Warning: "continue" targeting switch is equivalent to "break". Did you mean to use "continue 2"? in /var/www/mogilev_medi_usr/data/www/mogilev.media/wp-content/plugins/telegram-for-wp/inc/Notifcaster.class.php on line 318 Новости Навіны - Page 391 of 718 - Магілёў.media - Новостной Портал mogilev.media
Культработнікі ў псеўданародных касцюмах прыехалі ў поле таньчыць і пець песні, каб павесяліць камбайнёраў.
Прыезд у поле артыстаў дома культуры быў арганізаваны нібыта для таго, каб крыху павесяліць і даць адпачыць камбайнёрам, якія ва ўсю працуюць на жніве. Забаўляць іх работнікі крычаўскага раённага цэнтра культуры прыехалі з народным і вясёлым рэпертуарам.
Прычым для гэтага “мерапрыемства” культработнікі апрануліся ў псеўданародныя касцюмы. Выглядае гэта, канешне, прыніжальна – у першую чаргу, для саміх супрацоўнікаў раённага цэнтра культуры.
Між іншым, у крычаўскім цэнтр культуры адзначылі, што падобныя палявыя выступленні будуць праходзіць ва ўсіх сельгаспрадпрыемствах раёна падчас усёй уборачнай кампаніі – паведамляе раённая газета “Крычаўскае жыццё”.
Пачаліся рэйды настаўнікаў па пляжах Магілёўскага раёна – паведамляе “Прыдняпроўская ніва”. На фота – педагогі Усходаўскай сярэдняй школы падчас работы з школьнікамі на адным з вадаёмаў раёна.
Раённае свята, прысвечанае дню святых Пятра і Паўла пачнецца ў аграгарадку Каменка “Чавускага раёна сёння ў 12:00. У праграме – заплятанне традыцыйнага вянка з дванаццаці траў, дзіцячы квест, конкурс “Пятроўскія дранікі”. Пачнецца мерапрыемства з хроснага хода і асвячэння крынічкі – перадае газета “Іскра”.
З-за рэканструкцыі маста на трасе паміж Дашкаўкай, Боўшына і Досавай Сялібай Магілёўскага раёна, рух па мосце праз Лахву пачынаючы з 19 ліпеня і да 30 лістапада 2023 года будзе перакрыты – паведамляе “Прыдняпроўская ніва”.
Днём 11 ліпеня дзве жанчыны, маці і дачка пайшлі ў лес па ягады каля вёскі Лыкава Магілёўскага раёна. У 14:43 яны патэлефанавалі выратавальнікам, бо не змаглі самі выйсці з лесу. Выратавальная аперацыя доўжылася некалькі гадзін – паведамляе прэс-служба МНС. Жанчын знайшлі ў шасціста метрах ад вёскі Бароўка ў добрым стане.
Сусветны дзень бортправадніка (World Civil Aviation Flight Attendant Day)
Прафесія мае амаль векавую гісторыю. Яна ўзнікла ў Германіі ў 1928 годзе, калі на борт самалёта сталі браць спецыяльнага чалавека, у чые абавязкі ўваходзіла забеспячэнне сэрвісу падчас палёту – сцюарда. Раней гэтым займаўся другі пілот самалёта.
Спачатку функцыі бортправаднікоў выконвалі мужчыны – часцей за ўсё імі былі былыя афіцыянты дарагіх рэстаранаў. У 1930 годзе ў ЗША узнікла ідэя прыцягнуць да працы прывабных дзяўчат – гэта павінна было стаць дадатковай рэкламай пасажырскіх авіяперавозак. Існаваў і яшчэ адзін довад на карысць прадстаўніц прыгожага полу: яны менш важылі, што мела вялікае значэнне для самалётаў таго часу.
Першай сцюардэсай у гісторыі авіяцыі называюць Элен Чэрч (1904-1965) са штата Аёва (мела вагу 52 кг). У свой першы палёт у гэтай якасці яна адправілася 15 мая 1930 года па рэйсе Сан-Францыска – Шаен.
Зараз пры падборы персанала выкарыстоўваецца прынцып “трох В”: выява вонкава (гаворка, міміка, макіяж, прывабнасць), вобраз унутраны, вобраз прафесійны (веды і навыкі).
Дзень Святых Першавярхоўных апосталаў Пятра і Паўла (праваслаўная канфесія). Заканчэнне Пятрова паста.
Абодва апосталы шмат зрабілі ў распаўсюджванні Хрыстовай веры і абодва ў пакутах загінулі ў Рыме пры імператары Нероне.
Пятро і Паўла дзень на гадзіну зменшылі.
Прыйшоў Пятрок і сарваў лісток.
Пятро-Паўла спякоты дадаў.
Пачынаюць цямнець ночы.
Салавей спявае да Пятрова дня.
На Пятроў дзень і зязюля перастае кукаваць.
Рачное купанне ў гэты дзень ачышчае ад любадзейных грахоў.
Дзень святой Веранікі – заступніцы фатаграфіі. Дзень фатографа.
Калі асуджаны на смерць Ісус Хрыстос ішоў на гару Галгофу, несучы Свой крыж на распяцце і ўпаў, Вераніка, падбегла да Яго, напаіла вадой і дала свой поплатак, выцерці пот з твару. Вярнуўшыся дадому, Вераніка выявіла, што на тканіне захавалася святое аблічча Збавіцеля. Гэты поплатак з часам патрапіў у Рым і стаў тут вядомым пад імем Нерукатворнай выявы.
У эпоху Сярэднявечча амаль кожная царква мела выяву Веранікі з яе гаспадаром (потавым поплаткам). У містэрыях Сярэднявечча Вераніка таксама заняла трывалае месца і дагэтуль з’яўляецца галоўнай фігурай шостага прыпынку Крыжовага шляху.
Мяркуюць, што імя Веранікі ўяўляе сабой скажонае ад лацінскага vera icon (“сапраўдная выява”) – так звалі “плат Веранікі”, адрозніваючы яго ад іншых вобразаў Хрыста.
Дарэчы, адзначаць Дзень фатографа 12 ліпеня было вырашана яшчэ і таму, што ў гэты дзень у 1854 годзе нарадзіўся Дж. Істмэн – заснавальнік кампаніі Kodak.
1843 год. Памёр Ігнат Даніловіч (1787-1843).
Беларускі гісторык права і археограф.
Адзін з першых даследчыкаў летапісных і заканадаўчых помнікаў ВКЛ. Прафесар. Упершыню апісаў усе рукапісныя і друкаваныя экзэмпляры Статута ВКЛ, упершыню апублікаваў беларуска-літоўскі летапіс 1446 года.
Марыў пра адраджэнне літоўска-беларускай дзяржавы і мовы Статутаў ВКЛ.
1876 год. Італьянка Марыя Спелтэрына перайшла па канаце праз Ніягарскі вадаспад.
23-гадовая цыркавая артыстка М. Спелтэрына за 11 хвілін перайшла па канаце праз вадаспад, затым за 10 хвілін вярнулася назад, рухаючыся спіной наперад.
Праз тыдзень яна паўтарыла пераход ужо з завязанымі вачыма, а яшчэ праз некалькі дзён – са скаванымі кайданкамі рукамі і нагамі.
1909 год. Магілёўская губерня аб’яўлена на пагражальным становішчы па халеры.
Упершыню з халерай магілёўцы пазнаёміліся ў 1831 годзе. Як пісаў ігумен Арэст, «1831 года, у сярэдніх датах мая адкрылася ў Магілёве хвароба, ніколі не чутная, так званая халера, ад якой вельмі шмат памерла габрэяў і хрысціян, падобная маравой язве; па 30 і больш чалавек за дзень памірала… у Магілёве каля трох месяцаў працягвалася…».
І ў 1872 годзе халера нагадала аб сабе, накрыўшы 5 паветаў губерні.
1916 год. У г. Горкі нарадзіўся Лаўрэнцій Абецэдарскі (1916-1975).
Беларускі гісторык. Доктар гістарычных навук, прафесар, член-карэспандэнт АПН СССР.
Стваральнік навуковай школы вывучэння дасавецкага перыяду гісторыі Беларусі.
Крытык тэорыі «залатога веку» ў гісторыі ВКЛ.
Суаўтар дапаможніка для школ “Гісторыя БССР” (1960-1987), двух- і пяцітомнай «Гісторыі Беларускай ССР».
1917 год. Пад бельгійскім горадам Іпр супраць англа-французскіх войскаў Германія ўжыла хімічную зброю – іпрыт.
Вадкі атрутны гарчычны газ скурна-нарыўнага дзеяння быў выкарыстаны з мэтай сарваць наступ англа-французскіх войскаў.
Іпрыт уздзейнічае на вочы і органы дыхання, страўнікава-кішачны тракт і скураныя пакровы. Усмоктваючыся ў кроў, ён праяўляе і агульнаатрутнае дзеянне.
Рэальнай абароны войскаў ад іпрыту ў тыя гады не было, і ўжыванне яго на поле бою было эфектыўным да самага канчатка вайны.
На працягу Першай сусветнай вайны хімічныя рэчывы прымяняліся ў велізарных колькасцях: 12 000 тон іпрыту, якім было атручана каля 400 000 чалавек.
Цяпер хімзброя забаронена Канвенцыяй аб забароне хімічнай зброі 1993 года.
1920 год. РСФСР паводле Маскоўскай дамовы прызнала Літоўскую Рэспубліку і яе правы на значную частку тэрыторыі Беларусі.
Па дамове была скасавана Літоўска-Беларуская ССР, якая дэ-юрэ існавала з 27 лютага 1919 па 31 ліпеня 1920 года.
Пазней, у кастрычніку 1939 год пераважна беларускі па насельніцтву Віленскі край адышоў ад БССР да Літвы.
Герб Літвы
1942 год. У нью-ёркскім бары “Зялёны папугай” забіты яго ўладальнік Макс Гелер.
Злачынства было раскрыта дзякуючы папугаю, які назваў імя забойцы.
Птушка “выступала” нават на судовым працэсе.
1943 год. Адбылася танкавая бітва пад Прохараўкай.
Пачатак Арлоўскай наступальнай аперацыі савецкіх войск «Кутузаў».
Савецкія гісторыкі аж да пачатку 1990-х гадоў стваралі міф аб «найбуйнейшай танкавай бітве ў гісторыі войнаў», аб ўдзеле 1 500 танкаў: 800 савецкіх і 700 – германскіх.
Сучасныя даследаванні кажуць аб удзеле не больш за 300 нямецкіх танкаў, стратах 180 савецкіх і да 100 нямецкіх танкаў.
Прохараўская бітва саступае па маштабах бітвам пад Бродамі-Роўна (3 200 танкаў) і пад беларускім Сянно (2 000 танкаў) ў 1941 годзе. У гонар бітвы створаны Музей-запаведнік “Прохараўскае поле”.
1953 год. У в. Міхайлаўск Магілёўскага раёна нарадзіўся Базыль Камароў.
Беларускі мастак, графік, краязнавец, руплівец беларускай мовы і гісторыі.
Акадэмік графікі Беларускай акадэміі выяўленчага мастацтва. Значнае месца ў яго творчасці займае гістарычная тэма. Стваральнік гістарычных выяў Магілёва, макетаў старажытнага горада для экспазіцый музеяў, Магілёўскага замку ў парку Горкага.
Удзельнік шматлікіх выстаў, распрацоўшчык праектаў аздаблення геалагічнага музея МДУ імя А. Куляшова, партрэтнай галерэі выбітных географаў геаграфічнага таварыства.
1976 год. У Бабруйску нарадзіўся Андрэй Міхневіч.
Беларускі лёгкаатлет (штурханне ядра).
Бронзавы прызёр Летніх Алімпійскіх гульняў 2008 у Пекіне. Чэмпіён Еўропы (2010) і свету (2003). Спартсмэн года Беларусі 2003 года.
У 2001 пакараны двухгадовай дыскваліфікацыяй за ўжыванне забароненых прэпаратаў, у 2013 годзе па факце паўторнага парушэння антыдопінгавых правілаў Дысцыплінарнай камісіяй НАДА дыскваліфікаваны пажыццёва.
2021 год. У Магілёве пабіты метэарэкорд +35,5˚С.
Да гэтага самым спякотным быў дзень у 1936 годзе, калі зафіксавалі тэмпературу +35,4˚С. Пры гэтым месячны рекорд па краіне пабіты не быў: ён зафіксаваны ў 1936 годзе ў Лельчыцах і Гомелі +37,9˚С. Мінімальная тэмпература для 12 ліпеня ў Магілёве склала +7˚С у 1995 годзе.
Днём 11 ліпеня трое школьнікаў прыехалі на роварах на пясчаны кар’ер у Быхаве. Пакінуўшы веласіпеды, пачалі караскацца па абрыве кар’еры. 10-гадовы хлопчык працягнуў сваё “скалалазанне” нават пасля таго, як частка грунта абсыпалася – ён стаў забірацца яшчэ вышэй. Пясок абвяліўся разам з ім зноў. Ратавальнікі, якія прыбылі на месца трагедыі, ужо толькі канстатавалі гібель школьніка – паведамляе прэс-служба Следчага камітэта.
Сёння стала вядома пра смерць палітвязня, знакамітага беларускага мастака Алеся Пушкіна. Ён памёр у рэанімацыі, а абставіны смерці застаюцца невысветленымі. Інфармацыю пра яго смерць размясціла жонка палітзняволенага ў сваім Facebook, а пазней яе пацвердзілі ў гродзенскай турме №1. Жонка Пушкіна напісала, што ён памёр “уначы ў рэанімацыі пры нявысветленых абставінах”. Яму было 57 гадоў.
Алесь Пушкін – вядомы беларускі жывапісец-нонканфарміст, тэатральны мастак, перформер, арт-куратар. Пушкіна затрымалі 30 сакавіка 2021 года. Праз год суд прысудзіў яго да пяці гадоў калоніі строгага рэжыму па абвінавачванні ў “распальванні варожасці” і “здзеку з дзяржсімвалаў”.
Алесь Пушкін – ветэран вайны ў Афганістане. Пачынаючы з часоў Перабудовы ён займаўся арт-перформансамі і яркімі палітычнымі акцыямі. У маладосці, паралельна з вучобай і працай у Віцебску, ажыццяўляў рэстаўрацыю і абнаўленне храмавых роспісаў у магілёўскім Касцёле Святога Станіслава. У цяперашні час некаторыя фрэскі выдалены па палітычных матывах. Героямі роспісу выступалі многія вядомыя беларускія палітычныя і царкоўныя дзеячы.
На пасяджэнні крычаўскага райвыканкама былі разгледжаны пытанні аб абслугоўванні насельніцтва Крычаўскага раёна мсціслаўскім спажывецкім таварыствам. Вынікі працы гандлёвага прадпрыемства былі прызнаны незадавальняючымі.
Ужо неаднойчы mogilev.media пісалі пра канфлікт, які ўзнік паміж прадстаўнікамі мсціслаўскага спажывецкага таварыства і крычаўскімі чыноўнікамі. Разгарэўся ён яшчэ напачатку года з-за таго, што прадстаўнікі райпо хацелі зачыніць краму ў вёсцы Ермакоўка Крычаўскага раёна, аб чым пісалі mogilev.media.
Аднак крычаўскія чыноўнікі і мясцовыя жыхары краму адстаялі. Працягам канфліктнай сітуацыі стаў рэйд старшыні Крычаўскага райвыканкама Андрэя Седукова і старшыны раённага Савета дэпутатаў Ірыны Пруднікавай у вясковую краму аргагарадка Касцюшкавічы, пра што таксама паведамлялі mogilev.media. Тады галоўныя крычаўскія чыноўнікі засталіся назадаволеныя працай гандлёвай кропкі мсціслаўскага райпо.
Поўны разнос
На гэты раз адбыўся новы віток канфліктнай сітуацыі, а менавіта – прылюдны разнос працы мсціслаўскага райпо на паседжанні крычаўскага райвыканкама.
На ім начальнік аддзела эканоміі крычаўскага райвыканкама Таццяна Барзенкова адзначыла, што мсціслаўскае райпо не выконвае паказчыкаў па росту тавараабароту. Больш за тое, па яе дадзеных знізілася і ўдзельная вага спажывецкага таварыства ў тавараабароце раёна і складае менш за 7 працэнтаў.
Па меркаванню крычаўскіх чыноўнікаў прычына зніжэння тавараабарота ў тым, што не выконваецца асартыментны пералік, выяўляюцца пратэрмінаваныя прадукты, прычым такая сітуацыя як ў стацыянарных крамах, так і аўталаўцы.
Выявілася, што ў мясцовай санітарнай службы таксама шмат пытанняў да мсціслаўскага райпо наконт упарадкавання саміх аўталавак, дзе неаднаразова фіксавалі бруд і гармідар.
Пазіцыя кіраўніка крычаўскага райвыканкама Андрэя Седукова наконт гэтай сітуацыі аналагічная: з-за абуральных і сістэмных парушэнняў знікае давер пакупнікоў, пагэтаму тавараабарот і паменшыўся. Больш за тое, Седукоў катэгарычна выказаўся наконт запісу тавараў “на вексель”, загадаўшы такую практыку выкараніць, а таксама працягнуць рэжым працы крамаў на перыяд уборачнай кампаніі і праводзіць маніторынгі сельскіх крамаў толькі пры ўдзеле прадстаўнікоў сельвыканкамаў – паведамляе раённая газета “Крычаўскае жыццё”.
Старшыня райсавета Ірына Пруднікава, якая непасрэдна ўдзельнічала ў разбурэнні крычаўскага райпо і вінаватая ў сённяшніх праблемах раённага гандлю, выказалася наконт таго, што павінны задавальняцца патрэбы пакупнікоў пажылога ўзросту, якія часта жывуць у аддаленых вёсках.
Акрамя таго, на паседжанні прагучала прапанова адкрыць райспажыўтаварыству ў Крычаве краму прамысловай групы тавараў, дзе б жыхары маглі набыць і адзенне, і абутак, і бытавую тэхніку. У сваю чаргу прадстаўнік мсціслаўскага райпо, выслухаўшы ўсё крытыку крычаўскіх чыноўнікаў, запэўніў іх, што парадак на гандлёвых аб’ектах будзе наведзены.
Ад рэдакцыі. Частка высокіх прамоваў галоўных крычаўскіх чыноўнікаў былі выключна папулізмам без сувязі з рэальнасцю, хоць некаторыя правільныя ацэнкі і рацыянальныя прапановы былі. Што з агучанага і прапанаванага будзе здзейснена пакажа толькі час і далейшае вырашэнне праблематыкі крычаўскіх раённых крамаў, што належаць да мсціслаўскага райпо.
Падобна на тое, што мсціслаўскае райпо сапраўды неадказна ставіцца да сваіх пакупнікоў Крычаўскага раёна і сістэмна парушае розныя паказчыкі, але канфлікт перарос ледзь не на ўзровень асабістага, калі ідзе незадавальненне ўсім, што робяць прадстаўнікі мсціслаўскага райспажыўтаварыства. Гэта абурэнне дзейнасцю райпо кожны раз транслюе крычаўская раённая газета.
Таксама варта адзначыць, што няма інфармацыі пра спробы прыцягнення прыватнага бізнэсу для вырашэння пытанняў, звязаных ў забеспячэннем насельніцтва на сяле ў Крычаўскім раёне.
Чарговы тур другой лігі Магілёўскай вобласці па футболе прынёс шэраг цікавых, а часам і нечаканых вынікаў. Шэраг матчаў адбыліся з мінімальнымі нічыйнымі вынікамі, разгромных перамог няшмат, а слабыя каманды далі бой мацнейшым.
Агляд пачнем з прадказальных вынікаў матчаў у зоне “Усход”. Клімавіцкія футбалісты дома без асаблівых праблем выйгралі гасцей з Дрыбіну. Першы тайм быў цалкам пад дыктоўку гаспадароў, якія змаглі забіць адразу тры мячы і стварыць шэраг небяспечных момантаў ля брамы суперніка. Атакі клімавіцках форвардаў былі эфектнымі і прыгожымі, што радавала вока мясцовых заўзятараў. Здавалася, што адбудўецца разгромная перамогай над гасцямі.
Але ў другім тайме дрыбінскія футбалісты супраціўляліся гаспадарам, часта контратакуючы, напрыканцы сустрэчы нават заробілі пенальці. 11- метровы дрыбінскі гулец рэалізаваць не змог, але яго калега падаспеў на дабіванні. Вынік матча крыху здзівіў – 3-1 на карысць гаспадароў, тым больш што пасля забітага мяча госці маглі забіць яшчэ раз.
Горацкая каманда, якая з’яўляецца адной з лідараў усходняй зоны, дома прымала чавускую “Ніву”. На восьмай хвіліне першага тайма адбыўся хуткі гол гаспадароў, якім яны збянтэжылі гасцей з Чавусаў. З гэтага моманту горацкія футбалісты цалкам завалодалі перавагай у гульні і моцна наваліліся на браму суперніка.
Футбалісты “Нівы” спрабавалі адказваць атакамі і небяспечна гуляць, але напрыканцы перыяда прапусцілі яшчэ раз ад горацкіх гульцоў. А вось другі тайм атрымаўся больш напружаным для гаспадароў, бо госці годна змагаліся і мелі свае небяспечныя моманты, якія маглі рэалізаваць. Але ж і другі тайм скончыўся з лікам 1-0 на карысць горацкіх футбалістаў, бо гаспадары за дзесяць хвілін да канца матча змаглі забіць у выніку хуткай атакі. У выніку 3-0 на карысць горацкай каманды, якая ўпэўнена займае другі радок турнірнай табліцы.
Упартай сустрэчай атрымаўся матч паміж касцюковіцкімі і слаўгарадскімі футбалістамі. На працягу ўсей сустрэчы градус накалу не спадаў, а супернікі былі вартыя адзін аднога. Першы тайм быў роўны па гульні, панавала барацьба ў цэнтры поля, небяспечных атак было няшмат.
Другі тайм быў не менш напружаным, хоць атак стала куды больш, але доўгі час абедзьве каманды не маглі рэалізаваць галявыя моманты. Урэшце на 81-й хвіліне слаўгарадскія гульцы змаглі арганізаваць прыгожую атаку, якая завяршылася голам.
Але праз тры хвіліны гаспадары правялі сваю атаку, якая таксама скончылася голам. Праўда, гэта быў аўтагол, бо гулец гасцей перакрываючы небяспечную атаку, зрэзаў мяч у браму сваёй каманды. Канцоўка сустрэчы парадавала заўзятараў моцным накалам, але вынік матча заканамерны 1-1, бо ў цэлым абедзве каманды глядзеліся роўна.
Не зусім чакана атрымалася лёгкая перамога краснапольскіх футбалістаў над гульцамі крычаўскага “Сожа”. Хоць сустрэча пачалася з хуткага гола гасцей на дзявятай хвіліне. Гаспадары праз некалькі хвілін арганізавалі небяспечную атаку ў выніку якой крычаўскі футбаліст зрэзаў мяч ў браму сваёй каманды. Аднак пасля краснапольцы завалодалі ініцыятывай у гульні і пачалі навязваць свой малюнак гасцям, без праблем разрываючы на кавалкі абарону крычаўскай каманды.
Гаспадары ў першым тайме змаглі забіць яшчэ двойчы, адзін з мячоў быў са штрафнога. У другім тайме краснапольцы крыху расслабіліся, дазволіўшы гасцям часта контратакаваць. Але небяспечныя выпады футбалісты “Сожа” так і не змаглі рэалізаваць. А вось гаспадары напрыканцы матча паднапружыліся і забілі яшчэ адзін гол ў браму гасцей, паставіўшы фінальную кропку у матчы – 4-1.
Матч паміж лідарам турнір табліцы “Усход” Серваклюкс Агра і аўтсайдэрам мсціслаўскай “Віхрой” быў прадказальны. Матч хоць і скончыўся буйной перамогай гаспадароў 6-2, аднак чакалася разгромная параза гасцей, якой не адбылося. Першы і другі тайм скончыліся з лікам 3-1 і ў абодвух перыядах панавалі гаспадары, хоць мсціслаўскія футбалісты часам таксама небяспечна атакавалі.
Футбалісты “Серваклюкс Агра” паказвалі моцную гульню, з наладжанай атакай і абаронай, прыгожымі розыграшамі стандартаў, але і госці таксама супраціўляліся. Мсціслаўцы ў гэтым матчы паказалі сябе годна і даказалі, што могуць пазмагацца з мацнейшым за сябе супернікам, хоць па ліку гэта не зусім адлюстроўваецца.
Напружаны матч атрымаўся паміж лідарамі турнірнай табліцы зоны “Захад” – магілёўскім “Дняпром Юні” і бабруйскім “Тарпеда”. Абедзьве каманды ў матчы гулялі моцна, паказалі добры дрыблінг, але на працягу ўсёй сустрэчы футбалісты змагаліся на роўных. У першым тайме гаспадары адкрылі лік забітых мячоў, завяршыўшы контратаку эфектнымі ударам у вугал брамы. Гэта адбылася на 42-й хвіліне і гасцям было непрыемна атрымаць гол “у раздзявальню”.
Але ў другой палове матча бабруйскія футбалісты выраўнялі лік на табло, забіўшы ў сярэдзіне тайма. Мачт спадабаўся нешматлікім гледачам сваім накалам і ўзаемна вострай гульнёй, якая пераходзіла ад брамы гасцей да брамы гаспадароў.
Гульня паміж быхаўскай камандай і гасцямі з Глуску таксама парадавала добрым футболам з шматлікімі небяспечнымі момантамі. У першай палове матча гульня была з невялікай перавагай футбалістаў глускай “Пцічы”, якія гэту перавагу змаглі рэалізаваць у першы гол у сустрэчы. Быхаўскія гульцы гулялі не моцна, але часам адказвалі атакамі, хоць і не надта вострымі.
Другі тайм распачаўся спачатку з гола гасцей, а пасля адказу гаспадароў на табло з’явілася 1-2 на карысць “Пцічы”. Гаспадары стараліся зраўняць лік, але ў выніку прапусцілі небяспечную атаку і атрымалі пенальці ў сваю браму. Глускі футбаліст не змог яго рэалізаваць, бо добра згуляў быхаўскі брамнік, але на дабіванне паспеў форвард гасцей і павялічыў лік да 1-3. Пасля гола глускія футбалісты ўмела абараняліся і не дапускалі асабліва небяспечных момантаў у сваёй штрафной і давялі гульню да ўпэўненай перамогі.
На дзіва напружаным матчам сталася сустрэча шклоўскіх футбалістаў і гасцей з Кіраўска. Першы тайм атрымаўся сумнаватым, з малай колькасцю галявых момантаў і вастрыні, хоць гаспадары ўсё ж змаглі на 30-й хвіліне адкрыць лік у сустрэчы.
А вось другая палова матча была насычана кучай небяспечных момантаў, разанстайных па форме і рэалізацыі атак, стандартных палажэнняў і галоў. Спачатку госці зраўнялі лік у матчы на 55-й хвіліне, але ж гаспадары забілі праз тры хвіліны ў адказ. Прайшло яшчэ тры хвіліны і госці зноўку зраўнялі лік на табло – 2-2.
Але ж прайшло ўсяго шэсць хвілін як гульцы шклоўскага “Спартака” арганізавалі хуткі і прыгожа арганізаваны выхад да брамы суперніка, які завяршыўся дакладным ударам і голам. Госці спрабавалі штурмаваць браму суперніка, але няўдала. Хоць “спаркакоўцы” мелі таксама некалькі момантаў, але забіць больш не змаглі. У выніку атрымалася перамога шклоўскага “Спартака” над кіраўскім футбольным клубам з мінімальным лікам 3-2.
Фота rodniva.by, gorkiv.by, golk.by і з адкрытых крыніц.
