Супрацоўнікі крымінальнага вышуку Магілёўшчыны спаборнічалі ў аратарскім майстэрстве

У Магілёве выбралі лепшых аператыўнікаў  вобласці. Спаборніцтвы прайшлі ў некалькі этапаў адзін з якіх – здольнасці прамоўцы.

Другі этап рэспубліканскага агляду-конкурсу прафесійнага майстэрства прайшоў у Магілёве. Яго мэта – вызначыць лепшых супрацоўнікаў крымінальнага вышуку вобласці.

Міліцыянты дэманстравалі агнявую падрыхтоўку, мадэлявалі працу на месцы злачынства, збіралі рэчавыя доказы і нават спрабавалі ясна і пераканаўча выкладаць свае думкі.

Невядома, хто з аператыўнікаў стаў лепшым спадчыннікам Цыцэрона, але больш за ўсё ачкоў набраў супрацоўнік крымінальнага вышуку з Чэрыкава. 

Другое і трэцяе месцы – ў сышчыкаў з Бялыніч і Кіраўска.

Фота: “Магілёўскія ведамасці”.

У Бабруйску выкрылі махляроў і злавілі серыйную зладзейку

У Бабруйску супрацоўнікі міліцыі раскрылі адразу дзве крымінальныя справы: махлярства з бюджэтнымі сродкамі і серыйныя крадзяжы. У выніку — фігуранты затрыманы, заведзены крымінальныя справы.

Супрацоўнікі аддзела па барацьбе з эканамічнымі злачынствамі УУС Бабруйскага гарвыканкама выкрылі групу з трох чалавек, якія махлярскім шляхам завалодалі грашыма дзяржаўнай арганізацыі, паведамляюць “Магілёўскія ведамасці”.

Устаноўлена, што падазраваныя пад выглядам закупкі матэрыяльна-тэхнічных каштоўнасцяў аформілі накладную на неіснуючы тавар. Атрыманыя сродкі яны перавялі ў гатоўку і патрацілі на ўласныя патрэбы.

Мяркуючы па гэтых апісаннях, махляры былі чыноўнікамі, або скарысталіся халатнасцю чыноўнікаў.

У тым жа Бабруйску затрымалі 26-гадовую мясцовую жыхарку, якую падазраюць у серыі крадзяжоў, паведамляецца на сайце УУС Магілёўскага аблвыканкама.

Высветлілася, што дзяўчына дзейнічала некалькімі спосабамі: у некаторых выпадках яна забірала наяўнасць з незачыненых кабінетаў, дастаючы яе з жаночых сумак. Акрамя таго, яна неаднаразова падбірала ключы да шафак у распранальні спартыўнага комплексу, пасля чаго забірала чужыя рэчы. Агульная сума скрадзенага склала больш за 1000 рублёў.

Фота ілюстрацыйнага характару з адкрытых крыніц.