З сярэдзіны верасня і па сярэдзіну кастрычніка ў Магілёве праходзіла грамадскае абмеркаванне пераназвання плошчы Арджанікідзэ. На прысуд грамадскасці былі вынесеныя наступныя варыянты – пакінуць назву “Плошча Арджанікідзэ”, памяняць назву на “Плошча Свяціцеля Георгія Каніскага” альбо можна было прапанаваць іншы варыянт.
Прычынай грамадскага абмеркавання стаў зварот ініцыятыўнай групы гараджан – піша Тэлеграм-канал “Магілёў – мой горад”. Аднак адначасова з гэтай ініцыятывай з’явілася і петыцыя супраць пераназвання плошчы Арджанікідзэ ў гонар Георгія Каніскага – пісалі mogilev.media. У выніку зваротаў грамадзян, незадаволеных пераназваннем аказалася больш. Таксама супраць выказаліся прадстаўнікі гарадской тапанімічнай камісіі.
“Постаць свяціцеля і ў прынцыпе актыўнасць праваслаўнай царквы, нягледзячы на тое, што горад у іншых кутках краіны лічыцца праваслаўна-ватным, у самім горадзе – адзін з найбольш раздражняючых фактараў сярод гараджан. – адрэагавалі на навіну ў тэлеграм-канале “Спадчына”. – “Ужо не ведаюць, куды гэтага Каніскага ўвапхнуць!” – даводзілася асабіста чуць ад многіх мясцовых.”
Надвор’е на Магілёўшчыне будуць вызначаць цыклон і няўстойлівыя паветраныя масы, якія рухаюцца з Карпат і Польшчы на тэрыторыю Бранскай вобласці – паведамляе Белгідрамет.
Сёння, 27 кастрычніка надвор’е ў Беларусі будуць вызначаць атмасферныя франты. На большай частцы тэрыторыі краіны пройдуць дажджы, у ранішні час месцамі чакаецца галалёд, слабы туман. Тэмпература паветра днём складзе ад 0°С да +5°С.
28 кастрычніка, у суботу надвор’е будзе вызначаць цыклон, які перамяшчаецца з Карпат праз паўднёвы ўсход Беларусі на Бранскую вобласць. Будзе воблачна з праясненнямі. Чакаюцца ападкі – дождж, мокры снег. Ноччу па паўднёвым усходзе Беларусі чакаюцца моцныя ападкі – дождж, мокры снег). Магчымы слабы галалёд на дарогах. Тэмпература паветра мінімальная ноччу складзе каля +6°С, днём +4 – +5°С.
29 кастрычніка Беларусь апынецца ў вільготнай няўстойлівай паветранай масе, у дзённыя гадзіны адаб’ецца ўплыў франтальнага падзелу, які перамяшчаецца з Польшчы. Будзе воблачна з праясненнямі. Чакаюцца кароткачасовыя ападкі – мокры снег, дождж. Уначы і раніцай – слабы туман і галалёд. Вецер ноччу няўстойлівы, месцамі парывісты. Тэмпература паветра ноччу будзе ад каля +2°С, днём каля +3°С.
“Таямніца забытага акведука” – так называецца новы ролік, які выклаў на сваім Youtube-канале магілёўскі відэаблогер пад нікам chas chasov.
Недалёка ад Шмідтаўскага маста ў Магілёве, у сапраўдных тропіках на схіле гары, на якой калісьці працаваў Завод штучнага валакна, красуецца незвычайная для горада інжынерная канструкцыя – акведук. Ён быў пабудаваны ў пасляваенныя гады для выдалення рэшткаў паліва ад катлоў ЦЭЦ-1. Палівам для электрацэнтралі служыў торф, які падаваўся з левага берага Дняпра па канатнай дарозе.
Пры дапамозе вады, зала ад катлоў змывалася па нахілёных латках акведука, які мае кіламетровую даўжыню. Пасля пераходу ЦЭЦ-1 з торфа на мазут а потым і на газ, неабходнасць у гэтай канструкцыі адпала, але яна так і засталася стаяць, усімі забытая і закінутая – тлумачыць гісторыю магілёўскага акведука аўтар відэа.
14-хвілінны ролік пагружае ў таямнічы свет гарадскога ўскрайку, дзе нібыта ў джунглях сярод дрэваў хаваюцца парэшткі колішняй цывілізацыі.
“Яўнае адчуванне Чарнобыльскай зоны” – каментуюць гледачы відэа.
“Дзякуй за новы ролік, у жыцці б не падумаў, што ў Магілёве такое ёсць.”
Ни много, ни мало 9000 рублей заработал увлекающийся азартными играми парень, на фиктивной сдаче своей квартиры в аренду.
Он разместил объявление об аренде в интернете, брал с откликнувшихся людей предоплату, давал расписки о получении денег, показывал жилье, обещал дать ключи от квартиры и… Исчезал в неизвестном направлении, сообщает телеграмм-канал “Милиция Могилевщины”.
Потерпевшие обратились в милицию и вскоре “великий комбинатор” был задержан.
Пасля завяршэння школьных канікулаў, пачынаючы з 8 лістапада паміж праспектам Шмідта і плошчай Касманаўтаў у Магілёве будзе курсіраваць дадатковы аўтобус, каб разгрузіць пасажырапаток ва ўмовах спынення трафіка па Шмідтаўскім мосце. Новы маршрут пройдзе па вуліцы Чалюскінцаў, мосце Яшына, Пушкінскім праспекце і па вуліцы Гагарына – паведамляе mycity.by. Ён будзе хадзіць да канца 2023 года – падчас усёй рэканструкцыі пуцеправода па вуліцы Завадской.
Прыклад мужнага адстойвання сваіх правоў паказала 92-гадовая жыхарка абласнога цэнтра. Спачатку яна паддалася на ўгаворы незнаёмкі, што пагрукалася ў яе кватэру ў сярэдзіне жніўня гэтага года і прапанавала выгадна набыць добры тавар.
Незнаёмка прадавала коўдру з авечай поўсці і плед – усё разам за 180 рублёў. Пажылая жанчына набыла тавар, але праз некалькі дзён засумнявалася, што заплаціла сапраўды выгадную суму – паведамляе прэс-служба Камітэта судовых экспертыз.
92-гадовая магілявянка звярнулася ў міліцыю, каб там дапамаглі ўстанавіць сапраўдны кошт коўдраў і разарваць здзелку. Экспертыза пастанавіла, што рэальны кошт тавараў у тры разы меншы – 61 рубель за ўсё. Была знойдзеная таксама і незнаёмка, што прадала пенсіянерцы коўдру і плед – 50-гадовая жыхарка Магілёва. Яна вярнула бабулі ўсе грошы.
Двух оптавых наркагандляроў затрымалі ў Магілёве супрацоўнікі наркакантролю, паведамляе прэс-служба абласнога УУС. 20-гадовыя хлопец і дзяўчына з Бабруйска былі затрыманыя з палічным. У іх пры сабе, а таксама дома і ў закладках было выяўлена каля 100 грамаў псіхатропнага рэчыва. Маладыя людзі паведамілі, што працавалі на наркамаркет ужо тры месяцы, робячы закладкі ў Магілёўскай і Гомельскай абласцях. Цяпер ім пагражае да 20 гадоў пазбаўлення волі.
Mogilev.media прайшліся па дыскаўнтэрах абласнога цэнтра і склалі рэйтынг сапраўды самых танных сярод самых танных. Розніца ў цэнніку за адзінаццаць аналагічных тавараў склала амаль 4,5 рублёў, альбо 15,4% ад сумы.
Крамы нізкіх коштаў пачалі адыгрываць усё большую ролю ў побытавых звычках беларускага насельніцтва. Нягледзячы на рост сярэдняй зарплаты, пра які рапартуюць афіцыйныя крыніцы, сваім кашальком грамадзяне дэманструюць натуральнае імкненне ашчаджаць і быць гатовымі да найгоршага.
Сеткі дыскаўнтараў шырока развіваюцца па ўсёй Беларусі, прымяняючы самыя разнастайныя стратэгіі прыцягнення наведвальнікаў і зніжэння выдаткаў дзеля захавання сваёй прывабнасці ў вачах пакупнікоў. У цэнтры адной стратэгіі можа быць эканомія на самых элементарных выдатках, напрыклад, на эстэтычных рашэннях.
Іншыя аптымізуюць лагістыку, эканомяць на складскіх памяшканнях, заробках супрацоўнікаў, ці чымсьці яшчэ. А што на выхадзе? Якая стратэгія прыводзіць да рэальна самых танных цэннікаў у крамах?
Метадалогія даследавання
Мы выбралі сем прадуктовых дыскаўнтэраў у Магілёве і параўналі, колькі каштуе базавы набор самых простых і частых пакупак у кошыках грамадзян. Вось гэтыя крамы – “Грошык”, “Светофор”, “Доброцен”, “Мегаопт”, “Копеечка”, “Маяк” і “ВпрОК”. Як бачым, у спіс увайшлі як міжнародныя сеткі, кшталту расійскіх “Светофора” і “Доброцена”, так і беларускія прыватныя “Грошык” і “Копеечка”, і нават дзяржаўны “Мегаопт” і чыста магілёўскі “ВпрОК”.
Набор прадуктаў мы для першага разу вырашылі скласці самы агульны і просты. Пакуль што ён не цалкам супадае з прынцыпам спажывецкага кошыка, але на гэта ёсць пэўныя рэзоны. У наш набор увайшлі – хлеб, малако, макароны, грэчка, сыр, каўбаса, алей і крыху гародніны на салат – цыбуля, гуркі і таматы. Ну, і мы яшчэ дадалі адзін бонус – бляшанку піва.
У некаторых выпадках адзін і той жа тавар аднаго брэнда прысутнічаў у большасці крам. Гэта дазваляла нам прыйсці да высновы пра ўзровень зніжкі, якую ў выніку атрымлівае пакупнік, наведвальнік магазінаў нізкіх цэн. У іншых – тавары мелі розных вытворцаў, але былі супастаўляльныя па наменклатуры (напрыклад, каўбаса “Доктарская”) кошце і якасці. Так, каўбаса бралася толькі вышэйшага гатунку, а прынцып выбару піва, напрыклад, быў адзіным – самая танная бляшанка светлага піва аб’ёмам да 0,5 л.
Але некаторыя тавары зусім не прадстаўлены ў шэрагу дыскаўнтэраў. Так, няма хлеба і гародніны ў “Дабрацэне”, у “Светлафоры” таксама няма хлеба, а з гародніны толькі цыбуля. Адсутнічала гародніна і ў “Мегаопце. У такім разе мы залічвалі ў агульны падлік кошт аналагічнага тавару ў іншай краме (таксама краме нізкіх коштаў) па найвышэйшай выяўленай цане. Логіка тут простая – каб дабраць у свой кошык гэты тавар, пакупнік усё роўна вымушаны будзе ісці ў іншую краму і там яго купляць. А кошт можа быць ужо не коштам дыскаўнтэра, а вышэй. Так што, спадзяемся, што адлюстравалі ў канчатковым падсумаванні максімальна аб’ектыўны вынік.
Пачынаем
Чорны хлеб. У “Грошыку”, “ВпрОК”, “Маяку”, “Мегаопце” і ў “Капеечцы” ён быў. Па кошце ад 0,75 у “Грошыку” да 1,65 у “ВпрОК”. Дзесьці гэта быў хлеб “Стары Менск”, як у “Грошыку”, што аказаўся самым танным (у спіну дыхаў хлеб за 0,76 з “Маяка”), а дзесьці толькі магілёўскі “Сітны” ў “ВпрОК” за найбольшую суму ў гэтай лінейцы. Дзеля справядлівасці трэба адзначыць, што “Сітны” ў краме “ВпрОК” пры масе 0,95 кг за 1,65 рублі выйграе перад такімі самымі гатункам, аб’ёмам і вытворцай у крамах “Грошык” (2,13 р.) і “Капеечка” (2,15 р.). Такім чынам, “Сітны” у “ВпрОК ” аказаўся самым танным “Сітным” сярод усіх, але самым дарагім у катэгорыі чорнага хлеба за найніжэйшы кошт.
Малако. Тут кошты раскіданыя не так шырока – ад 1,60 у “Светлафоры” да 1,92 ў “Мегаопце”.
Яшчэ крыху эстэтыкі дыскаўнтэраў
Грэчка. Самая танная ў “Светлафоры” за 1,35. Далей 1,55 у “Дабрацэне” і 1,57 у “Мегаопце”. Найбольш дарагая сярод самых танных – у “Грошыку” і “Капеечцы” за 1,79.
Самы танны пачак макаронаў сустрэўся ў “Маяку” за 0,79. Далей ідуць “Капеечка” з макаронамі за 0,83, “Грошык” (0,94 р.) і “Светлафор” – 0,96. Самыя дарагія ў “ВпрОК”, па 1,69 за пачак.
Алей адсутнічаў у “Светлафоры”, таму гэтай краме мы залічылі кошт як у “Капеечцы”, самы высокі па дыскаўнтэрах – 3,99. Найніжэйшы кошт за рафінаваны саланечнікавы алей знайшоўся ў “Мегаопце” – 2,59. Бліжэйшы пераследвальнік – “ВпрОК “, 2,65 і “Дабрацэн”, 2,69.
Каўбаса “Доктарская”, 400 грам была прадстаўлена ад розных вытворцаў і каштавала ад 3,29 у “Светлафоры” да 4,00 у “Дабрацэне”. Па 3,59 яна каштуе ў “Маяку” і “Капеечцы”. Іншую каўбасу, канечне, можна было знайсці і яшчэ танней, але мы вырашылі скарыстацца прадстаўленасцю аднаго і таго ж гатунка ва ўсіх крамах.
Тое самае з сырам – гатунак “Расійскі” брэнда “Брэст-Літоўск” сустрэўся ў кожнай краме, што дазволіла даць аб’ектыўны агляд зніжак, якіх дасягаюць дыскаўнтары. “Светлафор” – 2,98, “Маяк” – 2,99, “Дабрацэн” – 3,15, “Грошык” – 3,85, “Мегаопт” – 3,95, “ВпрОК ” – 3,98 і “Капеечка” – 3,99.
Калі падсумаваць агульны цэннік на названыя сем тавараў, то ў даследаваных дыскаўнтэрах ён складзе: у “Маяку” – 14,43 рублі за ўсё, у “Светлафоры” 14,82, у “Грошыку” 15,66, у “Мегаопце” 16,01, у “Дабрацэне” 16,28, у “Капеечцы” 16,90 а самы дарагі аказаўся ў краме “ВпрОК” – 17,32.
Цыбуля, гуркі і памідоры прадаваліся ў чатырох дыскаўнтэрах з сямі – у “Грошыку”, “ВпрОК”, “Маяку” і “Капеечцы”. Цыбуля яшчэ, нагадаем, была ў “Светлафоры”. Кошты за белую рэпчатую цыбулю вагаюцца ад 0,85 у “Грошыку” да 1,05 у “Маяку”. Гуркі (гладкія) самыя танныя ў “Грошыку” – 1,89. Самыя дарагія ў “ВпрОК” – 2,71. Таматы каштуюць аднолькава ў “Грошыку”, “Маяку” і “Капеечцы” – 4,89, а ў “ВпрОК” 5,60.
Што ж да піва, самае таннае мы знайшлі ў “Светлафоры”, расійскі “Старый мельник” па 1,37 за бляшанку. Самая танная беларуская “Аліварыя дзясятка” – у “Грошыку” за 1,45. Найвышэйшы кошт сярод самых танных бляшанак аказаўся ў “Мегаопце” – 1,92.
Такім чынам, падсумоўваючы набыты кошык аднолькавых прадуктаў у кожнай краме-дыскаўнтары, мы атрымалі наступны рэйтынг.
“ВпрОК” – 28 рублёў 57 капеек за ўсе адзінаццаць тавараў.
“Мегаопт” – 27,57.
“Дабрацэн” – 27,41.
“Капеечка” – 26,72.
“Светлафор” – 25,81.
“Грошык” – 24,74.
“Маяк” – 24,15.
Розніца паміж самім дарагім кошыкам і самым танным склала 4 рублі 42 капейкі, альбо 15,4% ад усёй сумы. І сённяшні пераможца – гэта гандлёвая сетка “Маяк”, якая прадэманстравала не толькі самыя прывабныя кошты, але і паўнату выбару.
Спадзяемся, што гэтае даследаванне дапаможа нашым чытачам, а мы будзем працягваць свае агляды і параўноўваць спажывецкія кошыкі ў розных гандлёвых сетках Магілёва. Дзяліцеся сваімі назіраннямі і заўвагамі ў каментарыях у сацыяльных сетках, mogilev.media з удзячнасцю прыслухацца да іх дзеля далейшага ўдасканалення метадалогіі.
