46-гадовы галоўны пуцінскі канструктар зброі Дзмітрый Канаплёў памёр пры загадкавых абставінах, «праходзячы лячэнне ад трывогі і дэпрэсіі» тады, калі ва Украіне бушуе вайна, піша брытанская штодзённая газета-таблоід The Daily Mail.
Дзмітрый Канаплёў узначальваў канструктарскае бюро прыбораў імя Шыпунова, якое спраектавала ракетны комплекс «Панцыр», які выкарыстоўваецца Расіяй у вайне супраць Украіны. Гэтай арганізацыяй распрацавана больш за 150 адзінак узбраення і ваеннай тэхнікі, якія знаходзяцца на ўзбраенні расійскай арміі.
Раней Канаплёў займаў пасаду намесніка дырэктара Федэральнага агенцтва па пастаўках узбраення, вайсковай, спецыяльнай тэхнікі і матэрыялаў.
Дзмітрый Канаплёў памёр 22 ліпеня. Спачатку ў Расіі замоўчвалі прычыны смерці Канаплёва, але пазней з’явілася інфармацыя, што ён сканаў падчас «лячэння» ад дэпрэсіі.
i.dailymail.co.uk
«Відавочна, што ён памёр пасля вострай трывогі», – лічыць выданне The Daily Mail. Яно нагадвае, што першапачаткова паведамлялася, што лекары не змаглі высветліць прычыну яго смерці.
У элітнай маскоўскай клініцы Канаплёў перанёс «востры інфаркт» падчас праходжання ксенонатэрапіі, спасылаючыся на расійскую газету «Известия», піша The Daily Mail.
Гэта лячэнне, пры якім пацыенты ў кіслароднай масцы ўдыхаюць ксенон, які валодае ўласцівасцямі, падобнымі да антыдэпрэсантаў, выкарыстоўваецца для барацьбы з трывогай, дэпрэсіяй, неўралагічнымі захворваннямі і праблемамі са сном.
Канаплёў пакутаваў ад трывогі і галаўнога болю, падсумоўвае брытанскае выданне, выкліканых развязанай Пуціным вайной ва Украіне.