірма, якая “рамантавала прыборы ў абыход “Белшыны””. Што гэта за прыватная фірма і каму яна належыць, невядома.

На самім прадпрыемстве журналістам так пракаментавалі сітуацыю:

– Вы з ім не звяжацеся, яго пакуль не будзе. – сказалі на “Белшыне” – Калі ён з’явіцца, цяжка сказаць. Я нават не адкажу вам на гэтае пытанне зараз.

На пытанне, што здарылася з галоўным метролагам, прама не адказалі, адзначыўшы, што “там пытанне сур’ёзнае”.

Фота: газета “Шыннік”

Смерці на вадаёмах — тапельцы на рэках і загадкавая гібель у Магілёве

Навіна ад

Паводле інфармацыі абласнога асвода, за апошні час у Магілёўскай вобласці зафіксаваны чатыры выпадкі гібелі людзей на вадаёмах.

У Бабруйску на Бярэзіне быў знойдзены малады мужчына 1994 года нараджэння, які сышоў з дому яшчэ ў студзені гэтага года. У Магілёве на Дняпры было знойдзена цела мужчыны 1942 года нараджэння, а ў Глускім раёне ў сажалцы ўтапіўся мужчына 1963 года. 

Аднак самы загадкавы інцыдэнт адбыўся ў Магілёве, дзе першага траўня ў закапанай у зямлю двухсотлітровай бочцы была знойдзена жанчына 1959 года нараджэння. — паведамляюць “Магілёўскія ведамасці”.  

Адзначым, што ўсе тапельцы былі знойдзены ў адзенні. На дадзены момант абставіны гібелі людзей высвятляюцца.

Фота ілюстрацыйнае

Жыхарка Бабруйска цудам не паддалася тэлефонным махлярам – у яе проста не аказалася рахунку ў банку

Навіна ад

Па аднаму з месенджараў бабруйчанцы Ларысе патэлефанавалі “супрацоўнікі службы бяяспекі аднаго з банкаў”. Яе папрасілі тэрмінова зрабіць фотаздымак пашпарта і сэлфі на фоне адной са старонак дакумента – нібыта неабходна абнавіць кліенцкую базу.

Нягледзячы на тое, што жанчына цудоўна ведала пра выпадкі тэлефоннага махлярства, упэўнены і буднічны голас суразмоўцы ўнушыў ёй поўны спакой. Яе не прасілі ўзяць крэдыт альбо перавесці грошы, а маніпуляцыі адносіліся толькі да дакумента і базы дадзеных Не сумняваючыся ў правільнасці сваіх дзеянняў, Ларыса тэрмінова зрабіла сканы неабходных старонак пашпарта, выслала ўсё што яе прасілі і дадаткова паставіла сабе “ахоўнае” прыкладанне AnyDesk (насамрэч ахоўным яно не з’яўляецца, а наадварот – дазваляе падлучыцца да выдаленага кампутара і кіраваць ім).

Праз некалькі хвілін пасля завяршэння размовы бабруйчанка апрытомнела – прыгадала, што не з’яўляецца кліентам банка, з якога ёй нібыта тэлефанавалі. Прыкладанне тут жа выдаліла, так што, на шчасце, ні крэдыту, ні мікразайму ад яе імя ўзяць не паспелі – піша “Камерцыйны кур’ер”.

Фота ілюстрацыйнае

Патанулі адразу два чалавекі за дзень – у Бабруйску, пад Глускам

Навіна ад

Целы двух чалавек даставалі ратавальнікі Магілёўскай воббласці за дзень 29 красавіка – паведамляе прэс-служба МНС. У Бярэзіне ў Бабруйску патануў мужчына 1994 года нараджэння, беспрацоўны. Таксама беспрацоўны мужчына, 1963 года нараджэння патануў у вёсцы Карповічы Глускага раёна.

Фота ілюстрацыйнае.

Бабруйчанін уцёк з расійскай калоніі

Навіна ад

Як перадаюць “Кубанскія навіны”, 41-гадовы жыхар Бабруйска Алег Калінаў самавольна пакінуў калонію-пасяленне ў горадзе Краснадары, дзе адбываў пакаранне за крадзёж. Ён быў асуджаны на 1 год і 8 месяцаў. Цяпер за ўцёкі з калоніі яму пагражае новы тэрмін да чатырох гадоў. 

Фота: “Кубанскія навіны”

Бабруйскі прагулачны цеплаход прадаюць з аўкцыёна

Навіна ад

Цеплаход “Мара” на 120 чалавек пасажыраў пачынаючы з 2010 года прапаноўваў жыхарам горада на Бярэзіне водныя прагулкі. Звычайна сезон прагулак пачынаўся з мая месяца, аднак апошнія два гады з-за падзення ўзроўню вады яны прыпыніліся – піша бабруйскае выданне “Камерцыйны кур’ер”.

Цяпер жа ўласнік цеплахода, прадпрыемства “Магілёўаблвадаканал” размясціла аб’яву пра продаж карабля з аўкцыёна. Стартавы кошт – 308 382 рублі 45 капеек. Для ўдзелу ў гандлі неабходна ўнесці залогавую суму 61 600 рублёў.

Судна пабудавалі ў 1958 годзе, у Бабруйску яно знаходзіцца з 2010 года. Апошні раз у фармаце прагулачнага цеплахода «Мара» выходзіла на вялікую ваду ў 2021 годзе. Летась для яго падышоў тэрмін праходжання чарговага тэхнічнага агляду, без якога выхад на ваду немагчымы. Каб атрымаць допуск, новы ўласнік павінен будзе выканаць працы, неабходныя для бяспечнай навігацыі і эксплуатацыі.

Фота: komkur.info

 

Вакол Бабруйска адключаць тэлебачанне, але ўсяго на два дні

Навіна ад

З 26 па 28 красавіка ў Бабруйску не будзе працаваць эфірнае тэлебаанне – паведамляе “Камерцыйны кур’ер”. Гэта звязана з працамі на радыётэлевізійнай станцыі ў Ясным Лесе. Бабруйская РТПС забяспечвае эфірным тэлебачаннем і радыёвяшчаннем некалькі раёнаў Магілёўскай і Гомельскай абласцей.