Жорсткая навальніца абрынулася на Магілёў і вобласць гэтай ноччу

Цэнтр горада завалены дрэвамі, парваныя лініі электраперадач. Аварыйныя брыгады працуюць па ўсёй Магілёўшчыне.

Штармавое папярэджанне, абвешчанае “Белгідраметам” на дзень 10 ліпеня пераўзышло ўсе чаканні. Мала таго, што пачалася навальніца яшчэ ноччу – у 02:13 “Белгідрамет” вымушаны быў тэрмінова абвяшчаць трывогу зноў – маштаб разбурэнняў аказаўся непараўнальным з усім, што мы бачылі ў папярэднія гады.

Дрэвы з коранем выдзірала на цэнтральных вуліцах Магілёва. Заваленымі аказаліся ўчасті на вуліцы Першамайскай, праспекце Міра, на вуліцы Грышына каля “Алімпійца” – ды, лічы, па ўсім горадзе. Адбыліся шматлікія абрывы ліній электраперадач. З-за абрыву лініі, спыніліся тралейбуся ў раёне “Аблспажыўсяюза”, паведамляе тэлеграм-канал “Магілёў – мой горад!”. Кіроўцаў папярэдзілі, каб не карысталіся гэтым участкам дарогі на час рамонтных прац.

Стыхія ўдарыла перш за ўсё па ўсходу Беларусі, пацярпелі Магілёўская і Віцебская вобласці. Па краіне зараз працуе каля 60 рамонтных брыгад для пераадолення наступстваў стыхіі.

Фота: “Магілёў – мой горад!”