У Слаўгарадзе ўзялі вырабляць аналаг жавальных цукерак з Германіі. Што з цукрам, солью, алеем

Кіраўнік канцэрну «Белдзяржхачпрам» супакойвае: сітуацыя пад кантролем.

Партал Myfin.by распавядае пра сітуацыю ў канцэрне ў святле праблемаў, выкліканых вайной ва Ўкраіне і ўведзенымі санкцыямі супраць Беларусі за падтрымку расійскай агрэсіі.


«Белдзяржхачпрам» асноўны вытворца харчовай прадукцыі. Ён праводзіць адзіную эканамічную, тэхнічную і тэхналагічную палітыку ў харчовай прамысловасці. Канцэрн аб’ядноўвае больш за два дзясяткі падгалінаў, якія вырабляюць сотні найменняў харчовых тавараў.


Свой агляд Myfin.by падрыхтаваў, абапіраючыся на інтэрв’ю старшыні канцэрну Алега Жыдкова тэлеканалу СТВ. Ён расказаў, што імпартазамяшчаюць беларускія кандытарскія прадпрыемствы, чаму падаражэў цукар, ці хопіць краіне сваёй солі, калі яе пастаўкі з Украіны спыніліся і як справы з імпартам-экспартам алею.

Магілёў.media падае публікацыю Myfin.by у скарочаным выглядзе.

Цукар

Пасля росту цэн на 60 капеек за кілаграм у красавіку абʼёмы рэалізацыі тавару ўпалі ў чатыры разы, прычым зніжэнне працягваецца. Гэта сведчыць, што ў Беларусі няма дэфіцыту тавару, а раней прынятыя меры (абмежаванне вывазу і дзяржрэгуляванне цэн) далі магчымасць утрымаць ліхаманкавы попыт на яго і не дапусціць недахопу, у тым ліку з-за продажу беларускага цукру ў Расію, дзе цэны значна вышэй за беларускія.

Соль

Спынення паставак солі з Украіны абʼёмы вырабу «Мазырсолі» выраслі на 20% – у суткі з канвеера сыходзіць 320 тон фасаванай прадукцыі. Прадпрыемства працуе кругласутачна і без выходных, павялічыўшы таксама абʼёмы здабычы.

Каменную соль на ўнутраны рынак пастаўляе таксама «Беларуськалій» – яго доля ў гэтым сегменце складае да 20%. У цэлым жа прыкметнага падаражэння тавару не адбылося.

Сітуацыя з соллю на кантролі ўраду і канцэрне.

Алей

Імпартныя пастаўкі сланечнікавага алею на 100 працэнтаў ажыццяўляюцца з Расіі. У Беларусі таксама вырабляецца і свой дэзадараваны рафінаваны алей на імпартнай сыравіне.

Вялікім попытам у такіх краінах Еўропы, як Літва, Латвія і Данія, карыстаецца беларускі рапсавы алей. Многія пакупнікі з ЕС гатовы набываць яго « у любой якасці і колькасці» на ўмовах поўнай перадаплаты і па значна больш высокіх цэнах, чым устаноўлены для нашага спажыўца.

Кандытарскія вырабы

«Белдзяржхарчпрам» імкнецца наладзіць выпуск у Беларусі той прадукцыі, якую ў асноўным везлі з Еўрасаюзу. У асноўным гэта кандытарскія тавары, у прыватнасці, жавальны мармелад, вітамінізаваныя цукеркі, фруктовы мармелад, а таксама некаторыя віды шакаладу.

Неўзабаве ў Беларусі зʼявяцца айчынная замена папулярным жавальным цукеркам нямецкага брэнда Haribo – вытворчая лінія па выпуску адпаведнай прадукцыі з 1 красавіка пачала работу ў Слаўгарадзе. Новае прадпрыемства за год зможа выпускаць да 3,5 тыс. тон прысмакаў.