Навіны пабрацімаў. Рэкордныя аб’ёмы атрыманай з Украіны сельгаспрадукцыі экспартуецца з Клайпедскага порту

Мясцовая марская грузавая кампаніі «Bega» наладавала танкер 15 тысячамі тон украінскага сланечнікавага алею. Гэта адна з найбуйнейшых партый украінскіх грузаў, якую адправілі з Клайпедскага порту.

Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці

Танкер, які вывез алей, унікальны, бо ім раней выпраўлялі ў свет буйную партыю нафты, экспартаванай Украінай.

«Bega» працягвае атрымліваць як вадкую, так і сыпкую сельгаспрадукцыю з Украіны. У порце кампаніі зарэзервавалі частку грузапад’ёмнасці для ўкраінскіх тавараў. Акрамя алею, вывезеныя ўкраінская кукуруза ды збожжа.

Паводле прадстаўнікоў кампаніі, з мая яна прымае чыгуначныя саставы з кантэйнерамі і аўтамабільны транспарт, які вязе з Украіны як нафту, так і сыпкую сельгаспрадукцыю, піша інтэрнэт-рэсурс Atvira Klaipeda.

«Рыхтуючыся да сезону экспарту літоўскага збожжа, мы прынялі пэўныя інвестыцыі і арганізацыйныя рашэнні, каб падзяліць украінскія і літоўскія грузапатокі і забяспечыць іх бесперабойны прыём і пагрузку», кажа прадстаўнік кампаніі.

Цяпер, паводле яго, кампанія прымае і захоўвае як украінскую, так і літоўскую сельскагаспадарчую прадукцыю новага ўраджаю.

«Мы ўжо загружаем на караблі першыя партыі сёлетняга ўраджаю літоўскага рапсу і іншых збожжавых культур» – адзначае прадстаўнік кампаніі ў інтэрвʼю выданню.

Atvira Klaipeda піша кампанія «Bega» кіруе некалькімі тэрміналамі ў Клайпедскім порце, у тым ліку наліўных грузаў, які адаптаваны для перавалкі ўкраінскай нафты, сыпкіх угнаенняў, мінеральных матэрыялаў, цэменту.

Тэрмінал лічыцца адным з найбуйнейшых і сучасных для складавання сельскагаспадарчай прадукцыі ў Балтыйскім рэгіёне. У ім адначасова можа захоўвацца да 450 тысяч тон сыпкіх сельскагаспадарчых прадуктаў, а за год ён можа прапусціць праз сябе блізу 4 мільёнаў тон грузаў.

Дамова аб Пабрацімстве Клайпеды і Магілёва была падпісана 8 сакавіка 1997.

27 лютага 2022 году, на трэці дзень уварвання расійскіх войск ва Ўкраіну, мэр Клайпеды заявіў аб спыненні пабрацімскіх сувязяў з расійскімі і беларускімі гарадамі. Паводле яго ён звярнуўся да кіраўніцтва гарадоў партнёраў, каб тыя супраціўляліся агрэсіі супраць Украіны, але рэакцыі не было. У афіцыйным спісе гарадоў пабрацімаў Клайпеды Магілёва няма.

Магілёў. media працягвае сачыць за жыццём Клайпеды, нягледзячы на спыненне партнёрскіх сувязяў з Магілёвам са спадзевам, што пабрацімства між гарадамі адновіцца.

Клайпеда месціцца на захадзе краіны і з’яўляецца портам на Балтыйскім моры. Насельніцтва 160 тысяч чалавек.

фота: atviraklaipeda.lt