Пакуль улады рыхтуюцца адзначыць Дзень народнага адзінства «Магілёўсаюздрук» упрыгожвае кіёскі расійскай сімволікай

На тое, што расійская сімволіка ў кіёсках «Магілёўсаюздруку» вывешаная на самых бачных месцах звярнулі ўвагі чытачы Магілёў.media. Адна з чытачак у допісе адзначыла, што расійскія сцяжкі прадавалі ў кіёсках і раней, але іх пакідалі ў баку «ад вачэй пакупнікоў». Цяпер жа імі сталі ўпрыгожваць вітрыну.

«Ужо і збанкрутавалі, але чым гандлююць», – пракаментавала аўтарка фотаздымка з расійскай атрыбутыкай.

Кіёск з расійскай сімволікай у вітрыне стаіць на плошчы Арджанікідзэ.

Дзень народнага адзінства ідэолагі рэжыму Лукашэнкі прыдумалі ў адказ на масавыя пратэсты 2020 году. Упершыню яго адзначылі ў 2021 годзе. Яго святкаванне складалася з імпрэзаў дзяржаўных структураў і праўладных грамадскіх арганізацыяў. Сярод іншага яно ўключыла ў сябе правядзенне флэшмобаў з дзяржаўнай сімволікай.

У Магілёве ў 2021 годзе пляцоўку, дзе збіраліся годам раней пратэстоўцы, гарвыканкам назваў Плошчай адзінства. На ёй улады праводзяць дзяржаўныя мерапрыемствы.

Справу аб банкруцтве акцыянернага таварыства «Магілёўсаюздрук» цяпер разглядае Эканамічны суд Магілёўскай вобласці. Манапаліст продажу газетаў і іншай прадукцыі вінаваты крэдыторам 5 160 864,45 рублёў і супраць яго распачата 130 працэсаў прымусовага спагнання даўгоў.