Традыцыйная тэхналогія бондарных вырабаў у Глускім раёне ўключана ў спіс нематэрыяльнай культурнай спадчыны Беларусі.
Усё гэта дзякуючы глускаму бондару, народнаму майстру Уладзіміру Станкевічу.
Ён стварае свае вырабы – бочкі, кадкі, ушаты, шайкі, запарнікі – выключна па тых тэхналогіях, якімі карысталіся нашы продкі.
Станкевіч – адзіны народны майстар па бондарнай справе на Магілёўшчыне.
Першыя навыкі бондарства ён атрымаў у дзяцінстве, калі назіраў за працай дзеда.
Пачынаў з простых вырабаў, затым перайшоў да вырабу бочак і маслабоек.
Цяпер настолькі авалодаў тэорыяй і практыкай бондарства, што здольны зрабіць любую драўляную пасудзіну.
Станкевіч працуе толькі ўручную, выкарыстоўвае інструменты, што засталіся ад дзеда, ці зробленыя ўласнаручна.
Акрамя таго, майстар перадае свой вопыт моладзі – вядзе гурток па бондарству ў Глускім Доме рамёстваў.
Яго вучні ўдзельнічаюць у выставах усіх узроўняў з 2010 года.
Фота: БелТА.