Пасля некалькіх месяцаў разваг ва ўладзе аб вартасці павелічэння тэрыторыі Дрыбінскага раёна чыноўнікаў зацікавіла меркаванне насельніцтва.
Пра тое, што варта даведацца меркавання людзей з тых тэрыторый, якія будуць перададзены Дрыбінскаму раёну, думка ўзнікла не ў кагосьці з раённых ці абласных чыноўнікаў, а ў самога беларускага дыктатара ў Мінску
“Што на гэты конт думаюць ва ўсіх пералічаных раёнах? Гэта вельмі важна для людзей, але пасля таго, як мы ім раскажам, чаго мы хочам. Ці прапрацаваны магчымыя наступствы і далейшыя дзеянні? Колькі гэта будзе каштаваць для бюджэту і грамадзян? Я меркаваў, што гэта нічога не будзе каштаваць. Але калі трэба падтрымаць нейкія гаспадаркі – падтрымаем. І самае галоўнае: ці будзе станоўчы сацыяльны і эканамічны эфект?” – пацікавіўся ён, пасля таго, як сам ініцыяваў узбуйненне Дрыбінскага раёна.
Лукашэнка лічыць, што ў гэтым раёне ўжо створана інфраструктура, не горшая за інфраструктуру іншых раёнаў. “Ён павінен адпавядаць сярэднім памерам раёнаў нашай краіны”, – заявіў дыктатар.
Цікава, што раней чыноўнікі казалі пра ўзбуйненне Дрыбіншчыны коштам Магілёўскага, Горацкага і Шклоўскага раёнаў. Цяпер жа пра Шклоўскі гаворкі няма, але ўзгадваецца Чавускі.
Нагадаем, што нават пры запланаваным павелічэнні тэрыторыі Дрыбінскага раёна на 10 тыс. га, ён ніяк не будзе адпавядаць сярэднім памерам па меншай меры раёнаў Магілёўшчыны. У цяперашні час плошча Дрыбінскага раёна 767,84 км2. 10 тыс.га, на якія збіраюцца павялічыць яго тэрыторыю, гэта плюс 100 км2. Такім чынам павялічаны Дрыбінскі раён будзе мець прыкладна 868 км2. Гэта ніяк не робіць яго большым па плошчы за сярэднестатыстычны сельскі раён у Магілёўскай вобласці.
Практычна ўсе сельскія раёны вобласці маюць тэрыторыю больш за 1000 км2. Выключэнне, акрамя Дрыбінскага, складаюць толькі Крычаўскі (776,84 км2), Круглянскі (879,16 км2) і Хоцімскі (862,55 кв2) раёны. Такім чынам Дрыбінскі раён нават пасля запланаванага ўзбуйнення стане толькі перадапошнім па плошчы сельскім раёнам Магілёўскай вобласці.
Фотаздымак: Вікіпедыя