Дыпломны спектакль выпускнікоў Магілёўскага дзяржаўнага каледжа мастацтваў выйшаў за межы навучальнай установы з блаславення чыноўніцы гарвыканкама, а пасля спектакляў з глядачамі працуюць праваахоўнікі і людзі з камісіі па справах непаўналетніх.
Па паведамленні БелТА, паказы спектакля «ТыкТокеры» з поспехам праходзяць у Магілёве і Магілёўскім раёне. Гэты праект стаў магчымым не толькі дзякуючы таленту маладых артыстаў, але і з бласлаўлення чыноўнікаў – зусім як у часы Фурцавай.
Дыпломная работа выпускнікоў Магілёўскага дзяржаўнага каледжа мастацтваў першапачаткова павінна была застацца ў сценах навучальнай установы, але…
«Спектакль выйшаў на шырокую публіку і стаў сапраўднай падзеяй для абласнога цэнтра дзякуючы намесніцы старшыні камісіі па справах непаўналетніх Магілёўскага гарвыканкама Іне Караткевіч. Яна, убачыўшы экзаменацыйную работу выпускнікоў каледжа мастацтваў, была ўражана і ініцыявала яе выязны фармат» — адзначаецца ў паведамленні. А яшчэ, пасля кожнага спектакля адбываецца абавязковы “прававы палілог з удзелам усіх зацікаўленых, у тым ліку праваахоўнікаў і прадстаўнікоў камісіі па справах непаўналетніх.”
Аўтарка п’есы — расіянка Жанна Шамай.
Фота: БелТА.
