Tag: могилев

Затрыманы фальшываманетчыкі з Бялыніч. Падробныя расійскія рублі яны бралі з закладак

Навіна ад

Двое фальшываманетчыкаў з Бялыніч былі затрыманыя супрацоўнікамі Упраўлення па барацьбе з эканамічнымі злачынствамі – паведамляе прэс-служба МУС. 20-аговы і 31-гадовы жыхары райцэнтра арганізавалі сістэму дастаўкі і рэалізацыі на Магілёўшчыне падробных пяцітысячных купюр расійскай валюты. Фальшывыя рублі яны набывалі праз інтэрнэт і забіралі сродкі ў пакінутых закладках. Затым мянялі грошы ў гандляроў на гарадскіх рынках у Магілёве, Бабруйску, Быхаве і Кіраўску. Усяго фальшаваманетчыкі паспелі збыць 37 падробных купюр – на агульную суму больш чым 7 300 беларускіх рублёў. Цяпер ім пагражае да 15 гадоў зняволення.

Фота: МУС, скрыншот

Памятаеце іспанскіх смаўжоў? Яны ўжо ў Магілёве

Навіна ад

Год таму mogilev media пісалі пра паяўленне на Беларусі гіганцкага інвазіўнага малюска, якога нельга браць у рукі. Тады фотаздымкі з атрутным смаўжом публікавалі мінскія паблікі. Цяпер паявіліся сведчанні з самаго Магілёва – з поймы рачулкі Дзебры.

Магілёўскія карыстальнікі соцсетак публікуюць фотаздымкі вялікага ярка-карычневага ці нават аранжавага смаўжа, знойдзенага каля рэчкі Дзебры ў Магілёве. 

“Дасюль ніколі ня бачыў такіх жырдзяістых і прытым аранжавых сьлізняў. І гэта ён яшчэ ад майго шоргату скукожыўся.” – піша аўтар фота.

Іспанскі смоўж родам з Партугаліі. Адсутнасць натуральных ворагаў і камфортныя ўмовы надвор’я паспрыялі яго пашырэнню ў краінах Еўропы – у тым ліку Ўсходняй. З 2010-х гадоў гэтага смаўжа пачалі сустракаць у Падмаскоўі, затым і ў больш паўночных рэгіёнах Расіі. Вядома, што нават зімняе надвор’е нашых шырот дастаткова камфортнае для гіганцкага малюска. І на стадыі лічынкі, і на стадыі дарослай жывёлы ён спакойна трывае мінусавыя тэмпературы.

Спецыялісты раяць не дакранацца да гэтага малюска рукамі, паколькі яны могуць быць пераносчыкамі вялікай колькасці захворванняў. Смаўжы вырастаюць да вялікіх памераў, аж да 15 сантыметраў. Памер і агрэсіўны колер палохаюць птушак, таму гэты інвазіўны шкоднік не мае натуральных ворагаў у экасістэме і бесперашкодна распаўсюджваецца ў новай для сябе прыродзе.

Фота: Анатоль Прасаловіч

З’явілася петыцыя супраць плошчы Георгія Каніскага ў Магілёве

Навіна ад

На сайце petitions by з’явілася петыцыя супраць перайменавання плошчы Арджанікідзэ ў плошчу імя Георгія Каніскага.

“Мы выступаем супраць перайменавання плошчы Арджанікідзэ ў Магілёве ў гонар Георгія Каніскага – гаворыцца ў петыцыі. Асоба Каніскага ўжо ўшанавана ў назве суседняй вуліцы Архірэйскі Вал Каніскага. Нядаўна ж пастаўлены помнік свяціцелю знаходзіцца не на плошчы, на вуліцы Карла Маркса. 

Куды больш гэтая назва пасавала б для трапецападобнай плошчы насупраць архіепіскапскага палаца, створанай па прыкладзе плошчы Капітолія ў Рыме, бо палац і комплекс увогуле з’явіўся па заказе Каніскага.

Што тычыцца плошчы Арджанікідзэ, то ўжо не першы раз прапануецца адраджаць у назвах плошчаў і сквераў гістарычную тапаніміку Магілёва. Гэты квартал паміж вуліцамі Болдзіна і Камсамольскай узнік толькі дзякуючы таму, што было знесена другое кола ўмацаванняў горада – Блізкі вал. Прапануем так і назваць плошчу – плошча Блізкі Вал. Для прыкладу ў Мінску ёсць вуліца Гарадскі Вал, а таксама плошча Стары Аэрапорт, якія адлюстроўваюць розныя гістарычныя аб’екты, што сёння ўжо цалкам зніклі з гарадской прасторы.”

Петыцыя была створаная 27 верасня. Збор подпісаў пад ёй будзе праходзіць да 4 кастрычніка.

Фота: mogilev.media

Крык душы ў лесе пад Магілёвам

Навіна ад

Забаўную таблічку заўважылі ў лясным масіве каля вёскі Галынец Магілёўскага раёна карыстальнікі соцсетак. 

Фота: Анатоль Прасаловіч

Зніклую дзяўчынку і жанчыну, што яе суправаджала, знайшлі

Навіна ад

Валанцёрскі пошукавы атрад “Фенікс”, які абвяшчаў пра пошук чатырохгадовай Ксеніі Шэмель і 51-гадовай Алены Вядзяжкінай, заявіў сёння раніцай, што яны знайшліся.

“Алена Іванаўна і Ксенія былі знойдзены падчас сумесных пошукаў, у якіх бралі ўдзел валанцёры пошукава-выратавальнага атрада “Фенікс”, сваякі зніклых, супрацоўнікі Кастрычніцкага РАУС г. Магілёва, валанцёры пошукава-выратавальнага атрада “Пульс” і добраахвотнікі” – гаворыцца ў паведамленні.

Фота: Атрад “Фенікс”

Наперадзе апошнія цёплыя выходныя – прагноз

Навіна ад

Пятніца і субота парадуюць жыхароў Магілёўскага рэгіёна цеплынёй і камфортным надвор’ем без дажджоў. А ўжо пачынаючы з нядзелі – сапраўдная восень.

Сёння днём паветра на Магілёўшчыне прагрэецца да +24 градусаў. Будзе воблачна, але ападкаў не прагназуецца. Заўтра, у суботу 30 верасня чакаецца таксама цёплае і нават спякотнае надвор’е. Ноччу +12 +13°С, днём да +25. Без ападкаў.

У нядзелю 1 кастрычніка днём надвор’е будуць вызначаць няўстойлівыя прахалодныя паветраныя масы, якія паступаюць з Балтыйскага мора. Уначы чакаюцца кароткачасовыя дажджы, слабы туман. Тэмпература паветра мінімальная ноччу +4 +11°С, максімальная днём +13 +20°С – паведамляе Белгідрамет.

Чакаецца, што пасля гэтых выходных восень уступіць у свае правы. Тэмпература паветра днём на наступным тыдні не будзе перавышаць +19°С, будзе воблачна, з туманамі і дажджамі. Прыблізна такое ж надвор’е прагназуецца на ўвесь кастрычнік.

Фота: mogilev.media

Чатырохгадовая дзяўчынка і яе няня прапалі ў Магілёве, аб’яўлены пошук

Навіна ад

Пошукава-выратавальны атрад “Фенікс” абвясціў у тэрміновы вышук Ксенію Шэмель 2019 года нараджэння і 51-гадовую Алену Вядзяжкіну, што яе суправаджала. Дзяўчынка з няняй зніклі днём 28 верасня з дома па бульвары Непакораных і ў той жа вечар іх абвясцілі ў вышук. Верагодна, могуць знаходзіцца непадалёк ад Буйніч. 

Пры наяўнасці інфармацыі пра зніклых, атрад “Фенікс” просіць звяртацца па тэлефоне +375(29)222-10-19 (Viber, WhatsApp, Telegram), альбо 102.

Фота: ПВА “Фенікс”

Перакрыццё вуліцы Чалюскінцаў у Магілёве працягнулі яшчэ на адзін месяц

Навіна ад

Рух транспарту па пуцеправодзе праз вуліцу Завадскую і па вуліцы Чалюскінцаў будзе перакрыты да 30 кастрычніка. Гэта звязана з правядзеннем рэканструкцыі пуцеправода, паведамілі рэсурсу mycity.by ў Магілёўскім гарвыканкаме.

Нагадаем, што рух па вуліцы Чалюскінцаў перакрылі 10 верасня. Меркавалася, што рамонтныя работы будуць завершаныя да канца месяца.

Фота: mogilev.media

У Магілёве ў верасні пабачылі цвіценне рэйнутрыі – прыгожай і надзвычай небяспечнай азіяцкай расліны

Навіна ад

Карыстальнікі сацыяльных сетак абмяркоўваюць цвіценне ў Магілёве кветак рэйнутрыі. “Вельмі прыгожая і дэкаратыўная расліна. – каментуюць карыстальнікі – Але калі не даглядаць, то разрастаецца джунглямі.” Пікантнасці гэтаму назіранню дадае той факт, што расліна зацвіла ў абласным цэнтры ў самым канцы верасня.

Рэйнутрыя пры гэтым уваходзіць у спіс самых небяспечных інвазіўных відаў раслін. Яе радзіма – Японія, Кітай і Карэя. Пачынаючы з сярэдзіны ХІХ стагоддзя гэтую травяністую расліну (іншая назва – “японскі горац”) пачалі культываваць у еўрапейскіх садах, пасля чаго рэйнутрыя захапіла многія сады на нашым кантыненце. Ва Ўсходняй Еўропе яе распаўсюджванне стрымлівалася суровым кліматам, але цяпер, верагодна, павышэнне сярэдніх тэмператур паспрыяла пранікненню рэйнутрыі ў наш рэгіён.

Фота: сацыяльныя сеткі

У Магілёўскім раёне 18 чалавек кантактавалі з шалёным сабакам, яшчэ двух ён пакусаў

Навіна ад

У пачатку верасня магілёўскія эпідэміёлагі зафіксавалі выпадак кантакту людзей з хворым на шаленства хатнім сабакам, што не быў прывіты. У Магілёўскім раёне два чалавекі пацярпелі ад яго ўкусаў, а яшчэ 18 чалавек мелі з ім кантакт – гладзілі, лашчылі і кармілі, паведамляе прэс-служба абласнога Цэнтра гігіены і эпідэміялогіі.

Усе пацярпелыя былі шпіталізаваны, зараз ім праводзіцца курс антырабічных прышчэпак супраць шаленства. У сярэдзіне жніўня ў населеным пункце была заўважаная ліса, пазней побач з населеным пунктам быў знойдзе труп лісы, хворай на шаленства.

Фота ілюстрацыйнае