Амаль уся Мікалаеўская вобласць, за выключэннем Кінбурнскай касы, вольная ад расійскіх акупантаў. Але вораг працягвае абстрэлы населеных пунктаў вобласці, у тым ліку і сам Мікалаеў, паведамляе news.pn.
Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці.
Паводле інфармацыі Аператыўнага камандавання “Поўдзень”, учора, 15 лістапада над Мікалаеўскай вобласцю было знішчана 12 ракет, абясшкоджана 9 дронаў-камікадзэ тыпу “Shahed-136”.
На працягу сутак Сілы абароны нанеслі ўдары па захопнікам на левым беразе Дняпра і ў раёне Кінбурнскай касы, выканаўшы больш за 50 агнявых задач. Ліквідавана 17 захопнікаў і знішчана і пашкоджана 15 адзінак аўтабронетэхнікі, 2 самаходныя артылерыйскія ўстаноўкі і разведвальны беспілотны лятальны апарат тыпу “Арлан-10”.
Акрамя таго, знішчана 2 склады боепрыпасаў у Новай Кахоўцы і Алешках.
Порт-калідор
“Мікалаеўскі порт важна ўключыць у збожжавы калідор” – лічыць дэпутат Мікалаеўскага аблсавета ад партыі “Слуга Народа” Яўген Ігнаценка. «Гэта будзе пазітыўная навіна не толькі для жыхароў Мікалаева і ўкраінскіх аграрыяў – а без перабольшання для ўсяго свету».
Дэпутат упэўнены: вялікія аб’ёмы ўкраінскага харчавання дапамогуць прыцішыць рост коштаў на сусветных рынках, а для некаторых краін наогул стануць выратаваннем ад голаду.
Пабрацімства Мікалаева з Магілёвам было замацаванае дамовай у 2009 годзе.
31 мая 2022 году мэр украінскага гораду заявіў, што Пагадненне аб пабрацімстве з Магілёвам скасаванае і выказаў спадзеў, што яно будзе адноўленае, калі Беларусь стане свабоднай.
Магілёў. media працягвае сачыць за жыццём Мікалаева, нягледзячы на спыненне партнёрскіх сувязяў з Магілёвам.
Мікалаеў месціцца за 65 кіламетраў ад Чорнага мора. Да вайны ў ім жыло 490 тысяч чалавек. Траціна з іх вымушана была пакінуць горад. Паводле Генштабу Узброеных сіл Украіны Мікалаеў адзін з асноўных кірункаў наступу расіян.
Яго рэгулярна абстрэльваюць, знішчаючы гарадскую інфраструктуру і змушаючы мясцовую ўладу капітуляваць. Прэзідэнт Украіны Уладзімер Зяленскі прысвоіў Мікалаеву ганаровае званне «Горад-герой».