Tag: война

Навіны пабрацімаў. Як дзятва Днепрапятроўшчыны дапамагае ўкраінскаму войску

Навіна ад

Дзеці-валанцёры прыфрантавога рэгіёну прадаюць самаробныя цукеркі, ладзяць вулічныя канцэрты, гуляюць з мінакамі ў шашкі.

Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці.

Пра дзяцей, якія дапамагаюць вайскоўцам перамагаць. зьбіраючы на іх патрэбы грошы, піша выданне Sobitie. Магілёў.media падае матэрыял калегаў з Украіны ў скароце.

7-гадовая Саламея з Дняпра.

Збірае грошы іграючы на жалейцы. У яе рэпертуары гімн Украіны, «Червона каліна» і іншыя ўкраінскія мелодыі. Дзяўчыне мінакі ахвяравалі больш за 150 тысяч грыўнаў. Гэтыя сродкі пайшлі на набыццё неабходнага для вайскоўцаў рыштунку: бронекамізэлек, шаломаў, цеплавізараў, аптэчак, насілак, тэрмакоўдраў.

Саламея з маці вырабляе і прадае патрыятычныя ўпрыгожванні. Выгаданыя сродкі адпраўляюцца таксама Ўзброеным Сілам.

10-гадовая Міраслава з Каменскага.

Зарабляе на патрэбы арміі гуляючы з мінакі ў шашкі. Дзяўчынка далучыла да валанцёрства двух сяброў. Разам, яны сабралі больш за 20 тысяч грыўнаў. Іх аддалі на рамонт ваеннага аўтамабіля, мацаванні шаломаў і набыццё дрону.

Міраслава – чэмпіёнка Украіны па шашках. Перамогу здабыла на турніры, які праходзіў у Херсоне. 23 лютага яна вярнулася дадому з узнагародай, а на наступны дзень пачалася поўнамаштабная вайна.

8-гадовага Ігара з Дняпра.

Хлопчык прадае мінакам ледзянцы. Іх ён гатуе разам з бацькам. Цукерак Ігар прадаў на больш чым 17 тысяч грыўнаў. Частка сабраных сродкаў перададзена «Арміі дронаў», астатняе – у дабрачынныя фонды.

Бацька хлопчыка кажа, што падчас вучобы сын пераймаўся, як ён будзе прадаваць прысмакі. Аднак, 1-2 гадзіны ў дзень ён вымяркоўвае для валанцёрства.

Школьнік Эрык збіраў грошы на паездку ў Егіпет. Замест пуцёўкі на курорт хлопчык ахвяраваў вайскоўцам 3000 грыўнаў.

8-гадовы Цімафей на сплеценых сваімі рукамі бранзалетах зарабіў для салдат больш за 25 тысяч грыўнаў.

Каменскае – горад у Днепрапятроўскай вобласці. Пабрацім Бабруйску ад 2000 году. Горад абласнога падпарадкавання ў Днепрапятроўскай вобласці. Насельніцтва 250 тысяч чалавек. Да вайны культурны абмен між гарадамі пабрацімамі бабруйскія чыноўнікі лічылі актыўным.

фота: sobitie.com.ua

Вайна ва Ўкраіне. За час расійскай акупацыі Ізюму загінула блізу 1 тысячы жыхароў

Навіна ад

У вызваленым ад расійскіх войск горадзе адшуканае масавае пахаванне людзей. У лесе паблізу Ізюму закапана больш за 400 цел, лічаць праваахоўныя органы.

“Трэба кожнае цела эксгумаваць, як гэта было ў Бучы. У нас ёсць, на жаль, такі негатыўны трагічны досвед, і будзем устанаўліваць акалічнасці скону кожнага з тых больш за 400 людзей, якія закапаныя на могілках побач з Ізюмам”, – кажа дарадца міністра ўнутраных спраў Украіны Антон Герашчанка, словы якога падае інфармацыйнае агенцтва “УНІАН”.

Паводле яго, пад руінамі дамоў застаюцца таксама загінулыя. З-пад завалаў толькі аднаго з іх дасталі целы 47 чалавек. Гэта трохпавярховы дом, два пад’езды якога абрынуліся ад расійскай авіяцыйнай бомбы.

Як мяркуе Герашчанка колькасць загінулых у Ізюме за час акупацыі можа набліжацца да 1 тысячы чалавек.

«І гэта будзе больш, чым у Бучы, у два разы. Вядома, будзем усё правяраць«, – падкрэслівае ён.

Прэзыдэнт Украіны Ўладзімір Зяленскі адзначае, што працэсуальныя дзеянні, звязаныя з масавым пахаваннем людзей у Ізюме ўжо пачаліся.

«Мы хочам, каб свет ведаў, што рэальна адбываецца і да чаго прывяла расійская акупацыя. Буча, Марыупаль, цяпер, на жаль, Ізюм… Расія паўсюль пакідае па сабе смерць. І павінна за гэта адказваць. Свет павінен прыцягнуць Расію да рэальнай адказнасці за гэтую вайну. Зробім усё для гэтага», – заяўляе Ўладзімір Зяленскі.

Ізюм, горад у Харкаўскай вобласці, знаходзіўся пад расійскай акупацыяй з сакавіка. Вызвалілі яго 11 верасня і тады ж над цэнтрам гораду быў вывешаны ўкраінскі сцяг. 14 жніўня ва ўрачыстым уздыманні сцягу ўдзельнічаў і Ўладзімір Зяленскі.

Да поўнамаштабнага ўварвання Расіі ва Ўкраіну ў Ізюме жыло больш за 45 тысяч чалавек.

“УНІАН” нагадвае, што Ўладзімір Зяленскі 14 верасня заявіў, што на Харкаўшчыне вызваленыя ад расіян амаль 400 населеных пунктаў, у якіх у акупацыі больш за пяць месяцаў жылі каля 150 тысяч украінцаў.

Паводле Харкаўскай абласной ваеннай адміністрацыі, 16 верасня ўвесь рэгіён вызвалены ад расійскіх войск.

«Гэта было беспрэцэдэнтнае рушэнне нашых вайскоўцаў. Украінцам зноў удалося зрабіць тое, што многія лічылі немагчымым», – адзначаецца ў тэлеграм-канале адміністрацыі.

Паведамляецца, што «расійская армія знаходзілася на Харкаўшчыне больш за пяць месяцаў. І за гэты час яны нават не намагаліся зрабіць нешта для людзей, а толькі знішчалі, забіралі, вывозілі. Пакінулі па сабе спустошаныя сёлы, і ў некаторых з іх няма ніякага ацалелага дому. Расія не можа прынесці нічога іншага, акрамя генацыду».

Вайна ва Ўкраіне. У Крывым Рогу расійскія войскі атакавалі гідратэхнічныя збудаванні і транспартную інфраструктуру

Навіна ад

Горад у Днепрапятроўскай вобласці абстралялі 7 ракетамі.

Паводле кіраўніка абласной ваеннай адміністрацыі Валянціна Разнічэнкі, ракеты пацэлілі па аб’ектах крытычнай і транспартнай інфраструктуры. Сурʼёзныя пашкоджанні зазналі гідратэхнічныя збудаванні.

«Папярэдне абышлося без пацярпелых. Некалькі раёнаў Крывога Рога засталіся без вады. Працуюць МНС і ратавальнікі, якія ліквідаваць наступствы разбурэнняў», – піша Валянцін Разнічэнка.

Начальнік ваеннай адміністрацыі гораду Аляксандр Вілкул паведамляе, што ў Крывым Рогу ўжо пачалі падаваць ваду  насельніцтву. Ён заклікае гараджанаў захоўваць спакой і запэўнівае, што сітуацыя кантралюецца.

Паводле яго, расійскія войскі ўдарылі па адным з абʼектаў гідратэхнічнай інфраструктуры гораду.

«Мы разумеем, што рабіць. Падача вады насельніцтву ўжо пачалася. Калі да вас вада не дайшла, то дойдзе бліжэйшым часам», – адзначае ён.

Інфармацыйная агенцтва «УНІАН» паведамляе, што па Крывым Рогу ракетны ўдар быў нанесены а 17 гадзіне. Выданне, спасылаючыся на тэлеграм-каналы, піша, што ракеты  пашкодзілі дамбу Карачуноўскага вадасховішча. У выніку, у рацэ Інгулец рэзка павысіўся ўзровень вады.

 

Вайна ва Ўкраіне. У вызвалены ад расійскіх войск Ізюм наведаўся прэзідэнт Уладзімір Зяленскі

Навіна ад

Ізюм, горад у Харкаўскай вобласці, знаходзіўся пад расійскай акупацыяй з сакавіка. Вызвалілі яго 11 верасня і тады ж над цэнтрам гораду быў вывешаны украінскі сцяг.

14 верасня прэзідэнт Зяленскі ўзяў удзел ва ўрачыстым узняцці сцягу ў вызваленым украінскімі дэсантнікамі Ізюме. Разам з Зяленскім горад наведалі прадстаўнікі Міністэрства абароны, паведамляе інфармацыйнае агенцтва «УНІАН».

Паводле выдання ў Харкаўскай вобласці вызваленыя больш за 40 паселішчаў.

Міністэрства абароны Расіі прызнала, што расійскія войскі адступаюць з рэгіёну.

Навіны пабрацімаў. Мікалаеў зазнаў масіраваны абстрэл. Загінулі мірныя жыхары

Навіна ад

Расійскія войскі па горадзе стралялі ўначы. Ахвярамі сталі двое мірных жыхароў. Шасцёра параненыя.

Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці.

Кіраўнік абласной ваеннай адміністрацыі Віталій Кім паведаміў, што Мікалаеў расійскія войскі атакавалі ракетамі С-300 адразу па першай гадзіне ночы. Пашкоджаныя навучальная ўстанова, аб’екты інфраструктуры і жылыя дамы. Снарады выбухнулі на тэрыторыі прадпрыемстваў, дзе адбыўся пажар.

 focus.ua

«Паводле папярэдніх дадзеных, два чалавекі загінулі, трое атрымалі раненні, траім грамадзянам аказана амбулаторная дапамога. Падрабязная інфармацыя ўдакладняецца», – піша Віталій Кім у сваім тэлеграм-кагнале.

focus.ua

Мэр Мікалаева Аляксандр Сянкевіч дадае, што на месцы абстрэлу працуюць аварыйныя брыгады і супрацоўнікі камунальных службаў.

Зазналі абстрэл паселішчы і ў вобласці. Там зафіксаваныя разбурэнні жылых і гаспадарчых збудаванняў.

Паводле старшыні абласнога савету Ганны Замазеевай, у шпіталях Мікалаева перабываюць 708 грамадзян, якія пацярпелі ад расійскіх атак на Мікалаеўскую вобласць. Яшчэ 92 пацярпелыя атрымліваюць амбулаторнае лячэнне.

Пабрацімства Мікалаева з Магілёвам было замацаванае дамовай у 2009 годзе.

31 мая 2022 году мэр украінскага гораду заявіў, што Пагадненне аб пабрацімстве з Магілёвам скасаванае і выказаў спадзеў, што яно будзе адноўленае, калі Беларусь стане свабоднай.

Магілёў. media працягвае сачыць за жыццём Мікалаева, нягледзячы на спыненне партнёрскіх сувязяў з Магілёвам.

Мікалаеў месціцца за 65 кіламетраў ад Чорнага мора. Да вайны ў ім жыло 490 тысяч чалавек. Траціна з іх вымушана была пакінуць горад. Паводле Генштабу Узброеных сіл Украіны Мікалаеў адзін з асноўных кірункаў наступу расіян.

Яго рэгулярна абстрэльваюць, знішчаючы гарадскую інфраструктуру і змушаючы мясцовую ўладу капітуляваць. Прэзідэнт Украіны Уладзімер Зяленскі прысвоіў Мікалаеву ганаровае званне «Горад-герой».

Украінскія вайскоўцы вызвалілі ад расіян больш за 300 паселішчаў на Харкаўшчыне

Навіна ад

Намеснік міністра абароны Украіны Ганна Маляр настойвае, што рэальная колькасць вызваленых тэрыторый у Харкаўскай вобласці амаль удвая большая і абяцае агучыць іх 14 верасня.

Пакуль жа, паводле Ганны Маляр, пачынаючы ад 6 верасня вызваленыя ад расійскіх войск 3 800 квадратных кіламетраў тэрыторыі рэгіёну.

«Больш за 300 паселішчаў і каля 150 тысяч нашых людзей сталі свабоднымі ад акупацыі, дзе яны фактычна былі закладнікамі«, – кажа яна.

Ганна Маляр адзначае, што аперацыя працягваецца і будзе трываць да поўнага вызвалення Харкаўскай вобласці, паведамляе інфармацыйнае агенцтва «УНІАН».

Выданне нагадвае, што 6 верасня Узброеныя Сілы Украіны пачалі контрнаступальную кампанію на акупаваныя тэрыторыі Харкаўскай вобласці.

11 верасня Міністэрства абароны Расіі прызнала, што кантроль амаль над усёй захопленай часткай рэгіёну страчаны.

Пасля ў Генштабе ўкраінскіх узброеных сіл пацвердзілі, што «варожыя сілы збеглі з Харкаўскай вобласці».

Не хочуць заставацца рускімі. У Латвіі пачасціліся выпадкі змены нацыянальнасці

Навіна ад

Вайна ва Украіне паўплывала на тое, што сёлета жыхары Латвіі сталі актыўней мяняць прозвішча і нацыянальнасць, імкнучыся пазбавіцца сувязі са славянскімі каранямі.

Паводле Міністэрства юстыцыі, за сёлетнія восем месяцаў імя, прозвішча або нацыянальнасць памянялі 1365 чалавек. Нацыянальнасць пажадалі змяніць 76 чалавек. Летась такіх выпадкаў было 20. Часцей за ўсё запіс «рускі» мяняюць на «латыш», «украінец», «яўрэй», «немец», ці «паляк», піша выданне Delfi.lv.

“Людзі, як правіла, паказваюць, што іх вельмі хвалююць падзеі ва Украіне, і яны баяцца, што іх прозвішча можа негатыўна паўплываць на адносіны са сваякамі, сябрамі і суседзямі, ці тое, што яны нават могуць страціць працу. Таму, нярэдка жыхары жадаюць памяняць імя ці прозвішча на балтыйскія. Да таго ж, іх прасцей выкарыстоўваць за мяжою”, – даводзіць супрацоўніца Міністэрства юстыцыі Солвіта Саўкума-Лаймеры.

Часцей за ўсё, мяняюць асабістыя дадзеныя жанчыны. Ад агульнай колькасці жыхароў за восем месяцаў бягучага года змянілі імя 76 працэнтаў жанчын і 24 працэнты мужчын. Нацыянальнасць памянялі 63 працэнты жанчын і 37 працэнтаў мужчын.

Вайна ва Ўкраіне. Горы лайна і крадзеж абразоў: аповед аб жахах вызваленага паселішча на Данеччыне

Навіна ад

Паселішча Багародзічнае ад расійскіх войск вызвалілі 11 верасня. Украінскіх вайскоўцаў шакавала ўбачанае ў ім. Яны знайшлі трупы ўкраінскіх салдат без галоў і забітых мясцовых жыхароў.

“Расіяне так уцякалі, што пакінулі па сябе нават недавараныя макароны на пліце. І кучу зброі і боепрыпасаў. І лайно. Горы лайна. Яны гадзілі паўсюль – у школе, дзе жылі, у дамах і нават у царкве мясцовага манастыра. Тут яны зладзілі сральню прама за алтаром. У самім сяле, за якое ішлі разлютаваныя баі, хлопцы знайшлі целы нашых байцоў – без галоў і без абутку. І паўдзясятка цел забітых мірных жыхароў”, – пераказвае аповед ваеннага журналіста Аляксея Кашпораўскага інфармацыйнае агенцтва «УНІАН».

images.unian.net

Паводле журналіста, па расійскай акупацыі з вёскі з’ехалі ўсе жыхары, акрамя 60-гадовага Мікалая і яго 93-гадовай маці Ніны Ільінічны. Частку жыхароў паселішча забілі расіяне, а частку – падчас абстрэлаў. Сярод забітых і родныя адзіных жыхароў Багародзічнага. Старэйшага сына Ніны Ільінічны разам з жонкай застрэлілі расіяне. Іх пахавалі за домам.

Аляксей Кашпораўскі апавядае, што пенсіянерка і яе сын Мікалай жывуць у невялікім хляўку, бо ўсе дамы разбураны. У іх засталіся дзве гусі, астатніх забралі расіяне. Мікалай расказаў журналісту, што «сам ставіў расцяжкі для гарачай сустрэчы з захопнікамі і сам жа іх здымаў».

images.unian.net

Расіяне перабывалі на тэрыторыі паўразбуранага манастыра, там жа ўладкавалі склад боепрыпасаў. Уцякаючы, яны падпалілі склад, але ён не ўзарваўся.

«З самай царквы расіяне скралі іконы. І абасралі ўсё, што толькі можна. За царскай брамай проста зладзілі прыбіральню. Гэтак жа абгаджаная і школа, дзе размяшчаліся расійскія падраздзяленні. Рэшткі ежы, парнаграфія, кінутая зброя і амуніцыя – гэтае месца хутчэй нагадвае нейкі лагер бамжоў. У куце байцы «другой арміі свету» зладзілі «месца кахання» – некалькі матрацаў на падлозе, крэм для рук і расійскія парнаграфічныя часопісы. Думаў, такое ўжо гадоў дваццаць ніхто не друкуе«, – расказвае Аляксей Кашпораўскі.

 

Вайна ва Ўкраіне. У Харкаве паболела ахвяраў ад расійскіх атак. Загінула трое чалавек і яшчэ чацвёра параненыя

Навіна ад

Расійскія войскі атакавалі Харкаўскую ЦЭЦ увечары 11 верасня. Двое яе працаўнікоў загінулі і яшчэ двое атрымалі раненні. Уначы расіяне зноў ударылі па горадзе. Часткова разбураны 5-павярховы жылы дом. 1 чалавек загінуў, 2 атрымалі раненні.

Пра тое ў тэлеграм-канале паведамляе кіраўнік абласной ваеннай адміністрацыі Алег Сінягубаў. Ён піша, што па Харкаве ўначы расійскія войскі стралялі з ракетных комплексаў С-300. Па яго словах папярэдне вядома пра 1 загінулага і 2 параненых.

У выніку расійскіх удараў па аб’екце крытычнай інфраструктуры 11 верасня колькасць загінулых павялічылася да двух чалавек. Яны былі працаўнікамі прадпрыемства.

«Каля 20:00 11 верасня вораг нанёс ракетны ўдар па Халаднагорскім раёне, пашкоджаны абʼект крытычнай інфраструктуры. 2 работнікі загінулі. Ратавальнікі амаль усю ноч лакалізавалі маштабны пажар», – адзначае Сінягубаў.

Расійскія войскі ўдарылі па Харкаўскай ЦЭЦ. У многіх раёнах гораду прапала святло і вада. У сетках паведамлялі, што ў Харкаве спынілася метро.

«У выніку расійскіх ракетных удараў знікла электразабеспячэнне ў Харкаве і на значнай частцы Харкаўскай вобласці. Таксама без электрычнасці не працавалі помпы, якія падаюць ваду ў дамы людзей. Цяпер у вобласці адноўлена 80% электразабеспячэння і водазабеспячэння. Работы працягваюцца», – адзначае Алег Сінягубаў.

Акрамя Харкаўскай вобласьці былі цалкам абясточаныя Данецкая вобласць, часткова – Запарожская, Днепрапятроўская і Сумская, піша інфармацыйная агенцтва «УНІАН».

У Сумскай, Днепрапятроўскай і Палтаўскай абласцях удалося цалкам аднавіць электразабеспячэнне.

 

Вайна ва Ўкраіне. Вызваленыя больш за 3000 квадратных кіламетраў акупаваных Расіяй тэрыторыяў

Навіна ад

Пра тое кажа галоўнакамандуючы Ўзброеных сіл Украіны Валерый Залужны.

Паводле яго, да дзяржаўнай мяжы засталося 50 км.

«Узброеныя Сілы Украіны працягваюць вызваленне акупаваных Расіяй тэрыторый. З пачатку верасня больш за 3000 кв. км вернутыя пад кантроль Украіны. На Харкаўскім напрамку мы пачалі прасоўвацца не толькі на поўдзень і ўсход, але і на поўнач. Да выхаду на дзяржаўную мяжу застаецца 50 км», – адзначае на сваёй фэсбукавай старонцы Залужны.

scontent-frt3-2.xx.fbcdn.net

У Фэйсбуку ён апублікаваў фота з вынікамі працы некалькіх падраздзяленняў узброеных сілаў Украіны. Яны, па яго словах, вызвалілі пасёлкі Байрак, Новая Гусараўка, Шчураўка і Альхаватка.

«Авалоданне дужа ўмацаванымі раёнамі расійскіх войскаў, якія яны ганарліва назвалі «Масква», «Омск» і «Піцер», дазволіла разгарнуць контрнаступленне на Балаклею, Разынкі і Купянск. Ганаруся і ўдзячны кожнаму ўкраінскаму вайскоўцу. Маю за гонар змагацца бок аб бок з вамі. Вечная памяць загінулым у баях за Украіну!» – піша галоўнакамандуючы.

scontent-frt3-2.xx.fbcdn.net

Тым часам, з-пад расійскай акупацыі вызваленае паселішча Чкалаўскае, што ў Харкаўскай вобласці, перадае  інфармацыйнае агенцтва «УНІАН», спасылаючыся на заяву прэзідэнта Ўладзіміра Зяленскага.

Выданне нагадвае, што, паводле дадзеных Генеральнага штабу, у апошнія дні ўзброеныя сілы Ўкраіны вызвалілі або ўзялі пад кантроль больш за 30 паселішчаў, часова захопленых расійскімі войскамі ў Харкаўскай вобласці, у тым ліку і горад Балаклея.

10 верасня прэзідэнт Уладзімір Зяленскі аб’явіў, што з пачатку верасня ўзброеныя сілы Ўкраіны вызвалілі каля 2 тыс. км тэрыторыі і рушэнне вайскоўцаў на розных напрамках фронту працягваецца.