Адразу два чалавекі сталі ахвярамі пажараў у Клічаўскім раёне 21 кастрычніка. Раніцай каля 5 гадзін у вёсцы Дубна суседзі заўважылі агонь у хаце пенсіянера 1957 года нараджэння. Калі прыехалі ратавальнікі, мужчына ўжо не падаваў прыкмет жыцця. У вёсцы Усакіна таго ж Клічаўскага раёна позна вечарам, каля 24.00 на пажары загінуў пенсіянер 1958 года нараджэння – паведамляе прэс-служба МНС. Прычыны абодвух пажараў яшчэ высвятляюцца.
Фота: МНС
Жанчына згарэла зажыва ў Бабруйску ў сваёй кватэры на вуліцы Каменскага. Днём 13 кастрычніка муж пенсіянеркі 1958 года нараджэння калоў дровы ў двары іх гаспадаркі. Калі ён вярнуўся ў дом, то пабачыў сваю жонку, ахопленую полымем. На жанчыне загарэлася вопратка, калі яна стаяла каля кухоннай пліты. Мужчына пагасіў агонь і выклікаў хуткую дапамогу, але медыкі канстатавалі смерць жанчыны, паведамляе прэс-служба МНС.
Фота: МНС
У вёсцы Збышын Кіраўскага раёна былі шпіталізаваныя трое дзяцей – 2014, 2015 і 2017 гадоў нараджэння. Усе яны атруціліся ўгарным газам у выніку заўчаснага закрывання дымахода печкі – паведамляе прэс-служба МНС.
Фота ілюстрацыйнае
Жанчына не магла самастойна выбрацца з пажару, таму што ледзь рухалася з-за хваробы.
Выратаванне 74-гадовай пенсіянеркі стала для жанчыны сапраўдным цудам. Жыхарка Бабруйска пратаплівала печку ў сваёй кватэры ў аднапавярховым доме на вуліцы Бахарава. У нейкі момант яна заўважыла, што на пячы пачала загарацца мяккая цацка – плюшавы мішка. Пенсіянерка не прыдумала нічога лепшага, як выкінуць мішку ў калідор, на драўляную падлогу, а потым наогул забылася пра яго. Ад цацкі дом і загарэўся.
Калі праз нейкі час жанчына пабачыла, што яе калідор палае, выбрацца з дому самастойна было ўжо немагчыма. Агонь перакрыў выхад, акрамя таго жанчына толькі што перанесла хваробу і ледзь рухалася. Дазваніўшыся да ратавальнікаў, 74-гадовая бабруйчанка заставалася ў ахопленай агнём кватэры да свайго вызвалення. Машына пажарных была на месцы ўсяго праз некалькі хвілін – паведамляе прэс-служба МНС.
Фота: МНС
Надзвычайнае здарэнне адбылося вечарам 27 жніўня ў гаражным кааператыве “Аўтааматар” у Асіповічах. Два хлопчыкі 12 і 14 гадоў рамантавалі там веласіпед. Адзін з іх наліў бензін у пластыкавую бутэльку і чысціў ім тармазныя калодкі. Другі стаў гуляцца побач з газавым балонам і гарэлкай – паведамляе прэс-служба МНС. Адбыўся выбух і на хлопцах загарэлася вопратка. Каб пагасіць яе на сабе, падлеткі калаліся і круціліся па падлозе, выкаціліся на вуліцу, дзе ім дапамог сусед – загасіў полымя вадой і адвёз пацярпелых у лякарню.
Фота: МНС
Вечарам 21 жніўня тры падлеткі ў Горацкім раёне каля вёскі Вялікая Каралёўка гуляліся, падпальваючы петарды – паведамляе прэс-служба МНС. Калі запалкі ў іх сталі заканчвацца, дзеці вырашылі развесці касцёр, каб захаваць агонь. Касцёр яны развялі якраз каля скірды з саломай, у якой ляжала 20 тон рулонаў. Неўзабаве агонь перакінуўся на салому, яна ўспыхнула, а дзеці спалохаліся і ўцяклі. Дзядуля аднаго з хлопцаў і выклікаў пажарных, якія змаглі выратаваць толькі палову скірды.
Фота, відэа: МНС
Ратавальнікі адшукалі ў лесе пад Асіповічамі 61-гадовую пенсіянерку. Жанчына збірала чарніцы недалёка ад вёскі Татарка, але самастойна выйсці з лесу ўжо не змагла. Каля 12 гадзіны ночы яна патэлефанавала ў МНС і паведаміла, што знаходзіцца каля чыгункі, бачыць семафоры, але сама выйсці з лесу не можа – выбілася з сілаў. Неўзабаве сувязь з ёй знікла. Ратавальнікі знайшлі жанчыну ў трох з паловай кіламетрах ад вёскі Татарка Асіповіцкага раёна – паведамляе прэс-служба МНС.
Фота: МНС
Дзве бабруйчанкі, маці і дачка, адправіліся за грыбамі ў лясны масіў у Асіповіцкім раёне днём 10 жніўня. Неўзабаве дачка 1987 года нараджэння адарвалася ад маці і зразумела, што заблукала. Яна патэлефанавала маці, а тая выклікала ратавальнікаў, якія даволі хутка змаглі выявіць месцазнаходжанне жанчыны з дапамогай праграмы GPS extremum.
Бабруйчанку, што заблукала ў лесе, знайшлі каля 18:00 у двух кіламетрах ад вёскі Бродзішча Асіповіцкага раёна. Жанчыну апанавала паніка, у яе пачаўся сутаргавы сіндром. Яна была шпіталізаваная на карэце “хуткай дапамогі” – паведамляе прэс-служба МНС.
Фота: МНС
Пажылыя муж і жонка адправіліся па грыбы яшчэ днём 6 жніўня. Калі пад вечар яны так і не вярнуліся дадому, трывогу забіў іх дарослы сын. Каля 21:00 ён выклікаў супрацоўнікаў МНС. Пошукі працягваліся да глыбокай ночы. Нягледзячы на тое, што ў грыбнікоў былі з сабой уключаны тэлефон, і добра працавала мабільная сувязь, ратавальнікі на трох адзінках тэхнікі доўга не маглі вызначыць месцазнаходжанне пары. Сітуацыю выратавала тое, што грыбнікі выйшлі на квартальны слупок у лесе, пасля чаго знайсці іх у начным лесе стала справай тэхнікі.
Фота: МНС
На дзіцячай пляцоўцы па завулку Тухачэўскага ў Бабруйску днём 4 жніўня здарыўся пажар. Як паведамляе прэс-служба МНС, відавочцы заўважылі, як успыхнуў лялечны домік на пляцоўцы, а незадоўга адтуль разбегліся дзеці. Верагодна, іх гульні з запалкамі прывялі да ўзгарання, і толькі дзівам малыя пазбеглі апёкаў, альбо больш трагічных наступстваў.
Фота: МНС
