Капітальны рамонт праблемнага дома ў Чэрыкаве ператварыўся ў фарс

Гнілыя трубы выдаюць за новую сістэму ацяплення, новага даху няма пяць месяцаў. У доме няма гарачай вады, а газавыя абагравальнікі загадалі прыбраць.

“Чаго вы перажываеце? Залье – страхоўку дадуць” – так супакойваюць жыхароў дома №5 па вуліцы Ракасоўскага ў Чэрыкаве супрацоўнікі арганізацыі, якая займаецца рамонтам, паведамляе cherikovnews.by. Капітальны рамонт дома пачаўся яшчэ вясной, а завяршыцца павінен быў у верасні 2022 года, як гэта прадпісвае рашэнне раённага выканкама. Але ў восеньскія залевы дом увайшоў з драўляным  каркасам замест даху. У выніку жыхары верхніх паверхаў назіраюць у сваіх пакоях пастаянныя разводы пасля дажджоў.

Дажджы, вільгаць, галубіны памёт

– Можаце сабе ўявіць, як мы чакалі гэтага рамонту. – распавяла выданню гаспадыня кватэры на пятым паверсе – І зараз мы чакаем, калі ж усё гэта нарэшце скончыцца, таму што няма сіл трываць такое нядбайнае стаўленне да справы. Надвор’е было такое: сонечнае, сухое… Чаму б не зрабіць дах?! Усё так зацягнулася, што зараз, калі ідзе дождж, мы з мужам нават па начах дрэнна спім: хвалюемся, ці атрымаецца выратаваць мэблю ў выпадку затаплення. Я не кажу пра пранікненне вільгаці ў кватэру, пра смурод ад галубінага памёту, які гадамі запасіўся на даху і які ніхто не збіраецца прыбіраць. 

Арганізацыя-генпадрадчык – Чавускі рамбуд – узяў на сябе абавязацельства прыступіць да капітальнага рамонту без авансавых выплат. І ў выніку не змог забяспечыць набыццё будаўнічых матэрыялаў. Гэтую сітуацыю пракаментаваў намеснік старшыні Чэрыкаўскага райвыканкама Дзмітрый Клімянкоў:

– Наколькі мне вядома, прадпрыемства неаднаразова штрафавалася за несвоечасовае выкананне работ на аб’екце. Тыдзень таму дзяржтэхнагляд аштрафаваў Чавускі рамбуд на 25 базавых велічынь. І надалей будзе вырашацца пытанне аб праходжанні імі атэстацыі і выдачы ліцэнзіі на ажыццяўленне дзейнасці.

Гарачай вады няма, а газавыя гарэлкі забаранілі

Другая праблема, акрамя даху – сістэма ацяплення. Дом не падключаны да гарачай вады. Гэтую праблему жыхары першапачаткова вырашалі пры дапамозе газавых воданагравальных калонак. Аднак, як высветлілася пазней, устаноўка гэтых прыбораў была не прадугледжана тэхнічнымі характарыстыкамі дома, і жыхароў абавязалі іх дэмантаваць. У выніку жыхарам дагэтуль прыходзіцца грэць ваду ў рондалях і чайніках.

Праектам капітальнага рамонта прадугледжана падключэнне дома да гарачага водазабеспячэння. Аднак і тут жыхары сутыкнуліся з новай праблемай.

Гнілыя трубы замаскіравалі пад новыя

– Учора спусцілася ў падвал. – распавяла выданню яшчэ адна жыхарка шматпакутнага дома – Мала таго, што там бардак развялі, дык гляджу, ржавая труба з уцяпляльніка тырчыць, а на яе кранік новы закручаны. Хоць перад гэтым у работнікаў пыталася, мяняць трубу будзеце? Сказалі, так. А па выніку, атрымліваецца, што не.

Нават майстар на аб’екце Аляксандр Быкаў, прадстаўнік Чэрыкаўскаго ЖКГ, які выступае субпадрадчыкам і адказвае за правядзенне сістэмы ацяплення, быў у замяшанні, калі ўбачыў, што зрабілі яго падначаленыя.

– Пераробяць. – толькі і змог сказаць ён.