У Мсціславе супрацоўнікі праваахоўных органаў затрымалі маладых людзей, якія курылі гашыш. На аднаго з іх заведзена крымінальная справа
Па папярэдніх дадзеных наркатычнае рэчыва на тэрыторыю Мсціслаўскага раёна правёз 18-гадовы мсціслаўчанін, які навучаецца ў Смаленску. Пакурыць гашыш малады чалавек вырашыў разам са сваім сябрам. Пасля ўжывання наркотыка ля аднаго з пад’ездаў шматпавярховак горада іх затрымалі супрацоўнікі міліцыі.
Экспертыза паказала, што курыльная сумесь, якую прывёз мсціслаўчанін, з’яўляецца наркатычным рэчывам —паведамляе мсціслаўская раённая газета “Святло кастрычніка”
У выніку ў дачыненні да 18-гадовага жыхара Мсціслаўля ўзбуджана крымінальная справа. Яму пагражае пакаранне ад 3 да 7 гадоў пазбаўлення волі.
У дзяжурную службу мсціслаўскага аддзела міліцыі за апошнія дні паступіла некалькі паведамленняў пра розныя здарэнні.
У мужчыны, які пражывае ў Мсціславе, невядомыя залезлі ў падвальнае памяшканне і выкралі закаткі. Распачата крымінальная справа па ч. 1 арт. 205 КК РБ. Санкцыя артыкула прадугледжвае пазбаўленне волі на тэрмін да трох год.
У іншага мужчыны не атрымалася скарыстацца ўраджаем кукурузы сельгаспрадпрыемства. Інспектарамі ДПС ён абвінавачаны ў незаконнай перавозцы 15 кг кукурузных пачаткаў.
У жыхара аг. Забалацце з банкаўскай карткі махляры спісалі 190 рублёў.
На АЗС-19 г. Мсціслаўля кіроўца легкавога аўтамабіля сарваў заправачны шланг і ўцёк з месца здарэння. Яго асобу ўстанавілі супрацоўнікі аддзялення ДАІ. Ім аказаўся жыхар г. Мсціслаўля. Мужчыну пазбавілі права займацца дзейнасцю, звязанай з кіраваннем транспартнымі сродкамі.
Падлетак загінуў на зернесушыльным комплексе ў аграгарадку Мушына – пра гэта паведамляе прэс-служба МНС.
17-гадовы хлопец на час уборачнай кампаніі ўладкаваўся ў аператарам зернесушыльнага комплексу ў мясцовую гаспадарку.
Паводле папярэдніх звестак, на момант надзвычайнага здарэння побач з ім знаходзіліся школьнікі. Вырашыўшы пажартаваць з іх, ён заскочыў у загрузачную яму. Праз кароткі прамежак часу пачаў тануць у зерні. Відавочцам дапамагчы юнаку выбрацца не ўдалося.
У дзяжурную службу мсціслаўскага аддзела міліцыі за апошнія дні паступіла некалькі паведамленняў пра розныя здарэнні: крадзеж часныка з агарода, нахабныя козы, што паелі кветкі і абгрызлі яблыні, сямейна-побытавыя разборкі.
Агарод мсціслаўчанкі пацярпеў ад нападу злодзеяў. Уначы яны скралі 75 галовак часныку. Жанчыне, якая пражывае ў Мсціславе па вуліцы Гастэла, не пашанцавала з суседскімі козамі, бо яны ў гаспадыні з’елі кветкі, абгрызлі яблыню і падрапалі штыкетнік.
У аграгарадку Басценавічы прычынай канфлікту таксама сталі свойскія жывёлы. У жыхаркі вёскі сабакі загрызлі курэй і трусоў. На цяперашні момант па ўсіх пералічаных фактах праводзіцца праверка.
У вёсцы Андраны мужчына ў стане алкагольнага ап’янення ўчыніў з жонкай скандал, выгнаўшы яе з дому. На дэбашыра складзены адміністрацыйны пратакол. Яму пагражае штраф да 10 базавых велічыняў, грамадскія працы або адміністрацыйны арышт.
У аддзел мсіцслаўскай міліцыі жанчына, якая пражывае ў Оршы, і паведаміла, што ў доме яе бацькі ў вёсцы Картыжы невядомыя разабралі тэлевізары, пральную машыну і газавую пліту. Таксама не пасаромеліся выкрасці кацёл з лазні. На сёння па дадзенаму здарэнню ўзбуджаная крымінальная справа –паведамляемсціслаўская раённая газета “Святло Кастрычніка”.
У дзяжурную службу мсціслаўскага аддзела міліцыі за апошнія дні паступіла некалькі паведамленняў пра розныя здарэнні: крадзеж паліва і рулонаў сена, кустоў бульбы з агарода. Нецвярозы буйны брат і шумныя суседзі, якія ладзяць начныя гулянкі.
У аграгарадку Басценавічы Мсціслаўскага раёна на тэрыторыі прыватнага домаўладання пенсіянера міліцыя выявіла 30 літраў афарбаванага дызельнага паліва, што захоўваў мужчына. У аграгарадку Мішні “засвяціўся” механізатар аграпрапрыемства “Знамя працы” у якога правахоўнікі знайшлі два рулоны сена.
У Мсціславе ў пад’ездзе дома па вуліцы Школьная невядомыя разбілі акно ўваходных дзвярэй. Працягваюцца і крадзяжы бульбы з агародаў людзей. На гэты раз злодзеі выкапалі на агародзе жыхара Ходасаў 15 кустоў клубневай культуры. А вось у аграгарадку Разанцы жанчына была змушаная звярнуцца за дапамогай да міліцыі з-за таго, што суседзі два тыдні не давалі ёй спаць, ладзячы начныя гулянні. Па ўсіх фактах праводзіцца праверка.
У Ходасах адбылося яшчэ адно здарэнне. Родны брат жанчыны ў стане алкагольнага ап’янення ўчыніў з ёй скандал, парваў сукенку і кідаўся біцца. У выніку на мужчыну быў складзены адміністрацыйны пратакол. Яму пагражае штраф да 10 базавых велічыняў (370 беларускіх рублёў) ці грамадскія працы або адміністрацыйны арышт – паведамляе раённая газета “Святло кастрычніка”.
У дзяжурную службу мсціслаўскага аддзела міліцыі за апошнія дні паступіла некалькі паведамленняў пра розныя здарэнні: крадзеж бульбы з агарода, няпрошаны нецвярозы госць і забіццё амаль двух дзясяткаў курэй чужой сабакай.
У сезон паспявання гародніны і садавіны традыцыйна актывізуюцца злодзеі. Жыхар Мсціслава паведаміў у міліцыю, што з яго агарода зламыснікі за ноч выкапалі шэсць кустоў бульбы.
Праваахоўнікам таксама трэба будзе пастарацца знайсці і ўладальніка сабакі, які ў жыхаркі Мсціслава задушыў 19 курэй.
Але самы цікавы выпадак здарыўся ў аграгарадку Мушына. Мужчына 1980 года нараджэння, у стане алкагольнага ап’янення не жадаў сыходзіць з дома незнаёмай жанчыны, так што яна выклікала міліцыю. У выніку праваахоўнікі не толькі прымусілі п’янага мужчыну сыйсці але і склалі адміністрацыйны пратакол. Цяпер яго чакае пакаранне ў выглядзе штрафу ў памеры да 8 базавых велічыняў, а гэта значыць мужчына можа заплаціць да 300 рублёў – паведамляе раённая газета “Святло кастрычніка”.
Побач з кар’ерам каля вёскі Парадзіна Мсціслаўскага раёна прайшлі спаборніцтвы па паляўніча-стралковым мнагаборстве. Іх арганізатарам стала мсціслаўская раённая арганізацыя “Беларускага таварыства паляўнічых і рыбаловаў”.
У праграму спаборніцтваў уваходзіла стральба з 35 метраў па мішэні з малюнкам казулі і стэндавая стральба па лятаючых талерках.
Згодна з умовамі спаборніцтва кожны ўдзельнік мог зрабіць чатыры кулявыя стрэлы па мішэні з казуляй і дзесяць дробавых па лятаючых талерках.
У стральбе па талерках лепшы вынік паказаў Іван Клеянкоў – 46 з 50 магчымых, а дакладней за іншых па мішэні з казуляй страляў малады паляўнічы Уладзіслаў Балтушэнка (37 ачкоў), хоць гэта яму не дапамагло ўвайсці ў тройку мацнейшых.
Па выніках дзвюх дысцыплін першае месца заняў Іван Клеянкоў, які набраў 70 ачкоў і адарваўся ад іншых больш чым на дзесяць балаў – паведамляе мсціслаўская раённая газета “Святло кастрычніка”.
У аграгарадку Разанцы Мсціслаўскага раёна працягваецца будаўніцтва праваслаўнай капліцы. Ужо ўзвялі блочныя сцены, робіцца дах.
Некалькі месяцаў таму mogilev.media ужо паведамлялі пра тое, што ў аграгарадку Разанцы плануюць пабудаваць праваслаўную капліцу. З такой ініцыятывай да мясцовых уладаў звярнуліся мясцовыя жыхары і атрымалі дазвол ад іх і ад Магілёўскай епархіі.
На дадзены момант узвялі блокавыя сцены, робяць дах. Цяпер прапрацоўваецца канцэпцыя добраўпарадкавання тэрыторыі, прылеглай да капліцы, яе азеляненне. – паведамляе раённая газета “Святло кастрычніка”.
Нагадаем, што населены пункт Разанцы быў пабудаваны ў 1991 годзе для перасяленцаў з зоны адчужэння Чарнобыльскай АЭС. На сённяшні момант тут пражывае 650 чалавек і ўвесь гэты час паселішча не мела свайго храма.
У дзяжурную службу мсціслаўскага аддзела міліцыі паступала некалькі паведамленняў пра розныя здарэнні: ад няпрошаных гасцей і пабытовага скандалу да хэйта ў інтэрнэце.
Жыхарка аграгарадка Сялец Мсціслаўскага раёна паведаміла, што да яе дадому прыйшоў невядомы мужчына ў нецвярозым стане і прасіўся пераначаваць. Няпрошаным госцем аказаўся жыхар Жлобінскага раёна. У выніку на яго складзены адміністрацыйны пратакол, згодна з якім мужчыне пагражае штраф у памеры да 8 базавых велічыняў.
У вёсцы Доўгавічы п’яны мужчына учыніў сямейны скандал. Ён пагражаў жонцы, разбіў тэлевізар, сапсаваў іншую маёмасць. Дэбашыра чакае штраф у памеры да 10 базавых велічыняў або грамадскія працы ці наогул адміністрацыйны арышт.
У самім Мсціславе жыхарка горада стала закладніцай суседскага сабакі. Праз яе жанчына не можа выйсці з уласнай хаты.
А іншы мсціславец паскардзіўся на сваю былую жонку, якая абражае яго ў сацсетках. Па двух названых фактах праваахоўнымі органамі праводзіцца праверка – паведамляе мсціслаўская раённая газета “Святло кастрычніка”.
Праваслаўныя вернікі аграгарадка Сялец Мсціслаўскага раёна адзначаюць пяцігадовы юбілей новай драўлянай царквы Ануфрыя Вялікага, а побач знаходзіцца старая барочная Свята-Ануфрыеўская царква ў закінутым стане, хоць яна і з’яўляецца гісторыка-культурнай каштоўнасцю.
У вёсцы Сялец Мсціслаўскага раёна ёсць адно ўнікальнае і атмасфернае месца – Свята-Ануфрыеўская царква ХVІІІ стагоддзя, якая была пабудаваны ў стылі барочнага класіцызму. Узведзена яна была як уніяцкая пры даўнім праваслаўным манастыры, а пасля паўстання 1830-1831 года была перададзена праваслаўным.
Храм захаваўся няблага, але выглядае досыць сумна, бо патрабуе грунтоўнай рэстаўрацыі. У 2007 годзе Свята-Ануфрыўская царква ХVІІІ стагоддзя была занесена ў Дзяржаўны спіс гісторыка-культурных каштоўнасцей Беларусі як аб’ект гістарычнай спадчыны рэспубліканскага значэння. Але на гэтым усё і скончылася, бо ўнікальны помнік сакральнай архітэктуры так і застаецца гібець, пакрысе развальваючыся пад уплывам часу.
Шмат год у Сяльцы не было дзеючай царквы, бо стары манастырскі корпус за савецкім часам быў пераабсталяваны пад школу, а царква – пад спартыўную залу. У 1950-х гадах улады разабралі металічны дах будынка, які знаходзіўся ў аварыйным стане. Мясцовыя вернікі раней звычайна ездзілі за 17 кіламетраў у Мсціслаў, каб пабыць у царкве. Аднак шэсць год таму жыхары Сяльца сабралі подпісы і хадайнічалі аб аднаўленні царкоўнага жыцця.
Духавенства дала згоду на аднаўлення праваслаўнага прыхода, аднак аднаўляць старадаўні помнік сакральнай архітэктуры не сталі, а ўзяліся за будаўніцтва новай драўлянай царквы. Сродкі на будаўніцтва храма дапамагалі збіраць не толькі мясцовыя жыхары, але і вернікі з Мсціслава.
У верасні 2017 года ў Сяльцы пачалося будаўніцтва царквы, а 18 лютага 2018 года храм асвяціў біскуп Сафроній. Горацкі лясгас даў лес для будучага храма, а водаканал зрабіў зруб. Будаваць царкву дапамагалі манахі з Пустынскага мужчынскага манастыра, які знаходзіцца пад Мсціславам. 25 чэрвеня царква адзначыла першае прастольнае свята.
Драўляны храм атрымаўся невялікі і камерны – на дваццаць чалавек. Царква прыпісная, адносіцца да прыходу храма ў гонар абраза Тупічаўскай Божай Маці. Набажэнствы ў ёй вядзе клірык сабора Аляксандра Неўскага іерэй Мікалай – паведамляе мсціслаўская раённая газета “Святло кастрычніка”.
Па словах старажылаў, у колішнія часы ў прастольнае свята на царкоўнай тэрыторыі заўсёды праходзіў Ануфрыеўскі кірмаш. Сюды з’язджалася шмат людзей са ўсёй акругі. Гандлявалі сельскагаспадарчымі прадуктамі, начыннем. Адным словам, тут можна было набыць усё патрэбнае. І людзей на службу прыходзіла шмат, нават не заўсёды хапала ўсім месца ў храме.
Адзначым, што Свята-Ануфрыеўская царква на прасторах Магілёўшчыны з’яўяецца важным аб’ектам архітэктуры, які пры жаданні можна адрэстаўраваць і прывесці ў належны выгляд, бо яна няблага захавалася да сённяшняга дня. Больш за тое, краязнаўцы ўжо зрабілі графічную рэканструкцыю храма, згодна якой царква выглядае прыгожа і ўзнёсла.
