Быў падарваны грузавы аўтамабіль. Першапачаткова афіцыйныя крыніцы заяўлялі пра пажар чыгуначных цыстэрн.
“Крымская чыгунка” заявіла, што 8 кастрычніка ў 06:05 на Крымскім мосце ў Керчанскім праліве адбыўся пажар.
– Адбылося ўзгаранне паліўнай цыстэрны ў хвасце грузавога цягніка. Лакаматыў з часткай вагонаў выведзены на станцыю Керч. – паведаміў тэлеканал Крым24.
Іншыя крыніцы, у тым ліку расійскія інфармацыйныя Тэлеграм-каналы і крымскі інфармацыйны партал kerch.fm паведамляюць пра выбух на мосце – са словаў відавочцаў.
На фота, размешчаных у тым ліку на афіцыйным акаўнце “Крымскай чыгункі” ў соцстцы ВКонтакце бачна, што значная частка пралётаў аўтамабільнага адгалінавання маста абрынутыя.
“Рух па Крымскім мосце цалкам закрыты, рыхтуецца запуск паромнай пераправы праз праліў” – гаворыцца ў паведамленні “Крымскай чыгункі”.
Украінскі бок афіцыйна яшчэ ніяк не каментаваў падзею. Папярэдне, пацярпелых у выніку інцыдэнта няма – гаворыцца ў паведамленнях крымскіх інфармацыйных агенцтваў.
“РИА-новости” паведамляе, што паводле заявы Нацыянальнага антытэрарыстычнага камітэта на Крымскім мосце быў падарваны грузавы аўтамабіль. У выніку выбуху былі часткова абрушаны два аўтамабільныя пралёты пераправы. Верагодна, у выніку падрыва аўтамабіля адбыўся пажар на чыгуначным адгалінаванні маста, па якім адначасова праяжджаў цягнік з паліўнымі цыстэрнамі.
Таксама з’явілася відэа, на якім бачны падрыў грузавіка падчас руху па Крымскім мосце.
8 кастрычніка ў аграгарадку Лясная пройдзе штогадовая акцыя “Лясная – месца воінскай славы”. Расказваем, якое месца займае гэтая бітва і ўся вайна ў гістарычнай памяці беларусаў.
Мерапрыемства праводзіцца да гадавіны бітвы рускай арміі са шведамі, якая адбылася 9 кастрычніка 1708 года. З праграмы вынікае, што будзе ўсхваляцца расійскі Петр І, які забіў манахаў ў Полацку, вынішчыў будынак Сафійскага сабора, выпаліў шматлікія беларускія гарады, у тым ліку Магілёў 8 верасня 1708 года, зноў будзе ўхваляцца воінская слава іншай дзяржавы.
Цікава, ці ўспомняць у Лясной пра тое, што пад час Паўночнай вайны загінула 700 тысяч беларускага насельніцтва (кожны трэці).
Адзіная прамова на беларускай мове ў гісторыі святкаванняў
5 кастрычніка 2008 года ў Лясной прайшлі мерапрыемствы, якія былі прымеркаваны 300-годдзю бітвы. Было шмат гасцей з розных краін, беларускіх чыноўнікаў.
Усе казалі быццам бы правільныя прамовы, але ўсе – ў славу расійскай зброі, хаця магілёўскія землі да 1772 года ўваходзілі ў склад іншай дзяржавы.
І толькі адзін выступоўца ўспомніў, якія страты панеслі беларусы ў той жудаснай вайне і толькі ён, адзіны, казаў на беларускай мове – шведскі амбасадар.
Кароткая гісторыя падзей.
Сённяшні аграгарадок Лясная стаіць на рачулцы Ляснянка. Лясная вядома з 1675 года як уладанне Войцеха Серафіновіча.
10 верасня 1708 года, ужо пасля знішчэння Магілёва, каля сяла Добрае пад Маляцічамі і Мсціславам рускія войскі ўпершыню за Паўночную вайну правялі баі ўнічыю са шведамі.
А 9 кастрычніка 1708 года рускія войскі пад Лясной ўпершыню атрымалі перамогу: разбілі шведскі корпус Адама Левенгаўпта і сарвалі планы паходу на Маскву па варшаўскай дарозе, якая ідзе праз Прапойск, сённяшні Слаўгарад.
Ход бітвы
У корпусе Левенгаўпта было 5500 пяхоты і 3000 кавалерыі, а таксама значная колькасць абознікаў – латышоў, эстонцаў, немцаў, магчыма і магілёўцаў. Рускае войска складалі 4830 ваяроў інфантэрыі і 6795 кавалерыі.
У бітве шведы страцілі каля 6500 забітымі, рускія – 1111 забітымі. Параза корпусу Левенгаўпта значна паслабіла пазіцыі Карла ХII. Па словах Пятра I, бітва пры Лясной — «маці Палтаўскай бітвы», якая адбылася роўна 9 месяцамі пазней.
Вынікі вайны.
Рэч Паспалітая патрапіла пад уплыў замежных дзяржаў, у тым ліку Расіі. Гэтая залежнасць паступова прывяла да знішчэння дзяржавы.
Ушанаванне памяці аб бітве.
У 1908 годзе, на грамадска-палітычным фоне пасля паразы Расіі ў руска-японскай вайне, да 200-гадовага юбілею падзеі, царскі ўрад прыняў рашэнне ўвекавечыць месца перамогі рускай арміі.
На ахвяраванні грамадзян быў збудаваны помнік у выглядзе скалы, на вяршыні якой размешчаны бронзавы арол, які стаіць на зрынутым шведскім сцягу.
wikipedia.org
Адначасова быў закладзены каменны храм-помнік у псеўдарускім стыле, які быў адкрыты 12 ліпеня 1912 года ў дзень свята Святога Пятра.Царква дзейнічала да 1930 года, потым была пераўтворана ў склад.
Да 250-й гадавіны 12 кастрычніка 1958 г. у будынку былога храма быў адкрыты музей гісторыі Бітвы пры Лясной з 250 экспанатамі.
У 1990-я гады музей быў зачынены, экспанаты вывезены ў Магілёўскі краязнаўчы музей, а будынак царквы быў перададзены праваслаўнай абшчыне і асвечаны як Свята-Петра-Паўлаўская царква.
Свяцілавічы сталі апошнім аграгарадком Бялыніччыны, куды прыйшоў прыродны газ. Аднак многія спецыялісты раёна лічаць гэта марнатраўствам.
З помпай, як умее раённае начальства, з запрашэннем дэпутатаў і кіраўнікоў вертыкалі прайшло мерапрыемства націскання ўмоўнай сіняй кнопкі падачы газа ў Свяцілавічы. Героі газазабеспячэння атрымалі Ганаровыя граматы райвыканкама, вяскоўцы – газ.
Аграгарадкі раёна газіфікаваны на 100 працэнтаў – паведамляе раённая газета “Зара над Друццю”. Кошт праекту складае 971 тысячу рублёў. Усе работы па будаўніцтве газаправода, выконваліся ў рамках Дзяржаўнай праграмы “Камфортнае жыллё і спрыяльнае асяроддзе” на 2021-2025 гады за кошт сродкаў рэспубліканскага бюджэту.
Нібыта ўсе павінны радавацца. Але частка раённых спецыялістаў толькі паціскае плячыма: “Навошта лясному раёну газ, калі побач гіне некандыцыйная драўніна?”
Найбольш абураюцца працаўнікі лясной гаспадарцы, у якіх забралі працу. Раней толькі мясцовая школа спажывала кубаметраў 70 дроў у год. Цяпер іх дзяваць няма куды. Плюс жыхароў вёскі прымушалі ламаць печы ў іх дамах. Суцэльная нявыкрутка. “Далі б лепш нам гэтыя грошы, якія ў зямлю закапалі. Мы б самае сучаснае абсталяванне для дрэваапрацоўкі набылі б і валюту зараблялі для раёна. А цяпер наадварот, валюту будзем расіянам аддаваць”.
Перамога газавага лобі
Эканамісты разважаюць яшчэ прасцей: “Сёння газ прадаецца Беларусі, як адзінай у Еўропе саюзніцы Расіі па звышільготных коштах. Але ўжо заўтра кошты могуць стаць сусветнымі. І што тады рабіць? Чаму краіны Скандынавіі, Прыбалтыцы абаграваюцца за кошт драўніны, а мы наадварот? Яны што, дурнейшыя за нас?”
Сапраўды, падобныя Бялынічам райцэнтры, напрыклад Літвы, ужо гадоў 20 на ацяпленне не выдаткоўваюць ні газ, ні нафту. Яны садзяць драўніну і спецыяльнымі магутнымі камбайнамі яе косяць, нібыта жыта на палетках. Аднаўляльныя крыніцы энергіі з аднаго боку, эканомія валюты з іншага, незалежнасць з трэцяга.
У Беларусі некалькі гадоў таму нібыта таксама хацелі ісці еўрапейскім шляхам у гэтай сферы. Пачалі былі скарачаць пракладку газаправодаў у вёскі. Але газавае лобі перамагло.
Акцыя “Адновім лясы разам” пройдзе з 6 па 22 кастрычніка. Далучыцца да аднаўлення лясоў можа любы ахвочы.
Па інфармацыі намесніка кіраўніка Магілёўскага лесагаспадарчага аб’яднання Сяргея Шаха, для лесааднаўленчых работ лясгасамі вобласці падабраны больш за 400 участкаў. Аднаўляць новыя плошчы будуць асноўнымі лесаўтваральнымі пародамі: хвоя, елка, бяроза, алешына і дуб.
«Усе высадкі з нашых гадавальнікаў. Для будучай акцыі мы падрыхтавалі амаль 2,4 млн штук пасадачнага матэрыялу» – адзначыў Сяргей Шах.
Такая маштабная рэспубліканская акцыя на тэрыторыі нашага рэгіёна пройдзе ўпершыню. Рашэнне аб яе правядзенні прыняло Міністэрства лясной гаспадаркі з-за шкоды, якую атрымалі лясы вобласці вясной.
«Тады з-за ўраганных вятроў каля 350 тысяч гектараў насаджэнняў пацярпелі. Больш за ўсё дасталася Клімавіцкаму, Чавускаму, Чэрыкаўскаму і Горацкаму раёнам. Але мала проста прыбраць пашкоджаную драўніну і перапрацаваць яе. Самая галоўная задача лесаводаў – аднавіць пашкоджаныя ўраганнымі вятрамі насаджэнні» – падсумаваў Сяргей Шах.
Далучыцца да акцыі можа любы ахвочы. На сайце аб’яднання ёсць нумары тэлефонаў, звярнуўшыся па якіх, можна атрымаць усю інфармацыю, якая цікавіць. Акрамя гэтага, можна звярнуцца і ў бліжэйшае лясніцтва ці лясгас.
У сухое надвор’е гэтая дарога выглядае іначай – згаджаюцца мясцовыя жыхары – але хадзіць у школу трэба кожны дзень.
Так выглядае дарога да школы №4 у Горках з боку прыватнага сектара. Гэтыя фотаздымкі ў рэдакцыю horki.info адправіла адна з чытачак.
– Калі дажджы, некаторым бацькам даводзіцца падвозіць дзяцей, іншыя ходзяць, можна сказаць, па калена ў брудзе, прыціскаюцца да плота, каб не запэцкацца. – дабавіла жыхарка.
На пазачарговай сесіі раённага Савета дэпутатаў Вольга Прыстромская зацверджана на пасадзе старшыні Бялыніцкага раённага выканаўчага камітэта. З лета 2018 года – гэта ўжо трэцяя замена кіраўніка раёна.
Частыя змены раённага начальства ўжо не здзіўляюць жыхароў Бялыніч. Не прыжываюцца тут старшыні выканкамаў: то ў турму сядуць, то ў Мінск на павышэнне пойдуць, то ў Цьмутаракань на паніжэнне… Летам 2018 года галавой Белыніцкага райвыканкама быў прызначаны Анатолий Шчуплянкоў, а ўжо ў жніўні 2019 яго замяніў Васіль Захаранка. І вось ізноў перамена.
Вольга Васільеўна вопытны службовец. Яна мае багаты досвед працы ў дзяржаўных органах кіравання. Яе працоўная біяграфія закранае розныя сферы, што разглядалася, як плюс пры прыняцці рашэння аб яе прызначэнні. Вольга Прыстромская – карэнная магіляўчанка, а па адукацыі бухгалтарка, вяла фінансавыя пытанні на розных пасадах у дзяржапараце. Працавала намеснікам старшыні камітэта па сельскай гаспадарцы і харчаванню аблвыканкама, а яшчэ намеснікам старшыні ў Чавускім райвыканкаме.
Канал “Новости Белыничей” інфармуе, што за зацвярджэнне на пасадзе старшыні Бялыніцкага райвыканкама Вольгі Прыстромскай аднагалосна прагаласавалі ўсе дэпутаты райсавета.
“У першую чаргу хачу адзначыць важнасць адказных адносін да працы кожнага на сваім працоўным месцы. – адзначыла, падзякаваўшы прысутным за аказаны давер, Вольга Прыстромская – Разам, падтрымліваючы адзін аднаго, працуючы адной камандай, мы не толькі працягнем усе добрыя пачынанні, але і памножым дасягнутыя поспехі сацыяльна-эканамічнага развіцця Бялыніцкага раёна.”
Нечакана многа для Бялынічаў цёплых слоў падзякі за працу было выказана і ў адрас папярэдняга кіраўніка раёна Васіля Захаранкі.
Добра было б, каб новы кіраўнік раёна паспела на сваёй пасадзе дасягнуць пастаўленых мэтаў і пачуць потым таксама словы падзякі ад мясцовых жыхароў, каб яна станоўча запомнілася тутэйшаму люду.
Адзначым, што ў Магілёўскай вобласці назіраецца відавочны гендарны дысбаланс сярод кіраўнікоў вертыкалі. 17 раёнаў і Магілёў з Бабруйскам тут узначальваюць мужчыны і толькі 4 раёны, разам з Бялыніцкім, жанчыны.
Цяпер не больш за дзесяць пакояў на сядзібе, з уласніка спытаюць за турыстаў, а дазвол на працу трэба прасіць у мясцовых уладаў.
Заяўляецца, што новы ўказ “Аб развіцці аграэкатурызму” накіраваны на ўдасканаленне рэгулявання дзейнасці ў гэтай сферы. Разбіраемся, што стаіць за Указам, які быў падпісаны сёння – як паведамляюць “Магілёўскія Ведамасці”.
Каб экасядзібы не ператвараліся ў гасцініцы
Цяпер колькасць жылых пакояў у аграсядзібе для турыстаў не павінна перавышаць дзесяці. Паведамляецца, што гэта зроблена для таго, каб выключыць магчымасць весці гасцінічны і рэстаранны бізнес пад выглядам аграэкасядзіб. Што рабіць з тым памяшканнямі, якія ўжо ёсць на сядзібе і перавышаюць колькасць у дзесяць пакояў – пры гэтым не гаворыцца.
Таксама ўладальнік сядзібы павінен не толькі ўтрымліваць яе і здаваць у арэнду, але таксама аказваць наведвальнікам паслугі, не менш як дзве. Што лічыцца паслугамі пры гэтым – напрыклад, майстар-класы, накіраваныя на азнаямленне наведвальнікаў з рамёствамі і нацыянальнымі традыцыямі рэгіёна.
Гэтае патрабаванне выглядае слушным – цяпер уласнікі сядзібаў павінны актывізавацца ў сферы культурнага адпачынку наведвальнікаў, у развіцці традыцыйных рамёстваў і промыслаў.
Але ёсць адно “але”. На правядзенне забаўляльных і інтэрактыўных праграм, канцэртаў, уласнікі аграсядзіб павінны атрымліваць дазвол Міністэрства культуры. Ці многія з іх будуць займацца падобным?
За паводзіны наведвальнікаў спытаюць ва ўласніка
Указам устаноўлена адказнасць уладальнікаў аграэкасядзіб за парушэнне, у тым ліку з боку наведвальнікаў, грамадскага парадку або спакою грамадзян. Таксама за невыкананне заканадаўства ў сферы санітарна-эпідэміялагічнага дабрабыту насельніцтва, прыродаахоўных, супрацьпажарных патрабаванняў.
Акрамя таго, уведзены абмежаванні па правядзенні прэзентацый, юбілеяў, банкетаў, іншых мерапрыемстваў у непасрэднай блізкасці ад суседніх жылых дамоў.
З дазволу мясцовых уладаў
Таксама, паводле Указа цяпер дазвол на вядзенне дзейнасці ў сферы аграэкатурызму трэба атрымліваць у райвыканкамах. Дзеючыя аграэкасядзібы павінны атрымаць такі дазвол да 1 ліпеня 2023 года.
Абласныя выканкамы з гэтага часу маюць права вызначаць пералікі населеных пунктаў, на тэрыторыі якіх размяшчэнне аграэкасядзіб не дапускаецца.
Разам з тым, калі аграэкасядзіба ўжо цяпер існуе на тэрыторыях, дзе будзе ўведзена забарона аблвыканкама, то яе праца можа працягвацца пры ўмове выканання іншых патрабаванняў указа.
Нагадаем, што на тэрыторыі краіны працуе каля 2900 аграэкасядзіб, у тым ліку на тэрыторыі Магілёўскай вобласці іх каля 250.
Важны пуцеправод у бок Бабруйска запрацаваў у два бакі. Але працы яшчэ не скончаны.
Са спазненнем у рабочы тыдзень адкрылі рух транспарту ў два бакі на пуцеправодзе, які злучае цэнтр горада і Рабочы пасёлак і прапускае транзітны транспарт на Бабруйск праз чыгунку.
Мы паведамлялі, што рух транспарту па гэтым пуцеправодзе будаўнікі па плане павінны былі адкрыць яшчэ 1 кастрычніка.
Тым не менш, рамонтныя работы працягваюцца на тратуарах і пад пуцеправодам. На выхадныя дні на левым баку рух транспарту зноў будзе перакрыты.
Рамонт маста пачаўся яшчэ ў маі, а канчаткова завяршыць усе працы плануецца да канца года.
Пасля паўгадовага перапынку, які быў выкліканы еўрапейскімі санкцыямі, аднавіліся працы па рэканструкцыі Цітоўскага маста.
Рэканструкцыя Цітоўскага аўтамабільнага маста, якому споўнілася ўжо 60 гадоў, пачалася ў канцы 2021 года з дапамогай Еўрапейскага банка рэканструкцыі і развіцця. Аднак пасля ўварвання Расіі ва Украіну праекты банка ў Беларусі былі замарожаны.Цяпер на гэта знайшліся грошы ў рэспубліканскім бюджэце, і работа закіпела.
Паводле праекту, побач са старым Цітоўскім мостам праз Беразіну павінен спачатку з’явіцца ягоны «дублёр», які возьме на сябе ўвесь транспартны паток. Пасля гэтага ўжо на месцы 60-гадовага “ветэрана” з’явіцца новы мост з палепшанымі характарыстыкамі і вялікай грузападымальнасцю. Стары мост будзе поўнасцю дэмантаваны, а на яго месцы ўзведзены новы. Фактычна, гэта не рэканструкцыя маста, а поўнамаштабнае будаўніцтва двух новых мастоў.
Два новыя масты будуць практычна ідэнтычнымі. Розніца будзе толькі ў 3,5 метра шырыні. У новага яна складзе 17 метраў, бо там запланаваны дадатковыя дарожкі для пешаходаў і веласіпедыстаў. А мост, які ўзвядуць на месцы старога Цітоўскага, будзе 14,5 метраў у шырыню.
Нягледзячы на дажджы будаўнікі працуюць у любое надвор’е. Спецыялісты філіяла “МСУ № 2” ААТ “Мостабуд” адліваюць бетонныя апоры. Як кажуць будаўнікі, ландшафт зручны, ніякіх сюрпрызаў не паднёс. Таму работы, як паведамляе “Вячэрні Бабруйск”, вядуцца запланаванымі тэмпамі.
Адзінай цяжкасцю, якая можа спыніць работы, гэта праблемы з фінансаваннем. Да канца бягучага года работы забяспечаны фінансаваннем і ідуць па плане. Калі так будзе і далей, то новы мост будзе ўведзены ў эксплуатацыю ўжо ў другім паўгоддзі 2023 года. Поўнасцю жа аб’ект плануецца здаць да канца 2024 года.
