Каманда “Блок Пракоп’ева-Ягорава” прадставіла свой лагатып і мерч. У аснове – сімвал “вежы лідарства”.
Выбары ў Каардынацыйную раду пройдуць 25-28 мая. Падрабязнасці пра падрыхтоўку да галасавання і акалічнасці бяспечнага ўдзелу ў ім можна знайсці тут. Тым часам адна з каманд ужо прадставіла свой лагатып і фірмовы гардэроб. Каманда “Блок Пракоп’ева-Ягорава” скарысталася дабраахвотнай дапамогай аднаго з міжнародных рэкламных агенцтваў – піша “Наша Ніва”.
Цэнтральным элементам брэндынгу з’яўляецца салатавы прамавугольнік. Ён створаны па матывах выдзялення маркерам чагосьці найбольш важнага. Тое, што ў назве блока такіх прамавугольнікаў тры – гэта сімвал вежы лідарства, паведамляе выданне.
Выбар на карысць тэрмаядзерных колераў быў мэтанакіраваным.
– Мы хацелі адысці ад звыклага чырвонага-белага спалучэння, бо разумелі, што большасць будзе выкарыстоўваць менавіта гэтыя колеры, і тады б мы не вылучаліся. – расказаў “Нашай Ніве” прадстаўнік каманды – А тут нам дызайнеры адразу сказалі, што з такімі колерамі людзі звыкнуцца не адразу, шмат хто будзе абмяркоўваць гаму. А абмеркаванне і, як вынік, запамінальнасць – гэта тое, чаго мы дамагаліся.
Фота: НН