Category: Навіны Асіповіч

Усплёск захворванняў на ВІЧ зафіксаваны ў Асіповіцкім раёне

Навіна ад

Усплёск захворванняў на ВІЧ зафіксаваны ў Асіповіцкім раёне

Сэкс без прэзерватыва вывеў жыхароў раёна ў лідары вобласці па захваральнасці на ВІЧ-інфекцыю. 

За 9 месяцаў гэтага года колькасць новых выпадкаў хваробы перавысіла сярэдні абласны паказчык у 3,7 раза, паведаміў раённы цэнтр гігіены і эпідэміялогіі.

Часцей за ўсё выпадкі ВІЧ-інфекцыі выяўляюцца ва ўзроставых групах старэйшых за 30 гадоў. За 9 месяцаў 2022 на ўзрост 31-50 гадоў прыпала 80,9% выпадкаў. У адным выпадку ў бягучым годзе перадача ВІЧ ажыццявілася вертыкальным шляхам (ад ВІЧ-інфіцыраванай жанчыны да дзіцяці). 

Амаль кожны дзень жыхары Асіповіч кантактуюць з хворымі на СНІД. 

Усяго за ўвесь перыяд назірання ў Асіповіцкім раёне (на пачатак кастрычніка 2022 г.) выяўлены 423 выпадкі ВІЧ-інфекцыі. Гэта зусім не мала. Атрымоўваеца, што кожны соты жыхар раёна хворы на гэтую небяспечную хваробу. А калі не лічыць дзяцей і пенсіянераў, то сярод працаздольных хворы ўжо кожны 40-вы. Выходзіць, што амаль кожны дзень, ці праз дзень у краме альбо на працы дарослыя жыхары раёна кантактуюць з хворымі і не ведаюць пра гэта.

Шляхі захворванняў.

Большасць людзей заразіліся ВІЧ пасля сэксу без прэзерватыва – гэта 88,2% усіх выпадкаў у раёне за 9 месяцаў 2022 года. Перавага палавога шляху перадачы ВІЧ-інфекцыі на працягу шэрагу апошніх гадоў сведчыць аб тым, што людзі або не ведаюць аб мерах прафілактыкі інфекцыі, або грэбуюць імі, мяркуючы, што ВІЧ-інфекцыя мае дачыненне толькі да пэўных груп насельніцтва, да якіх чалавек сябе не адносіць. 

Аднак сацыяльная структура асоб, выяўленых з ВІЧ (за 9 мес. 2022 г., непрацуючыя – 33,3%, працоўныя – 47,6%, служачыя – 14,3%, дзеці – 4,8%), паказвае, што прыналежнасць да той ці іншай сацыяльнай групы не гарантуе абарону ад заражэння гэтым захворваннем.

Безадказныя адносіны да свайго здароўя – гэта можа здарыцца з кім заўгодна, але не са мной, “сляпы” давер да партнёра і многія іншыя стэрэатыпы ў пытаннях ВІЧ/СНІД спрыяюць росту колькасці новых выпадкаў інфікавання ВІЧ сярод насельніцтва.

Маці траіх дзяцей з Асіповічаў стала “Міс Чароўнасцю” Беларусі

Навіна ад

Асіпаўчанка Вольга Астапоўская годна выступіла ў фінале нацыянальнага конкурсу “Прыгажосць Беларусі-2022” і заваявала сімпатыі глядачоў.

Конкурс прыгажосці “Краса Беларусі” сярод шматдзетных жанчын прайшоў другі раз і завяршыўся прыгожым фіналам 26 лістапада. Усяго ж за тытул змагаліся восем прыгажунь са сталіцы і столькі ж з рэгіёнаў. Кожная з 16 фіналістак мае досвед шматдзетнага мацярынства, добрыя вонкавыя дадзеныя, высокі інтэлект, адкрытасць, гатовасць да самапрэзентацыі.

Тым больш прыемна, што Вольга, якая з усіх удзельніц конкурсу прадстаўляла самы маленькі горад, доўгі час лідзіравала ў галасаванні гледачоў. Толькі ў апошнія гадзіны пальму першынства перахапіла віцяблянка Марыя Шандзюкова.

Як паведаміла газета “Асіповіцкі край”, Вольга – маці траіх дзяцей. Сын Даніла ў гэтым годзе чакае выпускныя экзамены, гарэзная модніца Віялета – умелая кулінарка, а маленькі Мікіта – улюбёнец сям’і, яму днямі споўнілася два гады. Быць шчаслівай шматдзетнай маці дапамагае кахаючы муж, які падтрымлівае яе ідэі.

Асіпаўчане лічаць, што “яна таленавітая, творчая і ўсебакова развітая жанчына, добрая маці, якая гарманічна спалучае ў сабе інтэлектуальныя дадзеныя з прыгажосцю і абаяннем.” Сярод карысных звычак Вольгі – спорт, які з катэгорыі хобі прывёў у прафесію фітнес-нутрыцыёлага. 

Сама яна кажа:

– Самарэалізацыя надзвычай важная для мяне. Шчыра радуюся, калі адчуваю сябе карыснай, дапамагаю людзям. Шалёна падабаецца бачыць вынікі працы: мая праграма дапамагае дзяўчынам і жанчынам разумець, кахаць, шанаваць сябе, выбудоўваць гарманічныя адносіны з партнёрам.

У конкурсе Вольга Астапоўская хацела паказаць, што “мама – выдатная жанчына, якая ў любым узросце і ў любой прафесіі можа заставацца жаноцкай”.  

Асіповічам – 150 гадоў

Навіна ад

17 лістапада 1872 года з’яўляецца афіцыйнай датай заснавання горада Асіповічы. Спачатку назву атрымала чыгуначная станцыя, у далейшым і горад.

ekskursii.by

Некаторыя цікавыя факты.

Горад узнік у сувязі з будаўніцтвам Лібава-Роменскай чыгункі.

Пачатковая гісторыя горада шмат у чым звязана з дзейнасцю братоў Дараганаў, у тым ліку Восіпа Дарагана ― начальніка ўпраўлення Рыга-Арлоўскай чыгункі, якія ў 1896 годзе пабудавалі чыгунку Асіповічы-Радуцічы-Старыя Дарогі (39 верст). У гонар апошняга станцыя Радуцічы перайменавана ў Дараганава. У мясцовым музеі дзейнічая экспазіцыя “Сям’я Дараганаў”.

museums.by

Горад размешчаны на левым беразе ракі Сіняя – правым прытоку Свіслачы

Знаходзіцца за 136 км ад Магілёва і за 93 км ад Мінска. Бліжэйшыя гарады: Старыя дарогі (37 км), Бабруйск (41 км), Глуск (42 км), Мар’іна Горка (44 км).

За 7 км ад горада на рацэ Свіслач створана Асіповіцкае вадасховішча пры будаўніцтве ГЭС (1953). Асіповіцкая ГЭС да 2000-х гадоў была самай магутнай у краіне.

nemiga.info

 Цэнтр раёна з ліпеня 1924 года. Горадам абвешчаны ў 1935 годзе.

Пасля будаўніцтва чыгункі Асіповічы-Раслаўль (1932) стаў чыгуначным вузлом.

Да вайны ў горадзе жыло амаль 14 000 чалавек.

Максімум насельніцтва 35 500 чалавек у Асіповічах было ў 2001 годзе. Зараз крыху менш за 30 000.

З 29 на 30 ліпеня 1943 года тут адбылася Супердыверсія ўсіх часоў. Падпольшчык-чыгуначнік-электраманцёр Фёдар Крыловіч (1916–1959) аднаасобна і самастойна двума мінамі знішчыў 4 эшалоны з танкамі, у тым ліку найноўшыміі «Тыгр», цыстэрнамі, 12 вагонаў харчавання, 5 паравозаў, вугальны кран, вугальны склад. Пачаўся моцны пажар, які паспрыяў уцёкам ваеннапалонных з мясцовага лагера. Крыловіч у 1949 годзе за гераічны ўчынак быў узнагароджаны ордэнам Леніна.

А. Салжаніцын даў апісанне Асіповічаў, праз якія некалі праязжаў, у «Архіпелаг ГУЛАГ».

Пабрацім балгарскага г. Траўна.

Асіповічы – горад чыгуначнікаў і вайскоўцаў. Горад – сталіца ракетных войск краіны. Тут месціцца 465-я ракетная брыгада, непадалёку дзейнічае вайсковы палігон.

Адным з горадаўтваральных прадпрыемстваў з’яўляецца ААТ “Асіповіцкі завод аўтамабільных агрэгатаў”. Ён выпускае запчасткі 3000 найменняў, а таксама лодкі металічныя “Марына”, “Свіслач”, “Русалка”, “Удача”, “Хваля”,  шклапластыкавыя “Хваля 4Д”, спартовыя лодкі і байдаркі.

Тут працуе адно з чатырох прадпрыемстваў у свеце па вытворчасці тазасцёгнавых пратэзаў – ЗАТ «Алтымед».

Другое ў Беларусі і вобласці прадпрыемтсва па вырабу чыгуначных грузавых вагонаў – Асіповіцкі завод транспартнага машынабудавання – былы СП СЗАТ «Асіповіцкі вагонабудаўнічы завод» (танк-кантэйнеры, таварныя, платформы для негабарыту).

Вытворцай усім вядомай прадукцыі – рубероіду – з’яўляецца ААТ «Дах».

На СП ТАА «БелГа» у свой час распрацавалі шакалад «Ідэал».

Каля горада знаходзіцца адно з трох у краіне газасховішчаў (360 млн. куб. м).

У горадзе  працуе ДЮСШ, з якой звязаны Залатыя прызёры (каноэ, веславанне) алімпіяды ў Пекіне (2008), сярэбраныя ў Лондане (2012) браты Аляксандр і Андрэй Багдановічы.

Да 2000-х гадоў у горадзе было больш за ўсё хворых на СНІД, наркаманію ў вобласці.

У горадзе ёсць Свята-Крыжаўзвіжанская царква (1826 года, перавезена ў горад з Замошша ў 1946), музей горада ў Доме афіцэраў, Музей ваеннай тэхнікі, помнік паравозу-“эмка” машыніста Чумакова, які загінуў у 1922 (устаноўлены ў 2002 годзе).

sobory.ru

Каля Асіповічаў знаходзіцца в. Вяззе. У ёй па вул. Багдановіча да канца ХХ стагоддзя стаяў дом, дзе юны М.Багдановіч адпачываў з маці. Дом знесены, а мемарыяльная дошка перанесена на суседні дом. У Вяззі Максім пачаў размаўляць на беларускай мове. Працуе музей М.Багдановіча ў мясцовай школе. Працуюць санаторый “Вязье”, Асіповіцкая ГЭС; рыбгас.

У Ялізава месціцца СЗАТ “Шклозавод “Ялізава”, у Татарцы  – торфапрадпрыемства, у Жорнаўцы –  доследна–паказальны лясгас.

Звычка расплачвацца праз банкаўскую картку прымусіла асіповіцкага прадпрымальніка дадаткова заплаціць 13 тысяч рублёў падаткаў

Навіна ад

Выдаткі перавысілі прыбыткі прадпрымальніка больш чым на 66 тысяч рублёў. 

Інспекцыя Міністэрства па падатках і зборах па Асіповіцкім раёне правяла камеральную праверку адпаведнасці расходаў даходам мясцовага індывідуальнага прадпрымальніка – паведамляе osipinfo.by.  Падставай для праверкі сталі звесткі аб перавышэнні яго расходаў на набыццё тавараў над сумамі выручкі ад продажу тавараў.

Па выніках праверкі ўстаноўлена, што прадпрымальнік папаўняў разліковы рахунак у значных памерах наяўнымі грашыма. Сума перавышэння расходаў над даходамі склала больш за 66 тысяч рублёў. У сувязі з гэтым быў вылічаны падаходны падатак у суме 13 300 рублёў, які прыйшлося тэрмінова заплаціць. 

Як бачна, тэхналогія следчых дзеянняў падаткавікоў вельмі простая. Яны звяраюць выдаткі з картак асобы з афіцыйным прыходам грашовых сродкаў, з якіх выплачаны падаткі і выплаты. Калі сумы адрозніваюцца, то чалавека выклікаюць у падатковую службу і прапануюць патлумачыць сітуацыю. 

Найчасцей грамадзяне ў тлумачэннях пішуць, што яны для зручнасці карыстання паклалі на сваю картку грошы сваякоў, напрыклад жонкі, або паклалі раней адкладзеныя на “чорны дзень” зберажэнні. У выпадку нязначнасці сум гэта часцей за ўсё задавальняе падаткавікоў. А вось калі сумы адрозніваюцца істотна, прыйдзецца раскашэліцца. 

Фота носіць ілюстрацыйны характар і ўзята з адкрытых крыніц

Падлетак згвалтаваў чатырнаццацігадовую дзяўчыну на вечарынцы школьнікаў у Асіповічах

Навіна ад

Кампанія школьнікаў адзначала заканчэнне вучэбнай чверці па-даросламу – з гарэлкай і півам. Бліжэй да ночы гаспадыня вечарынкі захмялела і заснула. Станам 14-гадовай аднакласніцы вырашыў скарыстацца 15-гадовы хлопец. Калі астатнія ўдзельнікі вечарыны выйшлі на перакур, ён, са словаў пацярпелай, пачаў яе гвалтаваць. Ахвяра хутка прыйшла ў прытомнасць і дала крыўдніку адпор. У выніку хлопца прагналі і выклікалі міліцыю.

На школьніка завялі крымінальную справу за згвалтаванне непаўналетняй, яму пагражае зняволенне як мінімум на пяць гадоў турмы. 

Статыстычна ўжыванне алкаголю і сэксуальныя адносіны маладых людзей з райцэнтраў пачынаюцца нават раней, чым у буйных гарадах. Здарэнне ў Асіповічах паказала, што задужа прагнае жаданне стаць дарослым можа скончыцца крымінальнай справай.  

 

Асіповічы: крадзяжы бычкоў, парушэнні правіл дарожнага руху, п’яныя пагулянкі па дарогах, незаконнае паляванне

Навіна ад

Будні раённай міліцыі – п’яныя пешаходы і веласіпедысты, нецвярозыя вадзіцелі, бяспраўнікі і крадзяжы. 

Пра сваю штодзённую працу міліцыянеры распавялі рэсурсу Асіповіцкі край. Прыкладам, толькі за мінулы тыдзень імі папярэджана 169 правапарушэнняў, а да адказнасці прыцягнуты 38 пешаходаў і веласіпедыстаў, два з якіх п’яныя; злоўлены пяць бяспраўнікаў і нецвярозы вадзіцель. Чатыры кіроўцы не прадставілі перавагу ў руху пешаходу, дзесяць чалавек парушылі правілы абгону і перавозкі дзяцей у аўтатранспарце.

Так, за 1 дзень падчас спецыяльнага мерапрыемства “Фільтр” спынена 33 парушэнні правіл дарожнага руху, у тым ліку два – правіл перавозкі дзяцей і па адным – правіл перасячэння чыгуначнага пераезду і парушэнне правіл службовай асобай. Апошняе цікава, бо аказваецца, што выяўленне парушэнняў чыноўнікаў фіксуецца асобна. 

Зарэгістравана восем дарожна-транспартных здарэнняў. Так, днём 28 кастрычніка ў вёсцы Жыцін пад коламі аўтамабіля Hyundai апынуўся пяцігадовы хлопчык, які, па папярэдніх даных, выбег на праезную частку з-за прыгараднага аўтобуса. Дзіця з цяжкімі траўмамі шпіталізавана. 

29 кастрычніка ў 6.50 на 98 кіламетры трасы Мінск-Гомель 35-гадовы жыхар Бабруйскага раёна, кіруючы аўтамабілем Toyota, наехаў на асіпаўчаніна, які перасякаў праезную частку дарогі ў неналежным месцы і не быў абазначаны святлоадбіваючымі элементамі. У выніку мужчына загінуў. 

Аддзелам Дэпартамента аховы выяўлены два факты дробнага крадзяжу. Таксама складзены адміністрацыйныя пратаколы за парушэнне правіл палявання і незаконную транспарціроўку драўніны.

А вось пракуратура Асіповіцкага раёна падобнай драбязой не займаецца. Яна ўзбудзіла крымінальную справу па падазрэнні загадчыцы таварнай фермы ў крадзяжы шляхам злоўжывання службовымі паўнамоцтвамі. 

Вось такая руцінная праца выпадае на долю асіповіцкіх і ўвогуле раённых міліцыянераў штотыднёва. 

Брудная вада ў Асіповічах будзе яшчэ некалькі месяцаў

Навіна ад

Пры гэтым жыхароў не папярэдзілі перад пачаткам тэхнічных работ, каб запасліся чыстай вадой.

Асіпаўчане ў кастрычніку часцяком скардзіліся на брудную ваду ў кранах іх дамоў. Аказалася, што прычына ў будаўніцтве станцыі абезжалезвання на водазаборы “Паўночны”. 

На мінулым тыдні, як паведаміла газета “Асіповіцкі край”, ад жыхароў дамоў на вуліцы Сумчанкі, Сташкевіча і вуліцы 60 гадоў Кастрычніка і суседніх завулкаў райцэнтра паступала шмат нараканняў на якасць пітной вады. Праблема з чыстай вадой у райцэнтры даўняя.

Запыт у мясцовы цэнтр гігіены і эпідэміялогіі выявіў, што 12 кастрычніка праверка водаправоднай сеткі паказала поўную адпаведнасць вады па мікрабіялагічных паказчыках. А па санітарна-хімічных толькі ў адной з дзесяці проб адзначалася павышанае ўтрыманне жалеза. 

Пасля ўрэзкі ў водаправодную сетку якасць пітной вады значна пагоршылася.

Але 13 кастрычніка пасля праведзенай Асіповіцкім участкам водаканальнай гаспадаркі філіяла “Бабруйскводаканал” урэзкі ў водаправодную сетку якасць пітной вады значна пагоршылася. Ваду нельга было выкарыстоўваць для прыгатавання ежы. Адзначалася яе павышаная каламутнасць. 

Па традыцыі насельніцтва не было папярэджана аб правядзенні работ у водаправоднай сістэме, таму не змагло запасціся чыстай.

Начальнік гарадскога ўчастка водаправодна-каналізацыйнай гаспадаркі Віктар Пышны апраўдваў сваіх работнікаў такім чынам: 

– Падчас пусканаладачных работ, якія ідуць на станцыі абезжалезвання на водазаборы “Паўночны”, правялі першую ўрэзку ў водаправодную сетку ў раёне перакрыжавання вуліц Юбілейнай і Сташкевіча. Без вады ніхто не застаўся, бо нашы работнікі перанакіравалі патокі, з адной трубы ў другую, але яе якасць у многіх дамах часова пагоршылася, таму што з-за перамены кірунку вады з унутранай паверхні труб сарвала пэўную колькасць адкладанняў. А паколькі ў гэтым месцы ідзе разгалінаванне па ўсіх напрамках, прадугледзець, дзе якасць вады пагоршыцца, і, адпаведна, папярэдзіць жыльцоў на прадпрыемстве не здолелі.

Далей горш

Аказалася, што дзеля таго, каб станцыя абезжалезвання ўступіла ў эксплуатацыю, прыйдзецца рабіць яшчэ ўрэзкі ў водаправодную сетку, так што раптоўнае пагаршэнне якасці вады верагодна і надалей, і ўжо ў новых частках горада. Да таго ж, пасля пуску аб’екта на працягу некалькіх месяцаў будзе праходзіць прамыўка труб, і толькі пасля яе завяршэння асіпаўчане нарэшце атрымаюць чыстую пітную ваду. 

 

Расійскія вайскоўцы занялі Асіповіцкі артылерыйскі палігон

Навіна ад

Беларускія ваенныя інструктары навучаюць ваяваць мабілізаваных на вайну расійскіх рэзервістаў пад Асіповічамі. Рэха выбухаў стала мясцовай штодзённасцю. 

Афіцыйна анансавана, што ў Беларусь на розныя палігоны ў бліжэйшы час прыбудуць 9 тысяч расійскіх салдат. Частка з іх размешчана на Магілёўшчыне.

Мясцовыя жыхары адзначаюць, што расіяне пачалі прыбываць у Асіповічы яшчэ да таго, як было афіцыйна абвешчана аб стварэнні “сумеснай групоўкі войскаў”. Сур’езных канфліктаў паміж расіянамі і беларусамі пакуль не назіраецца. Хаця любоў мабілізаваных ваяк да паходаў у харчовыя магазіны за так званымі “моцнымі” прадуктамі штодзённага ўжывання, асіпаўчане ўжо прыкмецілі.  А да кананады ад выбухаў тутэйшы люд ужо прызвычаіўся. 

“Сталіцай беларускай артылерыі” пафасна называе Асіповічы дзяржаўная прэса. У савецкія часы ў горадзе кватаравала артылерыйская дывізія. Цяпер жа ў ваенным гарадку Паўднёвы суседнічаюць 51-я гвардзейская артылерыйская брыгада, 336-я рэактыўная артылерыйская брыгада і 465-я ракетная брыгада. 

фота: sb.by

Не дзіўна, што на палігоне пад Асіповічамі вядзецца падрыхтоўка расійскіх артылерыстаў. 

 

Зварот жыхаркі Асіповіцкага раёна да Лукашэнкі набраў ужо больш за паўмільёны праглядаў

Навіна ад

З усіх названых ёй праблем удалося вырашыць толькі адну.

Як пісалі Магілёў.media, пачуўшы заклікі «аб малой радзіме і, што трэба падымаць сяло» мінчанка Ксенія Палаш з сям’ёй пераехалі ў Асіповіцкі раён, у вёску Коханаўка. Праз два гады спроб вырашыць актуальныя праблемы, яна запісала на сваім Youtube-канале відэазварот да Аляксандра Лукашэнкі з просьбай дапамогі. Галоўных праблем, якія назвала Ксенія Палаш, аказалася тры – іх сям’я не можа павялічыць зямельны ўчастак, у суседняй вёсцы зачыняецца дзіцячы садок, а таксама на гаспадарку немагчыма правесці высокахуткасны інтэрнэт.

Ролік Ксеніі Палаш ужо набраў каля 550 тысяч праглядаў, пра турботы сям’і паведамілі шматлікія беларускія СМІ, у тым ліку абласное тэлебачанне.

Днямі Ксенія запісала новы відэаролік, у якім агучыла афіцыйны адказ на яе зварот, што прыйшоў з магілёўскага аблвыканкама. Высветлілася, што праблема з атрыманнем яшчэ аднаго зямельнага надзела не была вырашана па віне аднаго з супрацоўнікаў “Магілёўгіпразема”, які ўжо атрымаў за гэта вымову. Цяпер сям’я Палашаў мае магчымасць павялічыць свае ўладанні што і было неабходна ім дзеля ўстойлівага развіцця гаспадаркі.

Іншыя праблемы, аднак, аказаліся невырашальнымі. Падвядзенне высокахуткаснага інтэрнэту ад “Белтэлекам” у вёску Коханаўка магчыма толькі ў вельмі далёкай перспектыве. Зараз прадпрыемства праводзіць аптавалаконныя лініі толькі да населеных пунктаў, дзе зарэгістравана больш за 100 жыхароў. Як праходзіць рэалізацыя гэтай праграмы, можна пабачыць тут, дарэчы. Пасля завяршэння гэтага працэсу, будуць падключаць вёскі з колькасцю жыхароў 50+. У Коханаўцы жыве ўсяго каля дзесяці чалавек. Падключэнне ж аднаго толькі дому Палашаў каштавала б “Белтэлекаму” 28 000 рублёў. Таму сям’і даводзіцца задавальняцца нестабільным мабільным інтэрнэтам і надалей.

У сваіх каментарыях да відэаролікаў Ксенія Палаш тлумачыць, што іх сям’я падключылася да паслуг інтэрнэт-перадачы ўсіх трох мабільных аператараў Беларусі, але якасць трансляцыі ні ў аднаго з іх не дазваляе выкарыстоўваць сістэму “Разумны дом”. 

Што ж да праблем з дзіцячым садком і транспартам да яго, адказ абласнога чынавенства зафіксаваў факт ліквідацыі дзіцячага садка ў суседнім паселішчы і канстатацыю, што перыядычнасць транспарту, што ходзіць да вёскі, здавальняючая.

П’яны кіроўца збіў чалавека пад Асіповічамі і не спыніўся

Навіна ад

На трасе Мінск – Гомель у Асіповіцкім раёне кіроўца грузавога мікрааўтобуса збіў чалавека на ўзбочыне – паведамляе Тэлеграм-канал прэс-службы Магілёўскага УУС. Пасля гэтага ён, не спыняючыся, працягваў рух. Неўзабаве кіроўца быў затрыманы каля адной з крам у Асіповічах. Яго аўтамабіль меў сляды дарожна-транспартнага здарэння  Сам кіроўца аказаўся нецвярозым – аналіз паказаў 1,8 праміле алкаголя ў выдыхаемым паветры. 

Збітым чалавекам аказаўся 28-гадовы мінчанін, які знаходзіўся каля свайго няспраўнага аўтамабіля BMW. З нязначнымі траўмамі ён быў адпушчаны медыкамі пасля агляду. Здарэнне адбылося ў цёмны час сутак – каля 20:00.

Кіроўцу грузавіка цяпер чакае пазбаўленне правоў, буйны штраф, а яго дзеянням будзе давацца прававая ацэнка.