Магілёўскі аблсуд любіць даты ў гісторыі, звязаныя з Расіяй. Даты, важныя ў станаўленні беларускага правасуддзя, звычайна абыходзіць увагай.
Напрыканцы кастрычніка mogilev.media ўжо звяртала ўвагу на тое, як Магілёўскі аблсуд у сваім тэлеграм канале захапляўся тым, што ў 1696 годзе Баярская дума зацвердзіла ўказ Пятра I датычны развіцця суднабудаўніцтва. Пра тое, што Магілёў у той час ніякага дачынення да Расіі не меў, і пра тое, што гэты самы расійскі цар потым ушчэнт спаліў Магілёў, у цяперашнім Магілёўскім аблсудзе робяць выгляд, што не ведаюць.
Так і 11 лістапада аблсуд узгадаў, што ў гэты дзень у 1922 годзе Усерасійскі Цэнтральны выканаўчы камітэт прыняў пастанову “Аб уводзе ў дзеянне Палажэння аб судаўладкаванні РСФСР”.
“Так пачыналася новая эпоха савецкага правасуддзя, якая стала асновай для наступнага развіцця судовай сістэмы ў нашай краіне” – гаворыцца ў паведамленні.
Цяжка зразумець радасць ад станаўленне таго правасуддзя, якое кіравалася класавым прынцыпам і якое дапускала пазасудовыя разгляды спраў – “тройкі” трыццатых гадоў, калі судзілі без права на адваката мільёны ні ў чым не павінных людзей. Сталінскія палітрэпрэсіі – гэта менавіта прадукт “новай эпохі савецкага правасуддзя”, дзе, ўзгадваючы слова сумнавядомага пракурора Вышынскага, прызнанне было царыцай доказаў.
Акрамя агіднага ўсхвалення савецкага рэпрэсіўнага правасуддзя, Магілёўскі аблсуд яшчэ і лічыць РСФСР сваёй краінай. Пэўна, работнікам гэтага суда хочацца вярнуцца, у тыя гады, калі Магілёў сапраўды належаў РСФСР, да таго, як з першым узбуйненнем БССР ён быў вернуты Беларусі. Іншага тлумачэння такога апантанага пакланення расейшчыне знайсці цяжка.
Дарэчы, аналагічную, але сваю, пастанову ўвёў у дзеянне 15 красавіка 1923 года і ЦВК БССР. Сёлета пра гэту дату Магілёўскі аблсуд не ўзгадаў. Цікава, ці напіша ў наступным годзе? Чамусьці, не верыцца.
Фотаздымак з адкрытых крыніц