Міхаіл Крыцкі, да апошняга часу старшыня Бабруйскага райвыканкама, цяпер узначаліў Шклоўскі раён.
Бязлікі зменшчык
На пасадзе старшыні Бабруйскага райвыканкама Крыцкі правёў зусім няшмат часу – туды яго скіравалі напрыканцы сакавіка 2025 года. Чымсьці значным для раёна ён наўрадці запомніцца. Калі судзіць выключна па адкрытых дадзеных, Міхаіл Крыцкі праявіў сябе хутчэй як “гаспадарнік-аграрый”, чым як ініцыятар буйных пераўтварэнняў.
Яго публічная дзейнасць была сканцэнтравана на бягучым кіраванні раёнам, сельскай гаспадарцы, працы з насельніцтвам і выкананні даручэнняў абласнога і рэспубліканскага кіраўніцтва. За кароткі перыяд кіраўніцтва не праглядаецца ні буйных прарыўных праектаў, ні прыкметных публічных канфліктаў або скандалаў.
Толькі сувязь Крыцкага з аграхолдынгам “Купалаўскае”, якое знаходзіцца ў Шклоўскім раёне, выклікае некаторы інтарэс. Справа ў тым, што з 2023 года па 2025-ы ён як раз працаваў генеральным дырэктарам ААТ «Купалаўскае». То бок кіраваў ім каля двух гадоў.
Крыцкі ўвогуле даволі хутка мяняў за апошнія 5-6 гадоў месца працы. У 2020 годзе ён паступіў на дзяржаўную службу ў Шклоўскі райвыканкам, дзе па 2021 год працаваў на пасадзе першага намесніка старшыні райвыканкама – начальніка ўпраўлення па сельскай гаспадарцы і харчаванні. З 2021 года кіраваў сельскагаспадарчымі прадпрыемствамі Шклоўскага раёна: спачатку – ААТ «Амкадор-Шклоў», пазней – ААТ «Любінічы-Агра». То бок да “Купалаўскага” паспеў за два гады пакіраваць дзвюма сельгасарганізацыямі.
Чым добрым адзначыўся Крыцкі для “Купалаўскага”, таксама цяжка сказаць. Але ён стаў адным з тых, хто кіраваў прадпрыемствам, якое аказалася папросту бессэнсоўнай тратай дзяржаўных сродкаў.
Канец “Купалаўскаму” эксперыменту
Пасля прайшоўшай у беларускага дыктатара нарады 7 ліпеня 2026 года стала вядома, што замест аграхолдынга “Купалаўскае”, які будзе ліквідаваны, з’явяцца некалькі самастойных сельгаспрадпрыемстваў – “Новагарадзішчанскае”, “Любінічы-Агра” і “Вялікія Славені”. Сярод праблем “Купалаўскага” Лукашэнка назваў і кадравы памылкі.
Ранейшае рашэнне аб аб’яднанні ў аграхолдынг прымалася, каб забяспечыць сыравінную базу для новага малакаперапрацоўчага завода ў Шклове, будаўніцтва якога павінна быць завершана да 7 лістапада 2026 года.
Летась стала вядома, што «Купалаўскае» атрымае да 3,5 млн рублёў у якасці бязвыплатнай дапамогі ад дзяржавы на закупку тэхнікі і абсталявання.
Фотаздымак: bobrlife.by