На Беларусі рэзка падскочаць кошты на цыгарэты і алкаголь

На Беларусі рэзка падскочаць кошты на цыгарэты і алкаголь – з-за інтэграцыі з Расіяй

Рост акцызаў на беларускія цыгарэты, алкаголь і электронныя сістэмы курэння звязаны з беларуска-расійскім пагадненнем пра ўранаванне цэн.

Міністэрства фінансаў Беларусі паведаміла, што на працягу 2023 года адбудзецца рэзкае павышэнне акцызаў на цыгарэты і моцны алкаголь. У пералік падакцызных тавараў трапілі таксама электронныя сістэмы курэння. Рост акцызаў прывядзе да павышэння рознічных коштаў.

За 2023 год стаўкі акцызаў на цыгарэты першай цэнавай групы вырастуць у 2,2 разы, другой – на 60,9%, а на стыкі для электронных цыгарэт – на 86%. Павышэнне ставак акцызаў на іншыя тытунёвыя вырабы (тытунь трубачны, курыльны, для кальяна, цыгары, цыгарылы) будзе ў межах 13,1-21,3 працэнтаў.

На 2023 год таксама прадугледжана павышэнне ставак акцызаў на вадкасці для электронных сістэм курэння ў 5,1 раза, а на моцныя алкагольныя напіткі – на 31,1 працэнта.

Каментарый Міністэрства па падатках і зборах паказвае, што рост акцызаў звязаны з міжурадавымі пагадненнямі паміж Беларуссю і Расіяй на фоне інтэграцыі. Цыгарэты і алкаголь працягнуць даражэць і наступныя два гады, пакуль кошты на іх не зраўняюцца з коштам гэтых тавараў на расійскім рынку.

Фота ілюстрацыйнае