Сапраўдны клоўн з імем “Пузырык” цяпер забаўляе дзяцей падчас працяглых спатканняў з асуджанымі роднымі ў шклоўскай калоніі №17, дзе гінуць палітвязні.
Як стала вядома выданню MAYDAY, дзецям у так званай гасцініцы для працяглых спатканняў (1-3 дні) з асуджанымі роднымі на тэрыторыі калоніі паказваюць фокусы, іх забаўляюць, каб у іх не было адчування знаходжання ў пенітэнцыярнай установе. Такім чынам адміністрацыя калоніі дамагаецца новых падзяк ад сваякоў вязняў.
Гасцініца ў шклоўскай калоніі па-ранейшаму застаецца лепшай у сістэме Дэпартамента выканання пакаранняў МУС Беларусі. Напрыклад, у жывым кутку там гуляюць паўліны.
Як раней паведамлялася, таксама там з’явілася кавамашына для наведвальнікаў. Акрамя таго, у калоніі ёсць сваё атэлье, дзе асуджаныя пры наяўнасці грошай на асабовым рахунку могуць перашыць турэмную робу пад сябе і нават выбраць матэрыялы лепей.
Такім чынам, шклоўская калонія з’яўляецца самай перадавой з пункту гледжання паказнога камфорту, але пры гэтым жыццё палітвязня ў ёй нічога не вартае. У пачатку гэтага года там памёр палітзняволены Валянцін Штэрмер, а 21 мая 2021 года ў ёй жа загінуў палітычны актывіст Вітольд Ашурак.
Фота: Google maps