У Магілёве на ўсіх вадаёмах санэпідэмстанцыя не раіць купацца. А як выглядаюць мясцовыя пляжы ў спёку?

У горадзе 30-градусны сквар. Паветра ў чаканні навальніцы. Гараджане цвердзяць, што атмасфера нагрэлася так, што цяжка дыхаць.

Абласны цэнтр гігіены, эпідэміялогіі і грамадскага здароўя паведамляе, што паводле вынікаў лабараторнага кантролю вынесены прапановы аб абмежаванні або забароне купання дзяцей і дарослых на ўсіх пляжах абласнога цэнтру. Не раяць эпідэміёлагі займацца на магілёўскіх вадаёмах і воднымі відамі спорту.

Вада не адпавядае гігіенічным нарматывам на Дняпры – гарадскі пляж і пляж у пасёлку Палыкавічы – а таксама Пячэрскім, Грабянёўскім і Вільчыцкім вадасховішчах.

Той хто застаўся ў Магілёве, не выбраўшыся на лецішча, стаіць перад выбарам: пляж без вады, ці душ у двары.

Гарадскі пляж на Дняпры, які прыкметна змялеў за лета, не застаўся бязлюдным. На ім бавіліся дзясяткі тры гараджанаў. Сярод іх знаходзіліся смельчакі, якія наважваліся ўвайсці ў ваду. Некаторыя вялі да яе дзяцей.

На абвестачным стэндзе паведамленні аб забароне купання былі на месцы. Каляровыя аб’явы страшылі, што «на гэтым месцы патануў чалавек». Ніжэй дадавалася інфармацыя, што менавіта становіцца прычынай трагедыяў.

Акваторыю пляжа пільнавалі ратаўнікі на чаўнах. Загарадка для купання сіратліва выглядала без дзяцей.