26-гадовы жыхар Бабруйска заблукаў вечарам 22 мая ў лясным масіве недалёка ад вёскі Дубоўка Бабруйскага раёна. Ён накіроўваўся ў пасёлак Туголіца. Сігнал трывогі малады чалавек падаў у 19:20 – распавялі ў МНС. Пошукі мужчыны ўскладніліся тым, што мабільны тэлефон у яго практычна сеў. Задзейнічаўшы 6 адзінак тэхнікі і 15 чалавек, ратавальнікі знайшлі бабруйчаніна праз дзве гадзіны пошукаў.
Фота: прэс-служба МНС
Category: Навіны Бабруйска
Тры горада Магілёўшчыны прызнаны лепшымі ў краіне па добраўпарадкаванні
Савет міністраў Беларусі зацвердзіў пастанову аб выніках агляда-конкурса паміж гарадамі Беларусі па ўзроўні добраўпарадкавання і санітарным стане. У першай катэгорыі, куды адносяцца абласныя цэнтры, перамог Брэст. У другой катэгорыі, сярод гарадоў з насельніцтвам звыш 50 000 чалавек, лепшымі сталі Мазыр і Бабруйск.
У чацвёртай катэгорыі, сярод гарадоў да 10 000 насельніцтва, у ліку лепшых апынуліся Бялынічы і Чэрыкаў.
Фота: bobrlife.by
У Бабруйску пройдзе гастранамічны “СмакFEST”
З 29 мая па 12 чэрвеня у Бабруйску пройдзе гастранамічны фестываль “СмакFEST”, у якім прымуць удзел 11 кавярняў горада. Удзельнікі фестывалю “СмакFEST” прапануюць сэты са страў, прысвечаныя тэматыцы “Кіно” з фіксаваным коштам 29,90 рубля.
Вось тут можна знайсці ўсіх удзельнікаў фестываля з адрасамі і тэлефонамі.
Фота: bobruisk.by
Пад Бабруйскам алабай насмерць загрыз жанчыну
Трагедыя здарылася сёння ў аграгарадку Кавалі Бабруйскага раёна. Паводле звестак следства, днём 20 мая ў двары аднаго з прыватных падворкаў аграгарадка Кавалі знайшлі цела 66-гадовай мясцовай жыхаркі. Побач з ёй на прывязі знаходзіўся сабака пароды алабай.
Загінулую знайшоў знаёмы гаспадара падворка, ён адцягнуў жывёлу і выклікаў хуткую. Нягледзячы на намаганні ўрачоў выратаваць жанчыну не ўдалося. Яна жыла праз некалькі дамоў ад месца трагедыі – паведамляе Следчы камітэт.
На хлопчыку загарэлася вопратка, калі ён варыў сабе пяльмені
У Бабруйску хлопец 2011 года нараджэння застаўся дома адзін і гатаваў сабе пяльмені на пліце. У нейкі момант ён пацягнуўся ў шафу за спецыямі і полымя ад пліты перакінулася на яго кашулю. Самастойна затушыўшы агонь на сабе ў ваннай, хлопчык патэлефанаваў маці, а тая ўжо выклікала медыкаў. З апёкамі падлетак быў шпіталізаваны – паведамляе прэс-служба МНС.
Фота: МНС
У Бабруйску пара зняла кватэру на суткі і загінула ў ёй
Жыхары Бабруйска, 25-гадовы мужчына і 55-гадовая жанчына знялі кватэру на суткі, а назаўтра іх знайшлі нежывымі. На кухні працавалі тры газавыя канфоркі пліты – мяркуецца, што пара запаліла агонь, каб сагрэцца. Дзверы і вокны заставаліся зачыненымі на ноч, смерць адбылася з-за атручэння ўгарным газам – паведамляе прэс-служба Следчага камітэта.
Фота ілюстрацыйнае
Падлетка выратавалі на пажары ў Бабруйску – кідаў запалкі ў вядро
У шматпавярховіку на вуліцы Коўзана ў Бабруйску ратавальнікі тушылі пажар у кватэры. Як высветлілася, 13-гадоввы падлетак застаўся дома адзін – бацькі павезлі малодшую сястру да бабулі – і стаў вырабляць ручную падзелку, якую абпальваў запалкамі. Запалкі пры гэтым ён выкідаў у вядро са смеццем, ад чаго смецце і загарэлася.
Пасля пачатку пажару хлопчык выскачыў у калідор, паклікаў суседзяў, а яны ўжо патэлефанавалі ратавальнікам. З атручэннем прадуктамі гарэння падлетак быў шпіталізаваны – паведамляе прэс-служба МНС.
Фота: МНС
Дзяўчынку выратавалі на пажары ў Бабруйску – гарэла ванна ў пад’ездзе
На дзявятым паверсе жылога дома па праспекце Будаўнікоў у Бабруйску адбыўся пажар, пра які ў службу 112 паведамілі мінакі.
Ратавальнікі, якія прыбылі на месца пажару, знайшлі моцнае задымленне на дзевятым паверсе і падпаленую акрылавую ванну паміж дзевятым і тэхнічным паверхамі дома.
Яны абследавалі бліжэйшыя жылыя памяшканні і ў адной з кватэр знайшлі 14-гадовую дзяўчынку, якая знаходзілася дома адна. Пры дапамозе спецыяльнай маскі яе вывелі з задымленага памяшкання і перадалі медыкам. З атручэннем чадным газам дзяўчынка шпіталізавана. З другой кватэры, таксама пры дапамозе масак, ратавальнікі эвакуіравалі 38-гадовую жанчыну і яе 11-гадовага сына. Яны не пацярпелі – паведамляе прэс-служба міністэрства па надзвычайных справах.
У выніку пажару закураны сцены ў пад’ездзе. Прычына пажару высвятляецца.
Фота: mogilev.mchs.gov.by
Бабруйскаму прадпрыемству падаткавікі налічылі больш за 300 тысяч дадатковых падаткаў
Інспектары Міністэрства па падаках і зборах выявілі, што прадпрыемства ў Бабруйску, якое займаецца выпускам пластмасавых вырабаў для бдаўнічага сектара, наўмысна занізіла памеры абавязковых выплат у бюджэт. 22 супрацоўнікі арганізацыі былі аформленыя як індывідуальныя прадпрымальнікі. Такім чынам наймальнік пазбягаў выплат у Фонд сацыяльнай абароны насельніцтва і падаходных падаткаў – замест зарплаты з работнікамі разлічвадіся як з ІП.
Праверкай грашовая ўзнагарода гэтых “індывідуальных прадпрымальнікаў” была прызнана іх заработнай платай, у сувязі з чым прадпрыемства было прызнана падатковым агентам і з усіх сум выплачаных фізічным асобам даходаў яно абавязана вылічыць падаходны падатак з фізічных асоб.
Сума, прад’яўленая да аплаты, разам з пянёй, склала 317 тысяч рублёў – пішуць “Магілёўскія ведамасці”.
Фота ілюстрацыйнае
У Бабруйскім раёне адкрылі помнік даярцы
На могілках вёскі Забалацце Бабруйскага раёна адбылося ўрачыстае адкрыццё помніка на магіле Александрыны Сакун – даяркі фермы, якая за працоўныя дасягненні атрымала званне Героя Сацыялістычнай Працы.
Ва ўрачыстым мерапрыемстве прыняла ўдзел кіраўніцтва раёна, аднавяскоўцы і сваякі Александрыны Сакун. Багаслужэнне над магілай Героя Сацыялістычнай Працы правёў настаяцель храма Святой Жываначальнай Тройцы іераманах Елісей – паведамляе бабруйская раённая газета “Трыбуна Працы”.
Александрына Сакун нарадзілася ў 1932 годзе і застала ваеннае ліхалецце. Яна рана пасталела і ўжо ў 17 год пачала самастойную працоўную дзейнасць у мясцовым калгасе. Ужо праз некалькі год працы камсамолка Сакун была адной з лепшых у раёне па надоям.
У час шостай пяцілеткі вясковая працаўніца сталася ўжо рэкардсменкай па надоям па ўсяму БССР. Урэшце за выбітныя поспехі, дасягнутыя ў справе развіцця сельскай гаспадаркі, Александрыне Рыгораўне Сакун у 1958 годзе было прысвоена званне Героя Сацыялістычнай Працы. Гэта быў зорны час простай калгасніцы з Бабруйшчыны.
Пражыла Сакун доўгае жыццё, не стало яе на дзевяностым годзе жыцця ў лістападзе 2021 года.
Фота “Трыбуна Працы”