Сітуацыя з Бабруйскім касцёлам – яго не забіраюць, а, відаць, наадварот аддадуць вернікам

Таксама нічога не пагражае касцёльнаму аргану, разабраліся журналісты.

Беларуская грамадскасць узрушана ўспрыняла навіну пра тое, што ў Бабруйскіх каталікоў забіраюць адзіны касцёл. Пра гэта пісалі mogilev.media, калі інфармацыі пра сітуацыю са святыняй было вобмаль – фактычна, толькі запіс у Фэйсбуку аднаго з вернікаў. 

“Вячэрні Бабруйск” паразмаўляў з пробашчам бабруйскага касцёла Беззаганнага Зачацця Прасвятой Дзевы Марыі Андрэем Яркаўцом і даведаўся, што сітуацыя не такая змрочная, як меркавалася ўчора.

Аказалася, што касцёл і не належыў каталіцкай абшчыне, а быў перададзены ёй у бескаштоўную арэнду. Цяпер жа, каб перадаць будынак ва ўласнасць касцёла, трэба, каб перад тым аплачвалася ягоная арэнда. Гэтаксама плаціў за арэнду магілёўскі касцёл, а потым атрымаў здание на 5 год у бязвыплатнае карыстанне.

Такім чынам, учорашнюю навіну неабходна чытаць так – у бабруйскіх каталікоў не забіраюць касцёл, а наадварот, відаць, рыхтуюць яго да перадачы вернікам.

Гэтаксама абвяргаецца інфармацыя пра тое, што аргану ў бабруйскім касцёле нешта пагражае і яго ледзьве не збіраюцца разбіраць.

– Улады і раней прапаноўвалі перадаць суполцы ўвесь комплекс: і будынак касцёла, і пяціпавярховую прыбудову да яго. – напісала на сваёй старонцы ў Фэйсбуку журналістка Любоў Лунёва – Але праблема ў тым, што парафія не мае такіх сродкаў, каб знесці непатрэбную ёй прыбудову, якая толькі псуе выгляд святыні. Да таго ж, няма сродкаў, каб гэтыя плошчы ахоўваць.

Фота з адкрытых крыніц.