Паколькі барацьба за працоўныя правы не ў прыярытэце для праўладных прафсаюзаў, яны актыўна развіваюць турыстычную дзейнасць.
Як адзначаецца на сайце Магілёўскага абласнога аб’яднання прафсаюзаў, за першыя дзесяць месяцаў 2025 года Магілёўская абласная арганізацыя прафсаюза работнікаў культуры, інфармацыі, спорту і турызму паставіла рэкорд па колькасці турысцка-экскурсійных паездак для сваіх сябраў.
Агульны лік за студзень-кастрычнік 2025 года дасягнуў ажно 133 праведзеных мерапрыемстваў. Сярод іх найбольшая колькасць – 92 экскурсіі – дзякуючы супрацы з прадпрыемствам “Магілёўтурыст”, якое мае дачыненне да туркампаніі “Беларустурыст”, якая ў сваю чаргу рэкламуецца на сайце Федэрацыі прафсаюзаў.
У параўнанні з усім 2024 годам рост такой бесканкурэнтнай супрацы з афіляванай з праўладнымі прафсаюзамі туркампаніяй аказаўся больш чым 10-разовым – тады было ўсяго 9 выездаў. І гэта толькі ў прафсаюзнай арганізацыі работнікаў культуры, інфармацыі, спорту і турызму. Усяго ж галіновых прафсаюзных арганізацыі ў сістэме Магілёўскага аб’яднання прафсаюзаў – 14.
Пры такім выбуховым росце турпаездак, кожнаму галіноваму прафсаюзу варта задумацца пра стварэнне уласнай туркампаніі. Першапачатковы капітал для гэтага ўжо ёсць – прафсаюзныя ўзносы.