Сёння, 29 чэрвеня ў Магілёве працягваюцца святочныя мерапрыемствы з нагоды Дня горада. На вуліцы Ленінскай з 12 гадзіны і да 18.00 праходзіць выстава-кармаш рамеснікаў, а таксама стаяць палаткі з пачастункамі. Моладзевае свята праходзіць таксама ў парку ў Падміколлі.
Вечарам гараджан чакае яшчэ канцэрт Магілёўскай гарадской капэлы ў Тэатральным скверы (пачатак у 16.00) і выступленне духавога аркестра ў скверы 40-гаддзя Перамогі (з 18.00 да 20.00).
Пабывалі на Дні горада ў Падмікольскім парку. Перадаем вам настрой дажджлівага свята праз гэтую невялікую падборку.
Асноўнай пляцоўкай свята стаў парк у Падміколлі. Тут размясціліся гандлёвыя палаткі з шашлыкамі і рознымі пачастункамі. А 12.00 у парку стартаваў забег “Магілёў, бягом за львом”. Нягледзячы на дажджлівае надвор’е, мерапрыемства сабрала пару дзясяткаў наведвальнікаў, а некаторыя з удзельнікаў забегу нават крэатывілі з вобразамі льва.
Магілёў некалькі год запар упрыгожваюць вялікай колькасцю сцягоў. І гэта сцягі не гораду і не афіцыйная сімволіка краіны. З развешвання сцягоў пачынаецца падрыхтоўка да святкавання Дня гораду. Яго адзначаюць сёння, 28 чэрвеня.
На слупах, мастах і адмысловых падстаўках пераважаюць чырвоныя і аранжавыя сцягі. Спалучэнні чырвонага і зялёнага таксама выкарыстоўваюцца, як напрыклад, на плошчы Леніна. Белымі і сінімі ўпрыгожаная плошча Адзінства.
Афіцыйнага тлумачэння, чаму для аздаблення Магілёва ўзятая чырвоная і аранжавая каляровая гама няма. Адсутнічае інфармацыя, чаму масава не выкарыстоўвацца на Дзень гораду яго сімволіка – сцяг і герб.
Летась паведамлялася, што 20 тысяч сцягоў ўпрыгожаць Магілёў.
Тое прадугледжвала канцэпцыя, распрацаваная службай галоўнага архітэктару. Паводле яе сцягі расквечвання замацоўваюцца ў адмысловых канструкцыях і на апорах мастоў. Тканіну для сцягоў мелася даць акцыянернае таварыства «Магатэкс».
«Святочнае афармленне гораду спрыяе стварэнню ўрачыстай атмасферы, – даводзілі чыноўнікі. – Спадзяемся, што ўсё створанае і ўсталяванае гарманічна ўпішацца ва ўжо існуючае гарадское асяроддзе з яго архітэктурнымі і ландшафтнымі асаблівасцямі».
Праект рэалізоўваўся з тым, каб сцягі можна было выкарыстоўваць шматразова.
«У далейшым, – абяцалі чыноўнікі, – колькасць элементаў святочнага ўбрання гораду будзе павялічвацца і дапаўняцца новымі цікавымі і больш сучаснымі варыянтамі».
Сёлета ўпрыгожваць сцягамі Магілёў да Дня гораду пачалі пару тыдняў таму. Як і летась яны паўсюдна. Не звярнуць на іх увагу не магчыма. Асабліва праязджаючы праз масты.
Падобнае ўпрыгожванне гарадскіх вуліц можна пабачыць у фільмах пра савецкае жыццё ў 1930-х гадах. Багата іх выкарыстоўвалі і ў пазнейшы савецкі час, напрыклад, на важныя ідэалагічныя святы.
«Гэта стылістыка 1950 гадоў і на Дзень гораду музыка бярэцца ў асноўным 1940-70 гадоў. Гэта сведчыць пра тое, у якім часе жывуць ідэолагі. Песні, якімі прызнаюцца ў любові да «сінявокай», сітуацыі не ратуюць, а толькі наганяюць смутку», – дзеліцца ўражаннямі ад святочнай абстаноўкі адна з гараджанак.
Рознакаляровыя сцягі прыйшлі ў Магілёў, настойваюць мясцовыя жыхары, пад уплывам такой «моды» у сталіцы. Паводле іх там засілле падобнага аздаблення яшчэ большае, чым у Магілёве.
