Уборачная кампанія на Магілёўшчыне ідзе поўным ходам – у справаздачах УУС расце колькасць крымінальных спраў у аграпрамысловым комплексе.
Паводле звестак ведамства, з пачатку жніва ў дачыненні да работнікаў і службовых асоб прадпрыемстваў АПК ужо ўзбуджана дзесяць крымінальных спраў – ад хабарніцтва да крадзяжоў паліва, камбікорму і запасных частак да сельскагаспадарчай тэхнікі.
Класічны прыклад – Клічаўскі раён. Кіроўца аднаго з мясцовых сельскагаспадарчых прадпрыемстваў вынес з працы больш за 420 літраў афарбаванага дызельнага паліва і запасныя часткі – усяго амаль на чатыры тысячы рублёў.
У Кіраўскім раёне 44-гадовы жывёлавод аднаго з мясцовых гаспадарак на працягу месяца выпісваў кармы «з запасам»: паводле справаздачных дакументаў атрымліваў адну колькасць, а фактычна – істотна больш. Лішкі ішлі на кармленне ўласнай жывёлы і на продаж знаёмым. Падчас ператрусу ў яго дома супрацоўнікі міліцыі знайшлі і канфіскавалі больш за 500 кілаграмаў кармавых сумесяў.
У Чавускім раёне «згубіліся» 117 тон калійных угнаенняў на суму больш за 38 тысяч рублёў: угнаенні захоўваліся з парушэннем патрабаванняў і ўвогуле не былі ўлічаны ў бухгалтарскім уліку.
Пасля ўмяшання міліцыі груз нарэшце паставілі на ўлік і перадалі гаспадарцы – відаць, каб было што скрасці ў наступным сезоне.
У сухой рэшце лічбы за справаздачны перыяд выглядаюць так:
- 264 маніторынгавыя рэйды;
- больш за 30 фактаў дробных крадзяжоў таварна-матэрыяльных каштоўнасцей і афарбаванага паліва;
- з ценявога абароту вярнулі ў сельскагаспадарчыя арганізацыі каля тоны камбікорму, больш за 800 літраў гаруча-змазачных матэрыялаў.
Схема, па вялікім рахунку, трыццацігадовай, а то і савецкай даўніны: частка ўраджаю ідзе ў засекі дзяржавы, частка – у хлеў суседа.
І пакуль чыноўнікі справаздачацца пра рэкордныя намалоты, міліцыя справаздачыцца пра рэкордныя крадзяжы і татальную безгаспадарчасць.
Фота: скрыншот відэа тэлеграм-канала «Міліцыя Магілёўшчыны».