Днём на адкрытай пляцоўцы крычаўскага камунальнага прадпрыемства па вуліцы Камсамольскай у Крычаве адбылося ўзгаранне штабеля круглага лесу вышынёй 2-4 метра.
У выніку пажару знішчаны 300 кубаметраў лесу на плошчы 200 квадратных метраў. Пры гэтым ратавальнікамі і камунальшчыкамі выратаваны яшчэ 1200 кубаметраў лесу. Ніхто не пацярпеў, прычына пажару высвятляецца – паведамляецца ў аператыўнай зводцы міністэрства па надзвычайных сітуацыях.
Варта заўважыць, што гэта ўжо другое ўзгаранне кубоў лесу на Крычаўшчыне за апошні час. Аб папярэднім выпадку пажару лесу раней пісалі mogilev.media.
Фота ілюстрацыйнае
Category: Навіны Крычава
“Хуліганы мы!” – знішчэнне маслазавода ў Крычаве адлюстравалі ў трапным графіці
Графіці “Хуліганы мы!” з’явілася на бетоннай агароджы былога прадпрыемства. Цяпер будынкі маслазавода цалкам знішчаны, пра што раней пісалі mogilev.media.
Зробленае графіці вельмі трапна характарызуе ўчынак крычаўскага кіраўніцтва, бо прамысловыя памяшканні маслазавода знаходзіліся ў добрым стане, нікому не заміналі і маглі б выкарыстоўвацца іншымі дзяржаўнымі прадпрыемствамі ці прыватнымі арганізацыямі, але цяпер там проста голая пляцоўка з горкамі пяску.
Фота: mogilev.media
Крычаўскі народны майстар адраджае традыцыі беларускай выцінанкі
Крычаўлянка Наталля Бярнадская стварае папяровыя ручнікі, а яе выцінанкі ўключаны ў народную спадчыну Беларусі.
Цікавасць да народнай творчасці Наталлю Мікалаеўну ў свой час прывяла ў дзіцячую школу мастацтваў Крычава, а пасля была вучоба ў Магілёўскім вучылішча культуры на аддзяленні дэкаратыўна-прыкладнога мастацтва. Атрыманыя навыкі майстар замацавала падчас вучобы ў Беларускім універсітэце культуры і мастацтваў.
З 2006 года Наталля Бярнацкая працуе настаўнікам у дзіцячай школе мастацтваў, дзе працуе з вучнямі, дзеліцца сваім вопытам з майстрамі Магілёўскай вобласці, праводзіць майстар-класы для жыхароў Крычаўшчыны.
За час сваёй працы на малой радзіме Наталля Бярнадская стала членам “Беларускага саюза мастакоў”, міжнароднага клуба “Папяровыя традыцыі”, атрымала званне народнага майстра і яе выцінанкі ўвайшлі ў спіс элементаў народнай спадчыны Беларусі. Дарэчы, па ўсёй Беларусі толькі адзінаццаць выцінаншчыкаў, што маюць званне народнага майстра. Каб атрымаць такі статус, трэба прытрымлівацца народных традыцый і перадаваць іх, ведаць тэхналогію выразання выцінанкі, яе гісторыю.
Як прызнаецца сама майстрыха, выцінанкай сур’ёзна займаецца ўжо дваццаць год. Крычаўскі народны майстар любіць выразаць рознакаляровую выцінанку, шматслаёвую і больш ажурную.
Яшчэ ў дзяцінстве Наталля ўсе канікулы праводзіла з дзядулям і бабуляй, якія жылі ў вёсцы Горкі ў 30 кіламетрах ад Крычава. Бабуля вучыла дзяўчынку ўсяму, што ўмела сама: вышываць, вязаць, выразаць. На стыль і творчасць крычаўскай выцінаншчыцы паўплывала ўменне яе бабулі добра ткаць ручнікі і вышываць іх ніткамі, вобразы якіх Наталля ўвасабляе ў папяровым варыянце. Яшчэ дзіцём будучы народны майстар назірала за бабуляй, стараючыся паўтарыць на паперы арнамент, які тая вышывала на ручніку. Да сённяшняга дня Наталля Бярнадская захоўвае саматканы ручнік і абрус з вышытымі па краях узорамі, якія належалі яе бабулі, як самы дарагі ўспамін дзяцінства.
Ёсць у крычаўскай майстрыхі і невялікая калекцыя выцінанак. Самыя прыгожыя ў ёй – працы кітайскіх і літоўскіх майстроў, якія ўдалося прыдбаць Наталлі на міжнародных форумах народных творцаў.
Нагадаем, што мастацтва выцінанкі стала папулярным на тэрыторыі Беларусі ў канцы XIX – пачатку XX стагоддзя, як спосаб упрыгожвання жылля і было адноўлена як від дэкаратыўна-прыкладнога мастацтва ў канцы XX стагоддзя.
Фота :“Крычаўскае жыццё”.
Вось такія люкі ў цэнтры Крычава – фота
Адзін такі арыгінальны каналізацыйны люк знаходзіцца амаль на плошчы Леніна, побач з праваслаўнай Свята-Уваскрасенскай царквой. Вакол яго праваліўся асфальт, у дзіркі засунута галлё. Прычым люк не агароджаны і, натуральна, небяспечны для пешаходаў, бо пад нагамі ў любы час можа адваліцца яшчэ кавалак асфальту.
Іншы каналізацыйны люк хоць і агароджаны, але таксама небяспечны, бо зямля вакол яго асыпалася, а сам ён моцна нахіліўся. Люк, які абваліўся, знаходзіцца каля дарогі і побач з дамамі прыватнага сектару на ўзбочыне цэнтральнай вуліцы Камсамольскай.
Фота: mogilev media
У Крычаве пачалося будаўніцтва новай паліклінікі
Паблізу крычаўскай цэнтральнай раённай бальніцы пачалі рыхтаваць пляцоўку для будаўніцтва новай гарадской паліклінікі.
Побач з раённай бальніцай Крычава з’явілася будаўнічая тэхніка і пачаўся падрыхтоўчы этап шэрагу прац па будаўніцтву паліклінікі. Згодна праекту новая паліклініка будзе чатырохпавярховай, з цокальным паверхам, які злучыцца з ужо дзеючым лячэбна-дыягнастычным корпусам.
Плануецца, што паліклініка будзе інтэграваная – гэта значыць, у ёй размесцяцца стаматалогія, дзіцячыя і дарослая паліклінікі, на першым паверсе – аддзяленне хуткай медыцынскай дапамогі і рэгістратуры – паведамляе пра новы медыцынскі аб’ект раённая газета “Крычаўскае жыццё”.
Новы будынак будзе абсталяваны двума ліфтамі. Паліклініка мусіць адпавядаць усім санітарна-гігіенічным патрабаванням, пагэтаму інфекцыйны і туберкулёзны кабінеты будуць з асобнымі ўваходамі. Будучы медыцынскі цэнтр будзе абсталяваны сучасным абсталяваннем, што падаможа палепшыць якасць медыцынскага абслугоўвання.
Завяршыць будаўніцтва крычаўскай паліклінікі плануюць у 2024 годзе.
Фота: “Крычаўскае жыццё”
Вось як выглядае рачулка ў цэнтры Крычава – фота
Горы смецця, цвіль і нават жалезная бочка – у што ператварылі жыхары горада і камунальныя службы рэчку Крычаўку, даліна якой магла б стаць жывапісным месцам у сэрцы горада.
Невялічкая рачулка Крычаўка з’яўляецца правым прытокам галоўнай воднай артэрыі Крычава – рэчкі Сож. Яе даўжыня больш за пяць кіламетраў і збольшага рачулка цячэ ў межах горада.
Калі рэчка перацякае праз тунэль у старую частку горада, то яе акваторыя становіцца вельмі забруджанай. Неахайнасць людзей праявілася ў тым, што ў Крычаўку скідваюць рознае смецце: гумавыя рэчы, пластыкавыя і шкляныя бутэлькі, упакоўку ад розных відаў ежы і мноства металічных адходаў – ад накрывак слоікаў да цэлай жалезнай бочкі.
Камунальныя службы Крычава не заўважаюць праблем малой рэчкі, якая прыгожа цячэ па гарадской прасторы і ўрэшце ўпадае ў Сож. Хараство малой рэчкі губляецца за гарамі смецця і людской абыякавасці да наваколля.
Адзначым, што рэчка Крычаўка мае гістарычнае значэнне, на яе левым беразе размешчана старадаўняе гарадзішча пад назвай Гарадзец або Цвінтар. Назва правага прытока Сожа паходзіць ад наймення горада, хоць, што першае было названа – рака ці паселішча, цяпер ужо ніхто не скажа.
Фота: mogilev.media
У Крычаве з’явілася разметка для веласіпедыстаў і першая таблічка для сляпых
Новая аптэка № 160 пятай катэгорыі Магілёўскага ўнітарнага прадпрыемства “Фармацыя” нядаўна адкрылася ў Крычаве. Яна размешчана вельмі зручна – побач з аўтавакзалам і рынкам. Знаходзіцца аптэка на першым паверсе двухпавярховага цаглянага будынка.
Пры ўваходзе ў фармацэўтычную краму размешчана таблічка з графікам работы і найменнем аптэкі, на якой пазначана інфармацыя таксама на шрыфце Брайля – рэльефна-кропкавы тактыльны шрыфт, прызначаны для чытання невідушчымі і людзьмі, якія дрэнна бачаць.
У некаторых частках горада таксама з’явілася разметка на ходніках для раварыстаў, аднак пакуль такіх участкаў мала, каб казаць пра нейкую тэндэнцыю. Адзначым, што часцей ўладальнікі ровараў ездзяць у Крычаве па ўзбочыне праезджай часткі, пагэтаму пытаннне веласіпеднай зоны ў горадзе актуальна.
Фота: mogilev.media
Забаўляльны комплекс з васковымі фігурамі Пуціна і Сталіна зноўку з’явіўся ў Крычаве
У кастрычніку мінулага года перасоўны атракцыён ужо з’яўляўся ў мясцовым парку Перамогі, пра што пісалі mogilev.media. І вось цяпер забаўляльны комплекс на тэрыторыю цэнтральнага парка прыехаў зноў. У горадзе ён будзе знаходзіцца ўвесь травень, але як і ў мінулы раз ажыятажу сярод крычаўлянаў атракцыён не выклікае.
Нагадаем, што забаўляльны комплекс прывезены з Расіі і ўключае ў сябе выставу васкавых фігур, розныя дзіцячыя каруселі: машынкі, якімі можна кіраваць, слонікі, на якіх можна пакатацца.
Асабліва прыцягвае ўвагу выстава васкавых фігур пад назвай «Империя» з выявай двухгаловага расійскага арла. На ёй сярод іншых прадстаўлены Сталін, Пуцін.
Фота: mogilev.media
Палавіна вокнаў выбіта, побач смецце – што адбываецца з былым будынкам музея ў Крычаве
Цагляны будынак былога музея, які знаходзіцца ў цэнтры горада, стаіць зачынены, з пабітымі шыбамі, побач сметнік.
Некалькі дзясяткаў год экспазіцыя Крычаўскага краязнаўчага музея размяшчалася ў цагляным будынку П-падобнай формы, што знаходзіцца недалёка ад былой рынкавай плошчы (на сённяшні дзень плошчы Леніна).
Менавіта тут яшчэ пры першым дырэктары музея, славутым крычаўскім краязнаўцы Міхаіле Мельнікаве, доўгія гады функцыянаваў музей.
У гэтым адносна вялікім па плошчы будынку да 2008 года знаходзілася музейная экспазіцыя, пакуль не пераехала ў палац Пацёмкіна-Галынскіх. Пасля гэтай падзеі былы будынак музея пачаў проста пуставаць. У пачатку 2010-х гадоў у паветры лунала ідэя стварэння ў ім Дома рамёстваў, аднак размовы так і не матэрыялізаваліся ў канкрэтныя дзеянні. Вясной 2021 года мясцовыя ўлады прадалі будынак у прыватныя рукі. Але і гэта яго не ўратавала.
Знешне пабудова выглядае няблага, не ўлічваючы вялікія шчыліны на сценах. Аднак побач з былым музеем ужо можна ўбачыць стыхійны сметнік.
Не менш непрыемна ўражваюць пабітыя вокны будынка былога музея. Прычым пабіта добрая палова шыбаў, хоць жалезныя краты на вокнах абараняюць дом ад зламыснікаў.
Фота: mogilev.media
Пад Крычавам адзін дарожны знак ператварылі ў святыню, а другі зрынулі з дарогі – фота
Каля вёскі Прудок вяляецца дарожны знак на абочыне дарогі, якая вядзе з паселішча на цэнтральную трасу. Знак абазначае перакрыжаванне з другараднай дарогай, што вядзе да Чорнага возера – месца адпачынку і рыбалкі крычаўлянаў.
У пары сотнях метраў ад яго знаходзіцца знак паркоўкі, размешчаны насупраць помніка ахвярам фашызма побач з Прудком. Гэты знак кімсьці быў ператвораны ў святыню – на яго павязалі ручнік і прымацавалі абразок Ісуса Хрыста. Прычым знак знаходзіцца побач са сметніцай, што надае парадаксальны выгляд агульнай карціне. Ёсць верагоднасць, што на гэтым месцы адбыўся нейкі няшчасны выпадак, чым можа тлумачыцца з’яўлення абразка з ручніком.
Фота: mogilev.media