48 новых веласіпедаў перадало пасольства Германіі Магілёўскаму раённаму цэнтру сацыяльнага абслугоўвання насельніцтва. Агульная сума гуманітарнай дапамогі склала 16 тысяч рублёў. Акрама ровараў, немцы набылі для сацыяльнага цэнтра прылады для заняткаў скандынаўскай хадзьбой – піша “Прыдняпроўская ніва”.
– На тэрыторыі Магілёўскага раёна сёння працуюць 97 сацыяльных работнікаў, якія абслугоўваюць 520 непрацаздольных грамадзян. – расказала загадчык аддзялення сацыяльнай дапамогі Таццяна Сталярова – Сацыяльныя паслугі дома аказваюцца ў 96 населеных пунктах раёна, што складае 40% ад агульнай колькасці нашых вёсак і аграгарадкоў. Несумненна, купля новых сродкаў перамяшчэння дасць магчымасць павялічыць ахоп сацабслугоўваннем большай тэрыторыі раёна. Менш часу будзе патрачана на дарогу, больш – на дапамогу.
Цікава, што на ўручэнні сертыфікатаў на ровары і палкі для хадзьбы адсутнічалі прадстаўнікі пасольства Германіі. Дакументы сацыяльным работнікам уручыла намеснік старшыні Магілёўскага райвыканкама Ірына Курашова.
Фота: “Прыдняпроўская ніва”