Кадравыя праблемы Каталіцкага касцёла ў Беларусі найбольш адбіліся на усходзе краіны.
Колькасць каталіцкага духавенства ў Беларусі паступова памяншаецца, асабліва ва ўсходніх рэгіёнах, распавёў мітрапаліт Мінска-Магілёўскі, арцыбіскуп Юзаф Станеўскі Vatican News. Напрыклад, на Магілёўшчыне адзін святар вымушаны абслугоўваць па тры парафіі, пераадольваючы сотні кіламетраў.
Сітуацыя ўскладняецца і тым, што святары з Польшчы, якія служылі дзесяцігоддзямі, усё часцей не атрымліваюць дазволу на далейшую працу.
Юзаф Станеўскі перакананы, што беларуская каталіцкая супольнасць павінна быць самадастатковай. “Кожная сям’я, дзяржава і Касцёл – гэта сям’я сем’яў”, – заўважыў ён, заклікаючы саміх вернікаў і ў першую чаргу бацькоў больш актыўна спрыяць пакліканням.
Асобным пунктам для беларускіх вернікаў застаецца стварэнне ўласнай духоўнай пляцоўкі ў Рыме. Як прызнаўся мітрапаліт, усё яшчэ актыўна абмяркоўваецца ідэя праекта “Беларусікум”, бо, на яго думку, у Вечным горадзе не хапае жывой беларускай каталіцкай прысутнасці. Святары з Беларусі маглі б працаваць на базе рымскай парафіі, дапамагаючы землякам, студэнтам і пілігрымам. “Каб яны мелі месца, дзе маглі б затрымацца, падзяліцца, сустрэцца, каб нас убачылі і пачулі”, – адзначыў іерарх, дадаючы, што гэта дазволіць дзяліцца багатымі літургічнымі і народнымі традыцыямі нашай краіны.
Для рэалізацыі гэтай ініцыятывы неабходна накіраваць святароў з Беларусі. Аднак усё ўпіраецца ў кадравае пытанне.
Фотаздымак з адкрытых крыніц