Склады на Магілёўшчыне заваленыя нераспрададзенай беларускай грэчкай

Ураджай 2023 года нават не ідзе ў продаж – на складах застаецца нерэалізаваная прадукцыя яшчэ з мінулага года. Прычына ў тым, што беларускі тавар не можа канкураваць з расійскай прадукцыяй з-за высокіх коштаў.

Запасы грэчневай крупы на Магілёўшчыне ў снежні мінулага года склалі больш за 800 тон, пры тым што сярэднемесячная рэалізацыя складала ўсяго 85 тон. Так, на складах Клімавіцкага камбіната хлебапрадуктаў заставалася 91 тона грачаных круп пры сярэднямесячнай рэалізацыі 14 тон, Бабруйскага КХП – 236 пры рэалізацыі 23, на Горацкім элеватары лічбы склалі 475 і 48 тон адпаведна. Пры гэтым ураджай 2023 года ў справу не ішоў, бо заставаліся значныя запасы яшчэ з мінулагодняга ўраджаю, тэрмін прыдатнасці якога ўсяго 20 месяцаў.

Прычына такіх значных складскіх залежаў простая – магілёўскія арганізацыі гандлю і грамадскага харчавання неахвотна бяруць беларускую грэчку. Яна значна саступае па канкурэнтных коштах расійскай. У рознічнай сетцы можна знайсці беларускую грэчку па кошце ў 2,94 рублі за кілаграм, у той час як расійская прадаецца ў дыяпазоне 2,09 – 2,40 рублёў за кілаграм.

Больш высокі кошт беларускага прадукта тлумачыцца тым, што адпаведна пастанове Мінсельгасхарчу, двойчы, у 2022 і 2023 гадах падымаліся закупачныя цэны на грэчку ў сельскагаспадарчых прадпрыемстваў. У 2022 годзе закупачныя кошты выраслі на 44,2% ў параўнанні з 2021 годам, у 2023 – яшчэ на 6,3% – піша “СБ-Беларусь сегодня”. У выніку беларускія вытворцы грэчневай крупы не могуць выйсці на цэны, адпаведныя расійскім канкурэнтам. Па гэтай прычыне ў большасці гандлёвых аб’ектаў кошт беларускай грэчкі вышэйшы за расійскую на 10-15%.

Фота: БелТА