Івана Юшкевіча, прадпрымальніка і старасту вёскі Продвіна, што пад Бабруйскам, нядаўна асудзілі за «садзейнічанне экстрэмісцкай дзейнасці».
Яшчэ пяць гадоў таму раённая прэса ўзносіла імя Івана Юшкевіча: «неабыякавы чалавек», «руплівы гаспадар», «лепшы стараста». 48-гадовы прадпрымальнік з Бабруйска кіраваў крамай электронікі xtreme.by і паралельна ажыўляў заняпалую вёску Продвіна, дзе з трохсот жыхароў засталося толькі каля дзясятка.
Як піша “Наша ніва”, Юшкевіч пераехаў туды ў 2013-м разам з сям’ёй. Ён арганізаваў вясковы фэст, аднавіў памятны крыж, добраўпарадкаваў тэрыторыю, чысціў калодзеж. Для землякоў ён стаў сімвалам адраджэння – нават стварыў TikTok-канал «Сельскі стараста». Яго сын Кірыл дапамагаў бацьку ў бізнэсе і зрабіў сайт для сямейнай крамы.
Аднак у траўні 2025 года яго сацсеткі раптоўна абарваліся. Нядаўна стала вядома, што Юшкевіча асудзілі па арт. 361-4 Крымінальнага кодэкса «садзейнічанне экстрэмісцкай дзейнасці». Прысуд не агучваецца, але маўчанне ў сетках і знікненне з публічнай прасторы амаль дакладна сведчаць: ён у калоніі.
Па ўсёй верагоднасці, ключавой стала «справа Гаюна». Гэта маніторынгавы праект, які збіраў інфармацыю пра вайсковыя перамяшчэнні ў Беларусі ў дапамогу ўкраінскім вайскоўцам. Telegram-акаўнт Івана быў прывязаны да беларускага нумара і тэхнічна неабаронены, таму стаў лёгкай здабычай для лукашыстаў. Каб «вылічыць» такога чалавека, сілавікам хапае некалькіх секунд.
Фотаздымак: старонка Івана Юшкевіча ў ВКонтакте