На пасяджэнні Крычаўскага райвыканкама падвялі вынікі працы жывёлагадоўлі за першае паўгоддзе 2026 года. За сталом побач са старшынёй райвыканкама Аляксеем Шараем, начальнікамі ўпраўленняў і кіраўнікамі гаспадарак сядзеў чалавек, чыя прысутнасць на размове пра надоі кажа больш, чым самі лічбы, – памочнік пракурора Крысціна Дзямешка.
Для Крычаўшчыны гэта не навіна. Яшчэ ў жніўні 2025 года на базе КСУП «Маляцічы-АГРА» кіраўніцтва раёна збірала механізатараў і кіроўцаў на «мерапрыемства прафілактычнага характару» – так гэта назваў сам райвыканкам. Тады кампанію Шараю складаў намеснік начальніка РАУС. Праз адзінаццаць месяцаў усё паўтараецца, толькі сілавіка ў крэсле змяніў прадстаўнік пракуратуры. Карацей, усё сур’ёзна.
Але даклад намесніка начальніка ўпраўлення па сельскай гаспадарцы чытаецца як святочная справаздача:
- тэмп росту вытворчасці сельскагаспадарчай прадукцыі – 108,8% пры заданні 103,9%;
- валавы надой малака – 6660,3 тоны, або 104,9% да мінулага года. БРЖ – 951,8 тоны вырошчвання, 109,4% да 2025-га;
- пагалоўе вырасла за год на 1600 галоў – 13,6%.
Апошняя лічба патрабуе тлумачэнняў. Прырост статка на 13,6 працэнта за дванаццаць месяцаў – гэта не вынік узнаўлення. Ацёл нават у ідэальных гаспадарках не дае такога скачка. Яго можна растлумачыць:
- адміністрацыйнай перакідкай жывёл з іншых гаспадарак раёна, у тым ліку тых, што знаходзяцца пад пагрозай банкруцтва або рэарганізацыі;
- закупкай жывёлы ў іншых раёнах.
І фінальны акорд. Прырост пагалоўя за год – 13,6 працэнта. Прырост надою – 4,9 працэнта. Іншымі словамі, на адну галаву жывёлы прадукцыйнасць падае. І падае істотна. Ці заўважыла гэта памочнік пракурора?
Фота раённай газеты.