Раённая газета Магілёўскага раёна задала чытачам пытанне: як вы праводзіце вольны час? Жыхары вёсак адказалі. Мяркуючы па адказах – ад весялосці пыл слупам.
Магілёўская “раёнка” апытала жыхарак рэгіёна наконт весялосці ў сельскай мясцовасці. Аказалася, што яе хоць адбаўляй.
- Начальніца паштовага аддзялення з Вендрыжа заявіла, што жывуць весела. Адзінае яе пажаданне – адрадзіць свята Мядовага Спаса. Бо край мядовы.
- Жыхарка вёскі Амхавая-1 растлумачыла: калі ёсць агонь у душы, ехаць за ўражаннямі не абавязкова. У іх праходзяць Дні вёскі, там песні, танцы, конкурсы. Была на «Купаллі» ў Дубінцы. Уражанняў хопіць на ўсё астатняе жыццё.
- Старшыня сельвыканкама з аграгарадка Рэчкі паведаміла, што культура ў іх б’е ключом. Прычым «з такім размахам, што часам і горад пазайздросціць».
А што на самой справе, без прапагандысцкіх штучак? Прыводзім рэальны “калейдаскоп весялосці”:
- у вёсцы Новая Слабада Слаўгарадскага раёна жыхары сабраліся на сельскі сход. Абмяркоўвалі дарогі, пустазелле і старыя дрэвы – тыя ж самыя праблемы што трыццаць гадоў таму. Асобна паскардзіліся: у горадзе няма майстра по рамонце абутку;
- у вёсцы Круча Круглянскага раёна закрылі школу і краму. ФАП перанеслі ў пустуючы будынак былой крамы;
- у вёсцы Пуцькі Чавускага раёна жыхары паскардзіліся старшыні райвыканкама на адсутнасць участковага, прадаўца і фельчара. Адрадзіць ФАП, сказалі чыноўнікі, “ужо не атрымаецца” – фельчар будзе прыязджаць з суседняй вёскі. Затое з’явіцца новае месца для збору малака.
Апошні факт асабліва паказальны – улады спрабуюць выціснуць з магілёўскай вёскі ўсё, да апошняй кроплі малака, да апошняга кілаграма мяса і прымусіць вяскоўцаў скакаць ад радасці на адкрыцці прыпыначнага пункта для аўталаўкі.
Фота “Прыдняпроўская ніва”.