У Магілёўскай вобласці, как і па ўсёй краіне, актыўна вядзецца аднаўленне бомбасховішч, супрацьрадыяцыйных і абарончых укрыццяў.
Беларусь рыхтуецца схавацца
Дзеянні па інвентарызацыі, рамонце і мадэрнізацыі аб’ектаў грамадзянскай абароны ўлады тлумачаць неабходнасцю падтрымліваць ахоўныя збудаванні ў належным стане. Аднак маштаб работ, якія адначасова разгортваюцца ў розных рэгіёнах краіны, сведчыць пра значна больш сістэмны падыход.
Як высветлілі ў арганізацыі былых беларускіх сілавікоў “BelPol”, адным з найбольш паказальных стаў разгляд гэтага пытання на пасяджэнні камісіі па надзвычайных сітуацыях Магілёўскай вобласці ў чэрвені 2026 года. Паводле афіцыйных даных, у рэгіёне сёння налічваецца 276 аб’ектаў грамадзянскай абароны: 186 бомбасховішчаў, 85 супрацьрадыяцыйных укрыццяў і пяць абарончых укрыццяў.
Пры гэтым толькі 204 з іх прызнаныя гатовымі да прыёму людзей. Яшчэ 72 аб’екты знаходзяцца ў нездавальняючым стане. 34 збудаванні плануюць увогуле спісаць пасля завяршэння рэспубліканскай інвентарызацыі, а 38 павінны быць адноўлены. Пераважная большасць такіх аб’ектаў знаходзіцца ў Магілёве і Бабруйску.
Асаблівую ўвагу звяртае тое, што колькасць сховішчаў, прызнаных непрыдатнымі, раптоўна вырасла. У Магілёве іх стала 36 замест ранейшых 13, у Бабруйску — 12 замест васьмі. Наўрадці за некалькі месяцаў дзясяткі бомбасховішчаў паспелі прыйсці ў заняпад. Значна больш верагодна, што падчас новай праверкі чыноўнікі ўпершыню сур’ёзна заняліся іх рэальным станам, а не папяровай справаздачнасцю.
Вынікі гэтых праверак выглядаюць красамоўна. За некалькі месяцаў было выдадзена 66 прадпісанняў аб ліквідацыі парушэнняў, да адміністрацыйнай адказнасці прыцягнулі 11 службовых асоб, яшчэ 20 кіраўнікоў атрымалі прадстаўленні за неналежнае ўтрыманне сховішчаў. Адначасова паведамляецца, што толькі сёлета ўжо адноўлена 43 аб’екты грамадзянскай абароны.
Агульная тэндэнцыя
Працэсы, якія адбываюцца на Магілёўшчыне, цалкам супадаюць з тым, што можна назіраць па ўсёй Беларусі.
Дзяржаўныя закупкі сведчаць, што адначасова рыхтуюцца праекты мадэрнізацыі сховішчаў у будынках Нацыянальнага банка ў Мінску, на аб’ектах «Белтэлекама», ачышчальных збудаваннях у Брэсце, а таксама на шэрагу прамысловых прадпрыемстваў, у тым ліку ў Магілёве. Праводзяцца абследаванні тэхнічнага стану сховішчаў, распрацоўваецца праектная дакументацыя, выдзяляюцца сродкі на рамонт.
Інакш кажучы, гаворка ідзе ўжо не пра асобныя выпадкі, а пра агульнарэспубліканскую праграму аднаўлення сістэмы грамадзянскай абароны.
Расійская першапрычына
Само па сабе аднаўленне бомбасховішчаў яшчэ не азначае непазбежнай падрыхтоўкі да вайны. У многіх краінах падобныя работы лічацца элементам нацыянальнай бяспекі. Але беларускі кантэкст выглядае асаблівым.
З 2022 года Беларусь саўдзельнічае ў агрэсіўнай вайне супраць Украіны і значна паглыбіла ваеннае супрацоўніцтва з Расіяй. На тэрыторыі краіны рэгулярна праходзяць сумесныя вучэнні, пашыраецца ваенная інфраструктура, развіваецца сістэма тэрытарыяльнай абароны, узмацняецца мабілізацыйная падрыхтоўка.
На гэтым фоне масавая праверка і аднаўленне бомбасховішчаў выглядаюць лагічным працягам агульнай дзяржаўнай палітыкі. Улады відавочна імкнуцца аднавіць сістэму грамадзянскай абароны, якая дзесяцігоддзямі заставалася хутчэй фармальнасцю, чым рэальным элементам бяспекі.
Магілёўская вобласць у гэтым працэсе стала адным з рэгіёнаў, дзе маштаб работ ужо можна ацаніць па канкрэтных лічбах.
Фотаздымак: gorkiv.by