З 2025 года асуджаныя пенсіянеры будуць атрымліваць пенсіі не на асабісты рахунак, а на рахунак папраўчай установы – для пакрыцця выдаткаў на іх утрыманне. У той жа час зняволеныя, якія яшчэ не дасягнулі пенсійнага ўзросту, застаюцца «на бюджэце» дзяржавы. Такая сацыяльная матэматыка выклікае пытанні: хто каго ўтрымлівае і дзе справядлівасць?
Новыя правілы выплаты пенсій закранулі нават тых, хто знаходзіцца ў зняволенні. З 2025 года пенсіі асуджаных пенсіянераў будуць аўтаматычна пералічвацца ў калонію, а адміністрацыя будзе пакрываць за іх кошт выдаткі на ўтрыманне. Іншымі словамі, чалавек працаваў усё жыццё, зарабіў сабе пенсію – але калі трапіў у калонію, яго сродкі пойдуць не на яго патрэбы, а на бюджэт установы.
А вось тыя, хто не дасягнуў пенсійнага ўзросту і таксама адбывае пакаранне, сядзяць за дзяржаўны кошт – бясплатна. Іронія ў тым, што ў гэтай схеме пенсіянер, які ўжо зарабіў сабе на старасць, фактычна ўтрымлівае сістэму, а непенсіянер – сістэмай утрымліваецца.
Для Магілёўшчыны, дзе людзі ўсё яшчэ спадзяюцца на сумленную старасць, гэтая навіна выглядае як чарговы прыклад «сацыяльнай справядлівасці па-беларуску». У нашых вёсках пенсія – гэта жыццёвая нітачка, з якой купляюць лекі, дапамагаюць унукам і падтрымліваюць гаспадарку. А ў калоніі яна становіцца сродкам для фінансавання нараў, баланды і аховы.
Міністэрствы тлумачаць гэта неабходнасцю «пакрыцця выдаткаў дзяржавы». Але чамусьці дзяржава не спяшаецца браць грошы з тых, хто яшчэ не дажыў да пенсіі – іх кормяць і грэюць бясплатна. А вось пенсіянераў, якія ўжо аддалі сваё здароўе на працы, просяць аплаціць уласнае ўтрыманне. Лагічна? Можа быць, але пахне двудумствам.
Усё гэта выглядае так, нібы дзяржава сама сабе знайшла новую крыніцу даходу. Пенсія – не грошы чалавека, а сродак бюджэту. А хто не мае пенсіі – таго ўтрымлівае задарма.
Якуб Ясінскі