Позна вечарам 18 лютага здарыўся пажар у кватэры на пятым паверсе шматпавярховіка па вуліцы Мінская шаша ў Магілёве. Ратавальнікам удалося выявіць жывой у задымленым памяшканні 62-гадовую пенсіянерку. Ёй апранулі кіслародную маску для дыхання і шпіталізавалі. У жанчыны дыягнаставалі атручэнне прадуктамі гарэння. Папярэдне, прычынай пажару стала неасцярожнасць пры курэнні – паведамляе прэс-служба МНС.
Фота: МНС
Мужчына 1984 года нараджэння сам здолеў пагасіць агонь у сваёй хаце ў Горках – паведамляе прэс-служба МНС. З апёкамі і з атручэннем прадуктамі гарэння ён шпіталізаваны. Пажар адбыўся раніцай 15 люттага.
У той жа дзень у Крычаве загарэлася кватэра на другім паверсе трохпавярховага дома ў мікрараёне Сож. Жанчыну 1957 года выцягнулі з полымя ратавальнікі. Яна шпіталізаваная. Паводле папярэдняй версіі, прычынай пажару стала неасцярожнасць пры курэнні.
Фота: МНС
Аб узгаранні дома па вуліцы Максіма Горкага паведамілі суседзі. У доме жылі два браты 79 і 63 гадоў. Падчас тушэння пажару ратавальнікі знайшлі ў палаючым пакоі целы абодвух мужчын. Прычына пажару высвятляецца.
Нагадаем, што ў мінулым месяцы ў вобласці адбылося 77 пажараў (у 2022 годзе – 76), загінула 11 чалавек (у 2022 годзе – 12). Пацярпела 9 чалавек (у 2022 годзе – 9). У выніку пажараў знішчана 10 будынкаў, 2 адзінкі тэхнікі. Асноўнымі прычынамі ўзнікнення ўзгаранняў – неасцярожнае абыходжанне з агнём і парушэнне правілаў прылады і эксплуатацыі ацяпляльнага абсталявання.
Фота: МНС
Пажар здарыўся днём 8 лютага ў вёсцы Туркі Бабруйскага раёна. На месцы ўзгарання ратавальнікамі было знойдзена цела гаспадара дома 1940 года нараджэння. Яго жонку 1948 года нараджэння яшчэ да прыезда пажарных выратавалі мясцовыя жыхары – паведамляе прэс-служба МНС. Прычына пажару, папярэдне – парушэнне правілаў эксплуатацыі пячнога і іншага абагравальнага абсталявання.
Фота ілюстрацыйнае.
У вёсцы Бель-1 Крычаўскага раёна 62-гадовая пенсіянерка спрабавала растапіць печку, лінуўшы бензіну. Ад успышкі лёгкаўзгаральных пароў яна атрымала апёкі 15% цела. У момант здарэння ў доме знаходзіўся сын пацярпелай, які загасіў на жанчыне вопратку і выклікаў медыкаў. Жанчына шпіталізаваная – паведамляе прэс-служба МНС.
Фота ілюстрацыйнае.
У вёсцы Ходаравічы Горацкага раёна вечарам 6-га лютага ратавальнікі былі выкліканыя на пажар у прыватным доме. Гаспадар хаты. 57-гадовы пенсіянер быў шпіталізаваны з атручэннем прадуктамі гарэння. Папярэдняя прычына пажару – неасцярожнасць пры курэнні, паведамляе прэс-служба МНС
Фота ілюстрацыйнае
Здарэнне адбылося ў аграгарадку Цялуша Бабруйскага раёна вечарам 3 лютага – паведамляюць “Магілёўскія ведамасці” са спасылкай на прэс-службу МНС.
Да прыбыцця ратавальнікаў з-пад капота аўтамабіля ішоў дым. У выніку пажару пашкоджана падкапотная прастора, пярэдняя панэль, лабавое шкло. Прычына пажару высвятляецца. Разглядаецца версія, што адбылося парушэнне правіл эксплуатацыі электрасетак і электраабсталявання.
Фота: МНС
Пасярод ночы жыхар вёскі Новы Востраў Клічаўскага раёна і яго сябар прачнуліся з-за трэску шыфера – гарэў сарай. Напярэдадні вечарам да гаспадара дома ламілася мясцовая жыхарка, 51-гадовая жанчына. Яна спачатку грукацела ў дзверы, затым паленам разбіла вакно. Пасля гэтага мужчына запусціў яе нарэшце ў свой дом, і жанчына накінулася на яго з кулакамі, патрабуючы вярнуць пазыку ў 100 рублёў.
Госць гаспадара дома здолеў выпхнуць скандалістку на вуліцу, але напаследак яна пракрычала, што калі мужчына не верне ёй пазыку, то спаліць хату.
Гаспадар дома і яго госць працягвалі адпачываць у хаце і па чарзе выходзілі на двор. Абодва заўважалі, што ў сараі дыміцца сена. Спачатку гаспадар прытаптаў лёгкае ўзгаранне і вярнуўся дахаты. Потым дым з вагнём у сараі пабачыў госць – і заліў сена вядром вады. Але пасярод ночы палыхнула яшчэ раз – паведамляе звязаны з сілавікамі Тэлеграм-канал.
Але самае цікавае ў тым, што гаспадар дома сцвярджае, што ніякай пазыкі ў жанчыны ён не браў.
Фота з адкрытых крыніц
1 лютага ў 3 гадзіны ночы здарыўся пажар у адным з кабінетаў новага інфекцыйнага корпуса Магілёўскай гарадской бальніцы №1 па вуліцы Акадэміка Паўлава – паведамляе прэс-служба МНС. Будынак інфекцыйнага корпуса не эксплуатуецца – толькі ідзе яго будаўніцтва. Персанал і пацыенты ў ім адсутнічаюць. Гарэнне адбывалася ў вучэбна-метадычным кабінеце на шостым паверсе. У выніку пажару пашкоджана медыцынская маёмасць, якая складуецца, закурана памяшканне кабінета. Пацярпелых няма. Прычына пажару высвятляецца.
Фота: МНС
Два чалавекі загінулі на пажары ў прыватным доме па вуліцы Спартакаўскай у Бабруйску вечара 23 студзеня – паведамляе прэс-служба МНС. Прычыны ўзгарання высвятляюцца. Таксама ў Бабруйску ў гэты дзень гарэў дом па вуліцы Звязды. Гаспадар дома 1979 года нараджэння атрымаў апёкі і быў выратаваны, а яго сужыцельніца, жанчына 1981 года нараджэння, загінула.
Яшчэ адзін пажар у прыватным доме ў Бабруйску – на вуліцы Кірава – завяршыўся менш трагічна. Гаспадар дома 1958 года нараджэння спрабаваў самастойна загасіць полымя, атрымаў апёкі і быў шпіталізаваны.
Таксама гарэў дом у Чавусах па вуліцы Забалоцкай. Гаспадар дома 1951 года нараджэння выратаваўся, атрымаўшы атручэнне дымам, і быў шпіталізаваны.
У вёсцы Машавое Касцюковіцкага раёна ў сваім доме быў знойдзены мужчына 1969 года нараджэння, які атруціўся ўгарным газам – зарана закрыў дымаход у печы.
У Асіповічах на чыгунцы адбыўся наезд электрацягніка на чалавека. Пацярпела дзяўчына 1999 года нараджэння, якая з траўмамі рознай ступені цяжкасці была шпіталізаваная.
Фота ілюстрацыйнае.
