Касплэй па-беларуску – у процівагу бел-чырвона-беламу палотнішчу, з якім выходзяць беларусы Варшывы, прапагандысты прыдумалі яшчэ большы чырвона-зялёны сцяг. Цікава, ці будуць яны называць яго “глістом”?
Агромністае бел-чырвона-белае палотнішча стала прыкметнай з’явай беларускіх святочных мерапрыемстваў у Варшаве. У гэтым годзе яго ўжо двойчы выносілі на вуліцы польскай сталіцы прадстаўнікі беларускай дыяспары – на акцыі “Не мой выбар!” у дзень імітацыі прэзідэнцкіх выбараў у Беларусі 26 студзеня і на “Дні Волі”. Крэатыўныя беларускія акцыі ў Варшаве прыводзілі ў шаленства беларускіх прапагандыстаў, якія называлі 330-метровае бел-чырвона-белае палотнішча “глістом”.
А цяпер яны самі пашылі такога ж самага, толькі 500-метровага чырвона-зялёнага “гліста”. “Дзяржаўны флаг даўжынёй 500 м і вагой больш за 400 кг пранясуць 11 мая ў Мінску” – паведаміў намеснік старшыні РГА “Белая Русь” Андрэй Басак. Сцяг быў пашыты на магілёўскім прадпрыемстве “Магатэкс”, а несці на мерапрыемстве ў Мінску яго будуць 700 чалавек.
Фота: mogilev.media