4-гадовая Ліза Дзмітрыева загінула падчас абстрэлу расійскімі войскамі ўкраінскай Вінніцы 14 ліпеня. Яны з маці ішлі да лагапеда. Дзяўчынка была з сіндромам Дауна, у паўгода перанесла цяжкую аперацыю на сэрцы.
Паводле экспертаў, дзяўчынка загінула адразу. Маці з цяжкімі раненнямі шпіталізавалі. Родныя не казалі ёй, што дачкі ў яе больш няма, бо непакоіліся, ці перанясе яна такую трагедыю. Дзяўчынку пахавалі 17 ліпеня.
«Любоў мая, любімая дзяўчынка, ты была такой вясёлай і навучыла мяне кахаць безумоўна, нягледзячы ні на што! Нажаль, так мала я была тваёй мамай, так мала… Мы абавязкова цябе сустрэнем. Маё сэрца назаўжды з табой, мая душа плача» – напісала ў Фэйсбуку Ірына Дзмітрыева.
У допісе яна адзначыла, што расіянам няма даравання за іхныя злачынствы, учыненыя ва Ўкраіне.
«Я не ведаю, чаму засталася жыць на гэтай зямлі, я не разумею, чаму. – адзначае ў допісе жанчына. – Проста патрэбны час. Але пакуль не хочацца верыць, як у страшны даўні сон».
«Я дзякую ўсім за падтрымку – родным, сваякам, сябрам, знаёмым, людзям, якіх я нават не ведаю, – гаворыцца ў допісе Ірыны Дзмітрыевай. – Вы з Лізуняй шмат зрабілі для нас, падтрымалі. Дзякую ўсяму свету».
Падчас атакі расіян на Вінніцу загінулі яшчэ двое хлопчыкаў сямі і васьмі гадоў.
Адзін з іх знаходзіўся на абследаванні ў лякарні і памёр разам з маці. Другі чакаў дзядзьку ў прыпаркаванай машыне.
14 ліпеня ў 10.45 Расія нанесла ракетны ўдар па Вінніцы ракетамі тыпу «Калібр» з падводнай лодкі з акваторыі Чорнага мора.
Загінулі 24 чалавекі. Медычная дапамога была аказана 202 пацярпелым.
